फाइल तस्वीर
काठमाडौं- सशस्त्र प्रहरीले अविरल वर्षाको कारण देशका विभिन्न ठाउँहरुमा बाढीमा फसेकाहरुको सकुशल उद्धार गरेको छ। रौतहट जिल्लाको परोहा नगरपालिका ४ स्थित लाल बकैया खोलामा फसेका चार जनाको मंगलबार सशस्त्र प्रहरीले सकुशल उद्धार गरेको छ।
सोही नगरपालिका ४ बस्ने ४४ वर्षिय शेख हुसेन, ५९ वर्षिय शेख दाउत र ४५ वर्षिय समसुल शेख घाँस काटी फर्कने क्रममा एक्कासी पानीको बहाब बढेर खोलाको किनारमा फसेका थिए।
सो बारे जानकारी पाउनासाथ सुरक्षा बेश फतुहाबाट विपद् उद्धार सामाग्रीसहित खटिएको सशस्त्र प्रहरीले उनीहरुको सकुशल उद्धार गरेको हो।
यसैगरी सर्लाही जिल्लाको धनकौल गाउँपालिका ४ मैनाथपुर खोलामा पानीको वहाव बढ्न गई अड्किएका १ सय ५० जनाको सशस्त्र प्रहरीले मंगलबार सकुशल उद्धार गरेको छ।
घाँस काट्न गएका उनीहरु एक्कासी पानीको बहाब बढ्न गई अड्किएको भन्ने जानकारी पाउनासाथै नं. १० गण सर्लाहीबाट विपद् उद्धार सामाग्रीसहित खटिएको सशस्त्र प्रहरीले उनीहरुको सकुशल उद्धार गरेको सशस्त्र प्रहरी बलका सह प्रवक्ता डीएसपी शैलेन्द्र थापाले जानकारी दिए।
त्यसैगरी डडेलधुरा जिल्लाको पर्शुराम नगरपालिका ४ पुन्तुरा खोलामा अड्किएका दुई जनाको साउन २३ गते सशस्त्र प्रहरीले सकुशल उद्धार गरेको छ।
सोही ठाउँ बस्ने १८ वर्षीय महेश भाट र १३ वर्षिय तेज भाट खोला तर्ने क्रममा एक्कासी पानीको बहाब बढ्न गई खोलाको बीच भागमा अड्किएका थिए।
सो लगत्तै बिओपी परिगाउँबाट विपद् उद्धार सामाग्रीसहित खटिएको सशस्त्र प्रहरीले उनीहरुको सकुशल उद्धार गरेको डीएसपी थापाले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
