काठमाडौं– प्रधानमन्त्री पुष्पकमल दाहाल ‘प्रचण्ड’ले स्वास्थ्य तथा जनसंख्यामन्त्री आफ्नो मन्त्रिपरिषद्मा सबैभन्दा बढी ऊर्जावान र गतिशील मन्त्री भएको बताएका छन्।
स्वास्थ्य तथा जनसंख्यामन्त्री बस्नेतले मन्त्रीको पदभार सम्हालेको १०० दिन पुगेको अवसरमा शुक्रबार राजधानीमा आयोजित कार्यक्रममा प्रधानमन्त्री प्रचण्डले स्वास्थ्यमन्त्री बस्नेत लय सम्हालेर काम अगाडि बढाएको बताए।
स्वास्थ्यमन्त्री बस्नेतले गरेका स्वास्थ्य सुधारका कामबाट मन्त्री परिषद्का सदस्यहरुसमेत निकै प्रभावित भएको बताउँदै प्रधानमन्त्री प्रचण्डले भने, ‘उहाँ निकै इनर्जेटिक र डायनामिक मन्त्री हुनुहुन्छ। जब उहाँ (मन्त्रिपरिषद्मा) स्वास्थ्य मन्त्रालयको काम ब्रिफिङ गर्न थाल्नुहुन्छ। सवै मन्त्रीको आङ जिरिङ्ग हुने गरेको पाएको छु।’
स्वास्थ्यमन्त्री बस्नेतको स्वास्थ्य सुधारको योजना र कार्यशैलीबाट आफू प्रभावित भएको प्रधानमन्त्री प्रचण्डको भनाइ थियो। मन्त्री बस्नेतले स्वास्थ्य क्षेत्रमा उदाहरणीय काम गरेकै कारण आफू हौसला प्रदान गर्न कार्यक्रममा आएको प्रचण्डले बताए।
सबै मन्त्रीहरुसँग आफूले कार्यसम्पादन सम्झौता गरेको जानकारी दिँदै मन्त्री बस्नेत नेतृत्वको स्वास्थ्य मन्त्रालयले १०० प्रतिशत सफलता प्राप्त गर्ने विश्वास व्यक्त गरे। नेपालको नर्सिङ क्षेत्रमा निकै समस्या रहेको औंल्याउदै प्रधानमन्त्रीले यसमा नीतिगत सुधार गरेर पढ्नका लागि विदेश जानुपर्ने र त्यतैबाट रोजगारीका लागि विदेशिनुपर्ने अवस्थाको अन्त्य गर्न आफू लागिपरेको बताए।
कार्यक्रममा स्वास्थ्य तथा जनसंख्यामन्त्री बस्नेतले १०० दिनको कार्यकालमा आफूले विपन्नको निशुल्क उपचारका लागि संघीय अस्पतालका साडे ३ हजार बेड नि:शुल्क गरेको, भिआईपी तथा भिभिआईपीका लागि वीर अस्पतालका उपचार कक्ष थप गरेको, वित्त रणनीति र स्वास्थ्य रणनीति पास गरेको, निजी अस्पतालमासमेत १० प्रतिशत बेड विपन्नका लागि नि:शुल्क गर्नैपर्ने व्यवस्था कडाइका साथ लागू गरेको लगायतका काम गरेको बताउँदै आउँदो ६ महिनामा जनताले महसुस हुने गरी स्वास्थ्यमा सुधारका काम गर्ने दाबी गरे।
कार्यक्रममा राष्ट्रिय योजना आयोगका सदस्य डा आरपी बिच्छाले स्वास्थ्यका नीति बनाउँदा योजना आयोगले सहजीकरण गर्ने बताए। स्वास्थ्य तथा जनसंख्या मन्त्रालयका सचिव डा रोसन पोखरेलले स्वास्थ्यमन्त्री बस्नेतको नेतृत्वमा मन्त्रालयले धेरै काम अगाडि बढाएको बताउँदै नेतृत्व गतिलो भएपछि कर्मचारीले दायाँबाया गर्ने अवस्था नआउने बताए।
कार्यक्रममा स्वास्थ्य मन्त्रालयका अधिकारी, विभिन्न अस्पतालका कर्मचारी, चिकित्सक, दातृ निकायका प्रमुखहरुसहितको ठूलो सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
