काठमाडौं– संघीय संसद्मा प्रतिनिधित्व गर्ने, राष्ट्रिय दलको मान्यता प्राप्त राजनीतिक दलका नेताहरुको बैठक आज (सोमबार) पनि बस्ने भएको छ। बैठकमा संसद्मा जारी गतिरोध अन्त्यका लागि सहमतिको ‘खाका’ तयार गरिने नेताहरुले जनाएका छन्। सोमबार अपराह्न ४ बजे, प्रधानमन्त्री तथा मन्त्रिपरिषद्को कार्यालय सिंहदरबारमा बैठक बस्ने तय भएको छ।
संसद्मा जारी अवरोध हटाउनका लागि छलफल गर्न प्रधानमन्त्री पुष्पकमल दाहाल प्रचण्डले आइतबार राष्ट्रिय मान्यता प्राप्त दलका नेताहरुको बैठक बोलाएका थिए। आइतबारको बैठकमा नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टीका नेताहरु सहभागी भएका थिए।
आइतबारको बैठकपछि सञ्चारकर्मीसँग बोल्दै नेताहरुले सदन सञ्चालनबारे सकारात्मक कुरा भएको प्रतिक्रिया दिएका थिए।
६० किलो सुन तस्करी प्रकरणको छानबिनका लागि उच्चस्तरीय समिति गठनको माग गर्दै नेकपा एमालेले संघीय संसद्का दुवै सदनमा अवरोध पुर्याउँदै आएको छ। एमालेको अवरोधका कारण प्रतिनिधि सभा र राष्ट्रिय सभाका बैठक साउन महिनाभरी नियमित कार्यसूचीमा प्रवेश गर्न पाएनन्।
भदौ महिनाको पहिलो बैठक आइतबार बोलाइएकोमा प्रमुख दलहरुबीच सहमतिको प्रयास भएपछि प्रतिनिधि सभा बैठक सूचना टाँस गरेर मंगलबार, भदौ ५ गते सम्मका लागि सारिएको छ।
राष्ट्रिय प्रजातन्त्र पार्टीका अध्यक्ष राजेन्द्र लिंदेनले आइतबारको बैठकमा प्रहरीको केन्द्रीय अनुसन्धान ब्यूरो (सीआईबी)ले गरिरहेको अनुसन्धान प्रभावित नहुने गरी निकास खोज्नका लागि सत्ता पक्ष तयार भएको बताएका थिए। एमालेले पनि त्यसमा सकारात्मक संकेत गरेकाले सोमबारको बैठकमा सहमति हुने सम्भावना रहेको लिंदेनको भनाइ छ।
त्रिभुवन अन्तर्राष्ट्रिय विमानस्थलको भन्सार जाँचपास भएर निस्किएको सुन राजस्व अनुसन्धान विभागले साउन २ गते सिनामंगलबाट बरामद गरेको थियो। सुन बरामद भएपछि उच्चस्तरीय छानबिन समितिको माग गर्दै एमालेले साउन १० गतेदेखि संसद् अवरुद्ध पार्दै आएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
