प्रतिनिधि सभा र राष्ट्रिय सभा बैठक बस्दै, एमालेको अवरोध हट्ने

राजनीति

नेपाल लाइभ मंगलबार, भदौ ५, २०८० ०६:१२

काठमाडौं– आज (मंगलबार) संघीय संसद्‌का दुवै सदन (प्रतिनिधि सभा र राष्ट्रिय सभा)को बैठक बस्दै छ। प्रतिनिधि सभा बैठक दिउँसो २ बजे र राष्ट्रिय सभा बैठक दिउँसो १:१ बजे बस्ने गरी समय निर्धारण भएको छ।

तस्करीको ६० किलो सुन बरामद भएपछि नेकपा एमालेले संसद्‌का दुवै सदनमा पुर्‍याउँदै आएको अवरोध मंगलबारदेखि हट्ने सम्भावना छ। संघीय संसद्‌मा प्रतिनिधित्व गर्ने राष्ट्रिय दलको मान्यता प्राप्त राजनीतिक दलहरुबीच सोमबार राति भएको सहमतिअनुसार संसद्‌को अवरोध हट्ने देखिएको हो।

नेकपा एमालेले सुन तस्करी प्रकरणको छानबिनका लागि उच्चस्तरीय समिति गठन गर्नुपर्ने माग गरेर संघीय संसद्‌का दुवै सदनमा अवरोध पुर्‍याउँदै आएको थियो। एमालेको अवरोधका कारण साउन १० गते यता प्रतिनिधि सभा र राष्ट्रिय सभाका बैठक नियमित कार्यसूचीमा प्रवेश गर्न पाएका छैनन्।

प्रधानमन्त्री पुष्पकमल दाहाल प्रचण्डले सोमबार बोलाएको बैठकमा समिति गठन गर्ने सहमति भएको नेताहरुले जानकारी दिएका छन्। सरकारले समिति गठन गर्ने प्रतिबद्धता जनाएकाले आफूहरु संसद्‌को अवरोध हटाउन तयार रहेको नेकपा एमाले संसदीय दलका प्रमुख सचेतक पदम गिरीले जानकारी दिएका छन्।

प्रधानमन्त्री प्रचण्डले बोलाएको बैठकमा नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टीका शीर्ष नेताहरु सहभागी थिए।

सोमबारको बैठकले उच्चस्तरीय समितिको मोडालिटी तयार गर्न प्रमुख ३ दलका नेता सम्मेलित समिति समेत गठन गरेको बताइएको छ। समितिमा नेकपा एमाले संसदीय दलका उपनेता सुवासचन्द्र नेम्वाङ, नेपाली कांग्रेसका प्रमुख सचेतक रमेश लेखक र माओवादी केन्द्रका प्रमुख सचेतक हितराज पाण्डे छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मुलुक प्रधानमन्त्रीले नभई बिचौलियाहरुले चलाइरहेछन् : उपेन्द्र यादव

गीत बजाएको आरोपमा १४ जना पक्राउ

कावासोतीमा मोटरसाइकल दुर्घटनामा परी दाजुभाइको मृत्यु