अर्थमन्त्री प्रकाशशरण महत
काठमाडौं– अर्थमन्त्री प्रकाशशरण महतले युवाहरुले विदेशमा मात्रै सम्भावना नदेखी देशमै भएका सम्भावनाको उपयोग गर्नुपर्ने बताएका छन्। देशमा धेरै अवसर भएको जिकिर गर्दै अर्थमन्त्री महतले अवसरहरु हेर्ने ‘सुक्ष्म आँखा’ चाहिएको बताए।
बुधबार काठमाडौंमा आयोजित कार्यक्रममा बोल्दै मन्त्री महतले नेपाल विकासको क्रममै रहेकाले देशमा धेरै कुरा गर्न बाँकी रहेको बताए। विदेश जानेवित्तिकै सबै कुरा प्राप्त हुन्छ भन्ने मानसिकताबाट नेपाली युवाहरु मुक्त हुनुपर्ने महतको मत छ। ‘यहाँ अवसर अथाहा छ, त्यसको उपयोग गर्नुपर्छ, त्यसको खोजीमा आजका हाम्रा युवा लाग्नुपर्छ,’ महतले भने।
युवाले देशमा नै अवसर खोज्न थाले भने विदेशभन्दा यहाँ नै राम्रो भविष्य हुने महतले दाबी गरे। ‘विदेशमा जति नै सुविधा भए पनि त्यहाँ खुसी छैन,’ महतले भने, ‘त्यसैले नेपालमा प्राप्त अवसरलाई ग्रहण गर्न म अनुरोध गर्दछु।’
एउटा व्यक्तिले कुनै काममा सफलता हात पारे सबैले त्यसैको नक्कल गर्दा अपेक्षित प्रगति हासिल नसकेको महतले विश्लेषण सुनाए। ‘हामीकहाँ अवसर खोज्दा हट मेन्टालिटी छ। एउटाले अवसर देख्यो, फाइदा उठायो, म पनि त्यही गर्नुपर्ने, अर्कोले पनि त्यही गर्ने अर्थात् सबै त्यसैमा लाग्छन्,’ मन्त्री महतले भने, ‘त्यसो गर्नु हुँदैन, अर्को अवसर खोज्नुपर्छ।’
मन्त्री महतले आफ्नो क्षमता चिन्न पनि युवाहरुलाई आग्रह गरे। ‘हरेक व्यक्ति केही न केही क्षमता लिएर जन्मेका छन्। सबैको सम्पूर्ण कुरामा क्षमता हुँदैन। पहिला आफ्नो क्षमता पहिचान गर्नुपर्छ, त्यो क्षमताको परिधिभित्र के गर्न सकिन्छ ? त्यो अवसर लिन म अनुरोध गर्छु,’ महतले भने।
पछिल्लो समय सूचना प्रविधिको क्षेत्रमा भएको विकासले नेपालमा पनि अवसर सिर्जना गरेको महतले उल्लेख गरे। ‘सूचना प्रविधिको स्पेसमा हामी छौँ, जसले गर्दा हाम्रो देशमा अवसर पनि छ। हिजो त्यो अवसर थिएन, भूपरिवेष्टिक देशमा छौं, हरेक उत्पादन कसरी विदेशमा लैजाने, समुन्द्र पार कसरी पुर्याउने लगायतका समस्या थिए। प्रविधिले गर्दा मार्केटिङ सजिलो भएको छ। डिजिटल प्लेटफर्म उपयोग गरेर एउटा कुनामा बसेर आफ्नो उत्पादन संसारको जुनसुकै ठाउँमा बेच्न सकिन्छ। शुन्य लागतमा बेच्ने ठाउँमा पनि तपाईं जोडिन सक्नुहुन्छ। यो हाम्रा लागि अवसर हो,’ महतले भने।
नेपालमा केही छैन, सबै बिग्रेको छ, सबै अर्थतन्त्र ध्वस्त छ, रोगजारी पाइँदैन, अब विदेश जानुको विकल्प छैन भनेर सबैले नकरात्मक कुरा मात्रै गर्ने गरेको महतले उल्लेख गरे। ‘सामाजिक सञ्चालमा नकरात्मक कुरा धेरै चल्छ। सकारात्मक कुराहरु यसरी सर्कुलेट हुँदैन,’ मन्त्री महतले भने, ‘अब नयाँ, पोजेटिभ नेशनल डिस्कोर्स सुरु गरौँ। जस्तो पर्यटन उद्योग चलायमान बन्दै गएको छ। यसले धेरै अवसरहरु सिर्जना गर्छ। पर्यटन, आइटी, हाइड्रो र कृषिको नेपालमा धेरै स्कोप छ।’
मन्त्री महतले नेपालको अर्थतन्त्र विस्तारै लयमा फर्किएको दाबी पनि गरे। कोरोना भाइरस र अन्य बाह्य कारणले नेपालको अर्थतन्त्र धरासायी बने पनि अहिले बिस्तारै लयमा फर्किएको महतले दाबी गरे । उनले अर्थतन्त्रलाई अझै चलायमान र सुदृढ बनाउन सकारात्मक सोच र प्रचारको आवश्यकता रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
