काठमाडौं- प्रमुख सत्ता साझेदार नेपाली कांग्रेसका सभापति शेरबहादुर देउवाले उपप्रधान तथा गृहमन्त्री नारायणकाजी श्रेष्ठले पूर्वाग्रही व्यवहार गरेको बताएका छन्। आइतबार बसेको सर्वदलीय बैठकमा सभापति देउवा अनपेक्षित रुपमा आक्रोशित भएको सहभागी एक नेताले बताए।
देउवाले बैठकमा नक्कली भुटानी शरणार्थी प्रकरणमा कांग्रेस नेताहरुलाई पक्राउ गरेको तर सुनकाण्डमा मुछिएका माओवादी उपाध्यक्ष कृष्णबहादुर महरामाथि अनुसन्धान नै अघि नबढाएकोमा आक्रोश पोखेका हुन्।
बैठकमा सहभागी ती नेताले नेपाल लाइभसँग भने, ‘कांग्रेस सभापति देउवा गृहमन्त्री श्रेष्ठसँग निकै आक्रोशित देखिनुभयो। उहाँले भन्नुभयो- कसैले पोलेकै भरमा हाम्रा नेताहरुलाई थुन्ने, आफ्ना नेताहरुको नाम जोडिँदा पनि वास्तै नगर्ने। यस्तो पनि हुन्छ? यो तरिका ठिक भएन।’
देउवाले एकपटक नभइ त्यही कुरा पटक-पटक उठाएका थिए। उपप्रधान तथा गृहमन्त्री श्रेष्ठको काम गर्ने शैलीमाथि प्रश्न उठाइरहेका देउवालाई कांग्रेस उपसभापति एवं रक्षामन्त्री पूर्णबहादुर खड्काले रोक्न खोजे। खड्काले रोक्दै भनेका थिए, ‘यो विषय र प्रसंग मिलेन कि सभापतिज्यू।’ खड्कालाई समेत रोकेर देउवा फेरि गृहमन्त्रीमाथि खनिएका थिए।
देउवाले बालकृष्ण खाणको नाम लिँदै माओवादी नेता महरा पक्राउ नपर्नुको कारण श्रेष्ठसँग मागेका थिए। देउवाको भनाइलाई उदृत गर्दै ती नेताले भने, ‘हाम्रो पार्टीको मान्छे जाने, प्रतिपक्ष दलको मान्छे जाने तर तपाईं (माओवादी केन्द्र)को मान्छे नजाने भनेपछि शंका उत्पन्न हुँदैन?’
देउवाको पटक-पटक आक्रोशपूर्ण अभिव्यक्ति सुनेका उपप्रधान तथा गृहमन्त्री श्रेष्ठले लामो समय कुनै प्रतिक्रिया दिएनन्। उनले यत्ति भने, ‘आज सभापतिज्यूलाई के भएको छ? किन यसरी रिसाइरहनुभएको छ?’
सुन तस्करी प्रकरणमा प्रमुख प्रतिपक्ष दल एमालेले उच्चस्तरीय छानबिन समितिको माग गर्दै संसद् बैठक अवरुद्ध गर्दै आइरहेको छ। सोही विषयमा सहमति खोज्न आयोजित बैठकमा देउवा सत्ता साझेदार दलकै मन्त्रीसँग रिसाएका हुन्।
विमानस्थलबाट बाहिरिएको तस्करीको ६० केजी सुन प्रधानमन्त्री मातहतमा रहेको राजस्व अनुसन्धान विभागले सिनामंगलबाट बरामद गरेको थियो। सत्तारुढ दलकै सांसदहरुले समेत गृहमन्त्री र अर्थमन्त्रीको राजीनामाको माग गर्दै उनीहरुमाथि समेत अनुसन्धान हुनुपर्ने बताइरहेका छन्।
पटकपटक बसिरहेको सर्वदलीय बैठकले सहमति जुटाउन सकेको छैन। सोमबार अपराह्न ४ बजेका लागि बैठक बोलाइए पनि प्रधानमन्त्री पुष्पकमल दाहाल प्रचण्ड सुर्खेत गएपछि साँझ ७ बजेका लागि सारिएको छ।
राष्ट्रपति रामचन्द्र पौडेलले मंगलबार बिहान ८ बजे सर्वदलीय बैठक बोलाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
