काठमाडौं- नेकपा माओवादी केन्द्रको केन्द्रीय समितिको बैठकको दोस्रो दिन केन्द्रीय सदस्यहरुले पार्टी नेतृत्वको आलोचना गरेका छन्। अधिकांश सदस्यहरुले पार्टी नेतृत्वको कार्यशैलीप्रति आलोचना गर्दै त्यसमा सुधार नगर्ने हो भने पार्टी नै सकिने चेतावनीसमेत दिए।
बिहीबारको बैठकमा वरिष्ठ उपाध्यक्ष नारायणकाजी श्रेष्ठ र उपाध्यक्ष तथा प्रवक्ता कृष्णबहादुर महरासहित ५६ जनाले धारणा रााखेका थिए।
केन्द्रीय सदस्य रामप्रसाद सापकोटा दीपशिखाले पार्टी निरन्तर ओरालो लागेको भन्दै अब योभन्दा ओरालो लाग्ने ठाउँ नरहेको बताएका थिए। ‘अब पार्टी बनाउने, क्रान्तिकारी बनाउने। अब ३२ सिटभन्दा मुनि झर्ने ठाउँ छैन। सिद्धियो झर्ने ठाउँ। अब उकालो लाग्ने हो’, उनको भनाइ थियो।
लेखनाथ न्यौपानेले माओवादी केन्द्रको वैचारिक र व्यवहारिक पक्ष लथालिंग भएको बताएका थिए। उनले संसदीय राजनीतिमा लागेर पार्टी बलियो नहुने बरु विचलित हुने बताएका थिए। अर्का सदस्य शिवराम यादवले नेताहरुले आफ्नै छोराछोरीलाई सचिवालयमा राखेका कारण उनीहरुकै जयजयकार गर्नुपर्ने अवस्था आएको बताएका थिए।
बुधबारको बैठकमा बोल्ने नेताहरुले पनि सचिवालयमा छोरी-भतिजा राखिएको भन्दै आलोचना भएको थियो। एक जना सदस्यले त डिलिङमा सजिलो हुने भएकाले त्यस किसिमको सचिवालय गठन गरिएको भन्दै आशंकायुकक्त असन्तुष्टि पोखेका थिए। बिहीबारको बैठकमा अर्का एक सदस्य विष्णु भट्टले नेतृत्वले छोराछोरीको मात्रै विश्वास गरेको बताएका थिए।
बैठकपछि सञ्चारकर्मीसँग कुरा गर्दै केशवराज कुँवरले नेताहरुको कार्यशैलीमा सुधार गर्नुपर्ने बताए। उनले पार्टीलाई बहुपदमा लगिएको उल्लेख गर्दै नेताहरुले सामूहिकतामा विश्वास गर्नुपर्ने बताए।
कतिपय सदस्यले पार्टी नेतृत्व दलालहरुको घेरामा रहेको, पार्टी यथास्थितिवादी भएको, नेताहरुले अपारदर्शी जीवनशैली अपनाएको, व्यक्तिवादी जीवनशैली रहेको आरोप लगाएका थिए। केन्द्रीय सदस्य लक्ष्मण पन्तले त अहिले बालुवाटार नै सामन्तवादको नयाँ किल्ला बनेको भन्दै कटाक्ष गरेका थिए। समग्रमा सदस्यहरुले नेतृत्वकै कारण पार्टी रुपान्तरण र सुधारको सम्भावना कम रहेको बताएका थिए। नेतृत्वको नसुध्रिने हो भने पार्टीको रुपान्तरण पनि हुन नसक्ने उनीहरुको भनाइ थियो।
‘पार्टीमा नेतृत्वसहितको रुपान्तरणको विषय उठेको छ। सबैको कार्यशैलीमा सुधारको आवश्यकता छ’, बिहीबारको बैठकपछि एक नेताले भने, ‘करिबकरिब सबै केन्द्रीय सदस्यले यो कुरा उठाउनुभएको छ।’
