पर्वत– कालीगण्डकी दोहनविरुद्ध अभियान चलाउँदै आएका फोटो पत्रकार तथा अभियन्ता आरके अदीप्त गिरीविरुद्ध प्रहरीले पक्राउ पूर्जी जारी गरेको छ। सामाजिक सञ्जालमा पर्वतमा पत्रकारिता विकृत देखिएको र त्यसलाई भण्डाफोर गर्नुपर्ने भनेपछि उनीविरुद्ध स्थानीय पत्रकारको समूहले उजुरी दिएको थियो।
उक्त उजुरीका आधारमा गिरीविरुद्ध पक्राउ पूर्जी जारी भएको हो। गिरीले सामाजिक सञ्जालमा पत्रकारको नाममा देखिएको लाखौँ रुपैयाँ बेरुजु रकम, पत्रिका बजारमा बिक्रीवितरण नहुने, पत्रकारको तस्करसँगको मिलेमतो, मिडियाले सामाजिक मुद्दाको उठान गर्न नसकेको, कालीगण्डकी नदीको गैरकानुनी दोहनबारे प्रश्न उठाएका थिए।
त्यसपछि आरोप प्रमाणित गर्न चुनौती दिँदै पत्रकारहरू गणेश पौडेल, छविलाल तिवारी, सन्तोष थापागायतले उजुरी दिएका हुन्। उनीहरू पत्रकार महासंघ गण्डकीले कारबाही गरी सदस्यबाट निकालिएका व्यक्तिहरू रहेका बताइएको छ।
गिरीले महालेखा परीक्षण कार्यालयले पर्वतका पत्रकारहरूको नाममा बेरुजु रकम ३५ लाख देखाउनु र राज्यबाट लोककल्याणकारी विज्ञापन वापतको रकम पत्रिकाले असुल्ने, तर पत्रिका बजारमा बिक्रीवितरण नै नगर्ने भनी ‘उनीहरुले गर्ने पत्रकारिता’को विरोध गरेका थिए।
‘पत्रकारिता क्षेत्र नै राज्यकोष दोहनको धन्दामा लाग्नु विडम्बना हो । पर्वतका अधिकांश पत्रकारले जनसरोकारको विषयमा कलम चलाउनुभन्दा तस्कर र बिचौलियालाई केन्द्रमा राखेर पेसालाई दुर्गन्धित बनाइरहेका छन्,’ प्रहरीको साइबर ब्यूरोमा उजुरी परेपछि गिरीले बताएका छन्। सामाजिक बेथितिका विरुद्ध सामाजिक सञ्जालमा केही कुरा बोल्दैमा साइबर अपराधको आरोपमा पक्राउ पूर्जी जारी हुनु दु:खद भएको उनले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
