काठमाडौं– ‘मेरो डान्स युनिभर्स’को फाइनलिस्ट खुसी कार्कीलाई मञ्चमा निर्णायक मिथिला शर्माले सोधिन्, ‘थाइल्याण्डमा गएपछि यहाँ सिकेका डान्स सिकाउँछौ हैन?’
इन्ट्रा फाउन्डेसनले आयोजना गरेको उक्त डान्सिङ रियालिटी शोले खुसीलाई थाइल्याण्डबाट नेपाल ल्याइपुर्याएको थियो। खुसीले यहाँ कल्चरल डान्सहरू सिकिन्, जुन थाइल्याण्डमा कहिल्यै सिक्न पाएकी थिइनन्। धेरै टेक्निकहरू सिकिन्। ‘म उपाधि जितौँला नजितौँला। तर यहाँबाट सिकेको कुरा म थाइल्याण्ड गएर सिकाउँछु,’ खुसीले खुसी हुँदै भनिन्।
१८ वर्षीया खुसीले यसपालि दोस्रोपटक नेपाल टेकेकी थिइन्। अघिल्लोपटक नयाँ वर्षको अवसरमा घुम्न आएकी थिइन्। त्यतिबेला पोखरा, पशुपति, लुम्बिनी, मनकामना परिवारसँग घुम्न पुगेकी थिइन्। यसपटक भने घुम्न हैन, आफ्नो सपना पूरा गर्न आएकी थिइन् नेपाल।
खुसीको पुर्खा काँकरभिट्टाबाटै म्यानमार पुगेको थियो। उनका बा आमा म्यानमारमै जन्मे। अध्ययन र काममा सिलसिलामा उनको परिवार यतिबेला थाइल्याण्डमा छ।
खुसीले नेपाली भाषा सानैदेखि सिकिन्। भाषामात्र हैन, उनलाई नेपाली गीतमा डान्स गर्न असाध्यै रुचि लाग्थ्यो। उनी थाइ नेपाली संघको कार्यक्रममा गएर नाच्थिन्। विद्यालयको कार्यक्रममा नाच्थिन्।
नेपालका संस्कृति र भेषभुषाले सधैँ आकर्षित गरिरहन्थ्यो खुसीलाई।
खुसी ४ महिनाअघि नेपाल आइपुग्दा हामीले सोधेका थियौँ, ‘उपाधि जित्छु भन्ने सोच्नुभएको छ?’
खुसीले त्यतिबेला नेपाल आएर नेपाली गीतमा नाच्न पाउँदामै खुसी भएको बताएकी थिइन्। अहिले खुसी फाइनलमा प्रवेश गरेकी छन्। केही दिनपछि ‘मेरो डान्स युनिभर्स’को उपाधि कसले उचाल्छ भन्ने कुरा पनि टुंगो लाग्छ। ‘त्यतिखेर फाइनलमा पुग्छु सोचेको थिइनँ। म भन्दा अरु धेरै राम्रो गर्ने साथीहरू हुनुहुन्थ्यो। म उहाँहरूको लेभलमा छैन जस्तो लाग्यो। जब फाइनलमा पुगें, मलाई विश्वास लागिरहेको थिएन,’ खुसीले भनिन्।
खुसीलाई थाइल्याण्ड र यहाँको नृत्य फरक लागिरहेको छ। यता उनले विभिन्न टेक्निकहरू सिक्न पाइरहेकी छन्। नयाँ कुरा सिक्न पाउँदा दंग पनि परिरहेकी छन्।
थाइल्याण्डको अडिसन हुँदा खुसीले ‘गुराँस फूल्दा वनै रमाइलो’मा डान्स गरेकी थिइन्। डान्सबाट निर्णायकहरूलाई प्रभाव पारिरहेकी खुसीको त्यतिबेला तेस्रो नम्बरमा नाम आएको थियो।
नेपाल आएपछि पहिलो अडिसन ‘चट्ट रुमाल’ गीतमा दिएकी थिइन्। त्यसपछि त उनलाई माया गर्ने नेपालीहरूको संख्या पनि बढ्दै गयो। फुरुंग पार्ने कमेन्ट आउन थाले। यति धेरै नेपालीहरूको माया पाउँदा उनी भन्छिन्, ‘यसलाई सधैं जोगाएर राख्छु।’
‘मायाको बादल’मा डान्स सिक्दा भने उनलाई निकै गाह्रो परेको थियो। ‘प्राक्टिस गर्न धेरै गाह्रो परेको थियो। कहिल्यै पनि नाचेको थिइनँ। नाचेपछि धेरैको माया पाएँ,’ खुसी भन्छिन्।
खुसीले एउटा म्युजिक भिडिओ पनि यो बीचमा खेलिसकेकी छन्। अहिले उनलाई फिल्म र भिडिओ खेल्नका लागि अफर आइरहेका छन्।
उनी फाइनल कार्यक्रमपश्चात् मात्र भिडिओ र फिल्का प्रस्तावहरूमा निर्णय दिने बताउँछिन्। नेपाली फिल्ममा भने आफूले प्रष्ट नेपाली भाषा सिक्नपर्ने खुसीको भनाइ छ।
‘नेपालमै बस्ने सोच गर्नुभएको छ?’
जवाफमा खुसी भन्छिन्, ‘नेपाल फर्केर आउने विषयमा सोचेको छैन। भविष्मा के हुन्छ थाहै छैन। तर वर्षमा २/३ पटक भने आइरहन्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
