एजेन्सी- शनिबार पाकिस्तानका पूर्वप्रधानमन्त्री इमरान खानलाई तोशाखाना मुद्दामा दोषी ठहर गर्दै त्यहाँको जिल्ला तथा सत्र अदालतले एक लाख जरिवानासहित ३ वर्षको जेल सजाय सुनायो। अदालतको फैसलापछि तहरीक-ए-एन्साफ (पीटीआई) पार्टीका अध्यक्ष समेत रहेका खानलाई लाहोरस्थित उनकै निवासबा गिरफ्तार गरी पञ्जाब प्रान्तको सीमावर्ती जिल्ला अटक जेलमा पठाइएको छ।
खानलाई पक्राउ गरेपछि प्रहरीले उनलाई मोटरवे हुँदै इस्लामावाद ल्याएको थियो। मेडिकल जाँचपछि त्यहाँबाट उनलाई अटक जेल लगियो। पञ्जाबको जेल विभागका एक अधिकारीले खानलाई जेलमा सरुवा गरेपछि सामान्य नियमअनुसार उनको गिरफ्तारी वारेन्ट जाँच गरिने बताएका छन्। अब जेलमै उनको नयाँ मेडिकल टेस्ट हुनेछ। त्यसपछि उनको व्यक्तिगत सामान उनीबाट लिइनेछ। उनीसँग भएका सामान उनलाई रिहा गर्दा मात्रै फिर्ता गरिनेछ।
पाकिस्तानका जेलहरूमा तीन श्रेणीमा कैदीहरूलाई राखिने गरेको छ। हत्या, डकैती, चोरी, झगडा र अन्य अपराधमा सजाय पाएका कैदीहरूलाई ‘सी’ वर्ग र हत्या र झगडाका मुद्दामा संलग्न तर हाइप्रोफाइल परिवारका तथा स्नातक पास गरेका कैदीहरूलाई ‘बी’ श्रेणीमा राखिन्छ। उच्चपदस्थ सरकारी अधिकारी, पूर्व केन्द्रीय मन्त्री र धेरै कर तिर्ने कैदीलाई 'ए'वर्गमा राखिन्छ।
कारागार नियमावलीअनुसार ‘ए’ वर्गका कैदीहरूलाई बस्नका लागि दुई कोठाको छुट्टै ब्यारेक दिइन्छ जसमा एउटा कोठाको साइज ९ फिट गुणा १२ फिट अर्थात् लम्बाइ ९ फिट र चौडाइ १२ फिट हुन्छ। ओछ्यान, एयर कन्डिसन, फ्रिज र टिभीबाहेक कैदीका लागि छुट्टै भान्साको व्यवस्था पनि यस्ता कैदीलाई हुन्छ। जेलमै बनेको खाना नखाने छुट पनि उनीहरूलाई हुन्छ। उनीहरू छुट्टै मन परेको खाना पकाएर खान सक्छन्। यसका लागि 'ए' श्रेणीका कैदीलाई २ जना कर्मचारी पनि दिइन्छ। जो जेलभित्रका कैदी नै हुन्छन्।
कारागार नियमावलीअनुसार खानलाई खानलाई 'ए' श्रेणीमा राख्न सकिनेछ। तर उक्त जेलमा भने त्यस्तो विशेष सुविधा छैन। त्यसैले खानले कामदार, छुट्टै कोठा लगायतका विशेष सुविधा यहाँ पाउने छैनन्। अटक जेलमा 'क्लास सिस्टम' नै नरहेको त्यहाँका प्रमुखले बताएका छन्।
यद्यपि खान जेल गएपछि त्यहाँ एक भीभीआईपी कक्ष भने तयार गरिएको छ। तर यस सेलमा एसीको सुविधा छैन।त्यहाँ एउटा फ्यान बेड र एक शौचालय भने छ। अटक जेलमा कुल ८०४ कैदी छन्। खान उनीहरूकै बीचमा रहनेछन्।
पाकिस्तानमा जेल जाने खान प्रथम पूर्वप्रधानमन्त्री होइनन्। यसअघि अन्य ६ पूर्वप्रधानमन्त्री विभिन्न समयमा जेल परेका थिए। तर अटक जेलमा राखिएका खान नै प्रथम पूर्वप्रधानमन्त्री हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