केन्द्रीय सदस्य माधव सापकोटाले पार्टीको आन्तरिक जीवनलाई सुदृढीकरण गर्ने, पार्टीको जीवनलाई गतिशील तुल्याउने बारेमा बैठकमा ज्यादा कुरा उठेको बताए। ‘खासगरी हाम्रो संगठनात्मक संरचना अलि बढी भद्दा प्रकृतिको भएको र त्यसले गर्दा पार्टी जीवन्त भएनन् भन्ने कुरा उठेको छ। त्यसले गर्दा राम्रो ढंगले कार्यसम्पादन गर्न सकेन भन्ने कुरामा केन्द्रित भएर कुराहरु आएका छन्’, उनले भने, ‘मूलतः पार्टीलाई विधि र पद्धतिमा लैजाने बारेमा कुरा आएका छन्।’
आफूले बैठकमा तलबाटै निर्वाचित भएर आउने व्यवस्था गर्नुपर्ने विषय राखेको र त्यसले पार्टीलाई सुल्टो दिशामा लैजाने उनको भनाइ छ। ‘निर्वाचित हुने पद्धतिलाई पनि विधिमा ढालेर लैजाऔं। तलैदेखिका अधिवेशनमा निर्वाचित हुने प्रणालीलाई अवलम्बन गरियो भने माथितिर हेर्ने प्रवृत्ति पनि सुल्टो दिशामा फर्किन्छ। किनभने भोलि कार्यकर्ताको भोट चाहिन्छ। कार्यकर्ताप्रति जवाफदेही हुनुपर्छ। अहिले नेताले तोकिदिने भएपछि नेतातिर फर्किने र नेतातिर धाउने पार्टी संरचना भएको छ’, उनले बैठकमा राखेको धारणा दोहोर्याए।
रामनारायण बिडारीले बैठकमा पार्टीका नेताहरु तल्लो कमिटीबाट निर्वाचित भएर आउनुपर्ने कुरा जोडदार रुपले उठिरहेको बताए। उनले पार्टी टाठाबाठा र हुनेखानेको मात्रै भएको भन्दै उनले किसान र मजदुरको पार्टी बनाउनुपर्नेमा जोड दिए।
बुधबारको बैठकमा गृहमन्त्री तथा माओवादी केन्द्रका वरिष्ठ उपाध्यक्ष नारायणकाजी श्रेष्ठले भ्रष्टाचारी पार्टीकै भए पनि नछाड्ने बताएका थिए। बैठकमा धारणा राख्दै उनले अध्यक्ष पुष्पकमल दाहाल प्रचण्डकै सल्लाहमा आफू अघि बढेको बताएका थिए। ‘भ्रष्टाचारविरोधी अभियान अध्यक्षसँगकै सल्लाहमा सुरु गरिएको हो। यो रोकिँदैन। पार्टीकै नेताहरु भए पनि छाडिँदैन’, उनको भनाइ उद्धृत गर्दै एक सदस्यले जानकारी दिए।
पार्टी पार्टी जस्तो नभएको त स्वयं अध्यक्ष प्रचण्डले पनि बताइसकेका छन्। बुधबारको बैठकको उद्घाटन सम्बोधनमा उनले आफूहरुसँग नेता र कार्यकर्ताको विशाल पंक्ति भएता पनि पार्टी भने पार्टी जस्तो नभएको बताएका थिए। बैठकमा मौखिक प्रतिवेदन पेश गर्दै उनले पार्टी बनाउन नसक्ने हो भने विघटन गरौं भन्ने पुरानै प्रस्ताव दोहोर्याएका थिए। र आफूबाट केही गल्ती भएकाले सच्याउने प्रतिबद्धता पनि उनको थियो। जुन उनले दोहोर्याइरहने बाचा हो।
बिहीबारको बैठकपछि पार्टी उपाध्यक्ष कृष्णबहादुर महराले अध्यक्ष प्रचण्डको प्रतिवेदनप्रति मूलभूत रुपमा सबैले समर्थन गरेको बताए। ‘प्रतिवेदनको भावना अनुसारको व्यवहार पनि हुनुपर्यो भन्ने छ’, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
