एमाले संसदीय दलका सचेतक महेश बर्तौला (फाइल तस्बिर)
काठमाडौं– नेकपा एमालेले अन्तर्राष्ट्रिय विमानस्थलबाट तस्करीको १ क्विन्टल सुन बरामद प्रकरणको अनुसन्धानका लागि उच्चस्तरीय समिति गठन गर्नुपर्ने आफ्नो माग यथावत् रहेको बताएको छ। उक्त प्रकरणलाई लिएर उपप्रधान तथा गृहमन्त्री नारायणकाजी श्रेष्ठ र अर्थमन्त्री प्रकाशशरण महतमाथिको शंका पनि कायमै रहेको एमालेको जिकिर छ।
एमाले संसदीय दलका सचेतक महेश बर्तौलाले सरकारका गृहमन्त्री र अर्थमन्त्रीमाथि शंका रहेको दोहोर्याए। बर्तौला भन्छन्, ‘उच्चस्तरीय छानबिन समितिको माग के भयो? किन यो विषयमा कुरा आएन। जतिखेर सुन सडकमा समातिँदै थियो। राजस्व अनुसन्धान विभागका कर्मचारीले १० दिनअघि नै थाहा थियो। प्रधानमन्त्रीलाई सूचना थाहा हुन्छ। गृहमन्त्री र अर्थमन्त्रीलाई थाहा हुन्छ कि हुँदैन? थाहा हुन्छ भने कसरी सडकमा सुन आउँछ? त्यसैले गृहमन्त्री र अर्थमन्त्रीमाथि पनि आशंका छ।’
गृहमन्त्री श्रेष्ठले मंगलबार संसद्मा गरेको सम्बोधनप्रति पनि एमाले सचेतक बर्तौलाले विरोध जनाए। श्रेष्ठले मंगलबार प्रतिनिधि सभामा बोल्दा ८० प्रतिशतभन्दा बढी राजनीतिक प्रवचनमा बिताएर प्रतिपक्षलाई गलाउने रणनीति लिएको उनले बताए। सरकारले सदनमार्फत् झुठ र भ्रम फैलाउन खोजेको पनि एमालेको आरोप छ।
बर्तौलाले थपे, ‘गृहमन्त्रीज्यूले मलाई अलि पहिलेदेखि नै मन थियो। प्राप्त भएन। प्रतिपक्षले अवरोध गरेका कारण आउन नपाएको भनेर झुठ बोल्नुभएको छ।’ सत्तापक्षकै ‘नाजायज र अनुचित अडान’ले अवरोध कायम रहेको बर्तौलाले आरोप लगाए।
एमालेले अवरोध कायम राखेपछि प्रतिनिधि सभाको बैठक साउन २४ गते दिउँसो १ बजेसम्मका लागि स्थगित गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773897272.png)
-1764146706.png)
-1773837959.png)
