ग्राण्डीमा ९ घण्टा लगाएर हात्तीपाइले रोगको सफल शल्यक्रिया

समाज

नेपाल लाइभ बुधबार, साउन २४, २०८० १५:३१

काठमाडौं- ग्राण्डी अन्तर्राष्ट्रिय अस्पतालमा हात्तीपाइले रोगको शल्यक्रिया सफल भएको छ।

गत साउन २ गते अस्पतालमा कार्यरत प्लास्टिक सर्जन डा. जयनमान श्रेष्ठको नेतृत्वमा ३५ वर्षीय एक युवकको बायाँ खुट्टामा भएको हात्तीपाइलेको ९ घण्टा लगाएर गरिएको शल्यक्रिया सफलतापूर्वक सम्पन्न भएको हो। म्याग्दी बेनी घर भएका ती युवकको दुवै खुट्टाको आकार तथा वजन बढ्दै गएर एउटै खुट्टाको वजन ४८ केजी थियो।

उनलाई २० वर्ष अघि नै हात्तीपाइलेको समस्या देखिएको थियो। डा श्रेष्ठले प्लाष्टिक सर्जरी विधिबाट खुट्टाको शल्यक्रिया भएको जानकारी दिए। उनले अप्रेसनका लागि ९ घण्टा समय लागेको बताए।

‘उहाँलाई हात्तीपाइले रोग करिब २० वर्षअघि नै शुरुवात भएको रहेछ। २० वर्षको अवधिमा खुट्टाहरू धेरै नै सुन्निएको कारणले जटिल अवस्थामा पुगेको रहेछ,' डा श्रेष्ठले भने, 'उहाँको दुवै खुट्टा धेरै गह्रुङ्गो र धेरै ठूलो भएका कारण उहाँलाई हिँड्नलाई पनि धेरै मुस्किल अवस्था थियो। बेलाबेलामा खुट्टामा इन्फेक्सन हुने, घाउ हुने, गन्हाउने भएको थियो। विभिन्न ठाउँमा गएर उपचार गर्नेपनि कोशिस गर्नुभयो। उहाँ उपचारका लागि भनेर भारत पनि जानुभएको रहेछ। त्यहाँ पनि उपचार सम्भव भएन।'

उनले अगाडि भने, 'त्यसपछि ग्राण्डी अस्पतालमा आइसकेपछि उहाँको उपचारलाई ठूलो भएको हात्तीपाइलेको भाग निकाल्न प्लास्टिक सर्जरी विधिबाट उपचार गरेर निकाल्यौँ। खुट्टापनि निकाल्नुपर्ने अवस्था थियो। प्लाष्टिक सर्जरी गरेर खुट्टालाई जोगाउने हिसाबले अप्रेसन गरेको हो।'

करिब ४८ किलो वजन भएको हात्तीपाइले भएको खुट्टा निकालिएको उनले बताए।

डा श्रेष्ठको नेतृत्वमा प्लास्टिक सर्जन डा समित शर्मासहितको टोलीले ती युवकको शल्यक्रिया गरेका हुन्। बिरामीलाई बुधबार डिस्चार्ज गरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

आईपीएलमा चेन्नाईविरुद्ध राजस्थान विजयी, सूर्यवंशीको उत्कृष्ट ब्याटिङ

आजको मौसमः देशभर आंशिक बदली, चट्याङ्गसहित मध्यम वर्षाको सम्भावना

सर्लाहीमा मोटरसाइकल एकआपसमा ठोकिँदा २ जनाको मृत्यु