माधव नेपाल (फाइल तस्बिर)
काठमाडौं– नेकपा एकीकृत समाजवादीका अध्यक्ष माधव कुमार नेपालले आफू भागेको भन्ने प्रचार गरिएको भन्दै आपत्ति जनाएका छन्। युरोप भ्रमणबाट स्वदेश फर्किने क्रममा सोमबार त्रिभुवन अन्तर्राष्ट्रिय विमानस्थलमा सञ्चारकर्मीसँग बोल्दै नेपालले आफू भाग्ने खालको मान्छे नभएको पनि बताए।
आफू युरोप भ्रमणका जानु १ दिन अगाडि मात्रै सर्वोच्च अदालतले ललितानिवासको जग्गा प्रकरणको छानबिनका लागि आदेश दिएको नेपालले प्रष्ट पारे।
‘कसै कसैले त माधव नेपाल भाग्यो भन्ने लेखे। माधव नेपाल भाग्ने खालको मान्छे होइन भन्ने कुरा बुझ्नु पर्दथ्यो। गोली चल्ने बेला, गोली खाने बेला त नभाग्ने मान्छे। बदमासी र कुनै अपराध नगर्दाखेरी तर्सिएर भाग्ने मान्छे माधव नेपाल होइन,’ नेपालले भने।
अध्यक्ष नेपालले राजाले गिरफ्तार गर्न खोज्दा समेत नभागेको प्रष्ट पारे।
उनले ०६१, ०६२ सालमा सबै घटनाको सामना गरेको र आफूले कुनै पनि भ्रष्टाचार नगरेको दाबी गरे। उनले कानुन बमोजिक प्रक्रिया नभएको बताए। उनले आफू पूर्व निर्धारित कार्यक्रम अनुसार युरोप गएको बताए।
अध्यक्ष नेपाल साउन २२ गते, सोमबार युरोप भ्रमणका निस्किएका थिए। प्रवासी नेपाली एकता मञ्च युरोपले आयोजना गरेको कार्यक्रममा सहभागी हुन नेपाल स्विजरल्याण्डको जेनेभा प्रस्थान गरेका थिए।
नेपाल युरोप भ्रमणमा जनुभन्दा अघिल्लो दिन, साउन २१ गते (आइतबार) सर्वोच्च अदालतले ललिता निवासको सरकारी जग्गा हिनामिना प्रकरणमा तत्कालीन प्रधानमन्त्रीहरुमाथि पनि छानबिन गर्न आदेश दिएको थियो।
योगराज पौडेलले दायर गरेको बन्दीप्रत्यक्षीकरणको निवेदनमा निर्णय सुनाउँदै सर्वोच्च अदालतका न्यायाधीशद्वय अनिलकुमार सिन्हा तथा कुमार चुँडालको संयुक्त इजलासले निर्णय प्रक्रियामा सहभागी तत्कालीन प्रधानमन्त्रीलाई पनि अनुसन्धानको दायरमा ल्याउन भनेको थियो।
‘निर्णय गर्ने अथवा निर्णय प्रक्रियामा सहभागी हुनेहरुलाई अनुसन्धानको दायरामा नल्याइ अह्राए खटाएको काम गर्ने स्तरका कर्मचारी तथा सम्पत्ति लगानी गरी जग्गा खरिद गर्नेलाई मात्र अनुसन्धान केन्द्रित भएकाले यसले समग्र न्याय प्रणालीप्रतिको आम विश्वासलाई समेत जोखिममा पारेको छ,’ सर्वोच्चले भनेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
