काठमाडौं- गृह मन्त्रालयको निर्देशनमा प्रहरी प्रधान कार्यालयले प्रहरी कर्मचारी सरुवाको मापदण्ड बनाउन थालेको छ। नयाँ मापदण्ड बन्दै गरेकाले साउनको सुरुवातमै हुनुपर्ने प्रहरी कर्मचारीको सरुवा समेत अहिलेसम्म हुन सकेको छैन।
जसका कारण अहिले इन्स्पेक्टरदेखि एसपीसम्मका सरुवा रोकिएका छन् भने भर्खरै सरुवा भएर इन्चार्ज भएका इन्स्पेक्टरहरु समेत फिर्ता हुनुपर्ने अवस्था छ।
नयाँ मापदण्ड अनुसार करिब एक महिनाअघि मात्रै सरुवा भएर इन्चार्जको रुपमा खटिएका इन्स्पेक्टहरु समेत फिर्ता आनुनुपर्ने भएको छ। यसरी एक महिनामै फिर्ता आउनुपर्ने अवस्थाका इन्स्पेक्टरहरु आधा दर्जनभन्दा बढी रहेको प्रहरी प्रधान कार्यालय जनाएको छ।
नयाँ मापदण्डअनुसार ‘क’ श्रेणीको कार्यालयको इन्चार्ज भइसकेका प्रहरी अधिकृतहरुलाई ‘क’ श्रेणीकै कार्यालयको इन्चार्जको रुपमा सरुवा नहुने गरी अहिले मापदण्ड बनाइँदैछ। जसकारण यसअघि ‘क’ श्रेणीमा बसेर अहिले पनि ‘क’ श्रेणीको कार्यालयमा सरुवा भएर इन्चार्ज गएका इन्स्पेक्टहरुलाई प्रहरी प्रधान कार्यालयले फिर्ता ल्याउने तयारी गरेको हो।
यसैगरी इन्स्पेक्टरहरुलाई एकै पटक ‘क’ श्रेणीको कार्यालयको इन्चार्जको रुपमा समेत नपठाउने गरी मापदण्ड बनाइएको छ। सुरुमा ‘ख’ श्रेणीको कार्यालयमा इन्चार्ज भएर बसेको प्रहरी अधिकृत (इन्स्पेक्टर)लाई मात्रै दोस्रो पटक इन्चार्ज दिँदा ‘क’ श्रेणीको कार्यालयमा सरुवा गरिने भएको छ।
एकै पटक ‘क’ श्रेणीको कार्यालयको इन्चार्ज बनाउँदा काममा बोझ आउने, एकै पटक ठूलो जिम्मेवारी पाउँदा कार्यसम्पादनमा असर पर्न सक्ने भएकाले सुरुमा ‘ख’ श्रेणीको कार्यालयको इन्चार्ज बनाउन लागिएको प्रहरी प्रधान कार्यालयले जनाएको छ।
योसँगै काजको रुपमा खटिएका इन्स्पेक्टहरुको पनि अहिले दरबन्दी मिलान गर्न लागिएको प्रहरी प्रधान कार्यालयले जनाएको छ। इन्स्पेक्टरसँगै डीएसपी, एसपीहरुको सरुवा पनि अहिलेसम्म रोकिएको छ।
साउनको पहिलो हप्ताभित्र भइसक्नुपर्ने सरुवा अहिलेसम्म हुन नसक्नुको कारण पनि यही मापदण्ड रहेको प्रहरी प्रधान कार्यालयको तर्क छ। यद्यपि, एसपी र डीएसपीको सरुवा भने आकर्षक कार्यालयको इन्चार्जमा जाने होडबाजीका कारण पछाडि धकेलिएको प्रहरी अधिकृतहरु बताउँछन्।
अहिले सुनसरी, इलाम, नुवाकोट, उदयपुर, कपिलवस्तु, रौतहट, बारा, डोटी, कास्की, भक्तपुर लगायत जिल्लाका प्रहरी प्रमुख फेरिँदैछन्। सुनसनरीमा प्रभु ढकाल, उदयरपुरमा ज्ञानेन्द्र फुयाल, इलाममा दिलिप घिमिरे, नुवाकोटमा रमेश पण्डित, कास्कीमा अजय केसी, कपिलवस्तुमा प्रेम बस्नेत, बारामा होबिन्द्र बोगटी, रौतहटमा बीरबहादुर बुढा कार्यरत छन्। यी जिल्लाहरुमा जान एसपीबीच तीव्र प्रतिस्पर्धा छ।
एसपीमा बढुवा हुने बित्तिकै इन्चार्ज गएकाहरु झापामा दुर्गाराज रेग्मी, पर्साका कोमल शाह, सर्लाहीमा नरेशराज सुवेदी, बाँकेमा रन्जितसिंह राठौरमध्ये केहीलाई फिर्ता बोलाउने तयारी समेत हेडक्वाटरले गरेको छ।
त्यसैगरी डीएसपीहरुको पनि साउनको पहिलो साता सरुवा नै हुनुपर्नेमा अहिलेसम्म हुन सकेको छैन। काठमाडौं उपत्यका भित्रका प्रहरी वृत्तहरु महाराजगञ्ज, बौद्ध, नयाँ बानेश्वर, स्वयम्भू, सोह्रखुट्टे, दरबारमार्ग लगायतका ठाउँहरुमा पनि इन्चार्ज फेरिने बेला भएको छ।
उपत्यका बाहिर पनि डीएसपीले कमाण्ड गर्ने जिल्ला तथा इलाका प्रहरी कार्यालयहरुका इन्चार्ज एक महिनाअघि नै सरुवा हुनुपर्नेमा अहिलेसम्म हुन सकेको छैन। आकर्षक पोस्टिङ मानिने ठाउँमा जान डीएसपीहरुबीच प्रतिस्पर्धा छ। जसका कारण पनि सरुवामा सकस भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
