काठमाडौं- नेपाल नर्सिङ काउन्सिलको नाम दर्ता (लाइसेन्स) परीक्षाको प्रश्नपत्र आउट प्रकरणमा १२ जना विरुद्ध मुद्दा चलाइएको छ।
काउन्सिलले असार २३ गते लिएको परीक्षामा सिद्धार्थ बनस्थली स्कुलमा रहेको परीक्षा केन्द्रबाट तीन जना विद्यार्थीले प्रश्नपत्र खिचेर बाहिर पठाएको फेला पारेपछि प्रहरीले तीन जनालाई नियन्त्रणमा लिएको थियो। त्यतिबेला धादिङको त्रिपुरासुन्दरी गाउँपालिका–३ घर भएकी २३ वर्षीया सविना आले मगर, कास्कीको पोखरा महानरपालिका–२५ घर भएकी २० वर्षीया समीक्षा थापा, पोखरा–१६ कै २० वर्षीया भावना गुरुङ पक्राउ परेका थिए।
प्रश्नपत्र आउट गरेको पाइएपछि प्रहरी वृत्त बालाजुको टोलीले उनीहरुलाई पक्राउ गरेको थियो। उनीहरुले प्रश्नपत्र खिचेर बाहिर पठाउनुका साथै सामाजिक सञ्जालमा हालेको पाइएको थियो। उनीहरुलाई थप अनुसन्धानका लागि भन्दै वृत्त बालाजुले परिसर काठमाडौंमा पठाएको थियो।
परिसरले २५ दिनसम्म गरेको अनुसन्धानको क्रममा थप ९ जनाको संलग्नता देखिएपछि उनीहरुलाई पनि प्रतिवादी बनाएर मुद्दा दायर गरिएको परिसरले जनाएको छ। ९ जना भने फरार भएकाले उनीहरुलाई फरार प्रतिवादी बनाइएको छ।
फरार प्रतिवादी हुनेहरुमा गोरखाको शहीद लखन गाउँपालिका–६ घर भएकी ३५ वर्षीया सनसरी श्रेष्ठ, पोखरा–१४ कि २३ वर्षीया सुस्मिता रानाभाट, बाग्लुङको गलकोट नगरपालिका–१ घर भएकी २२ वर्षीया धनुष विश्वकर्मा, बागलुङ नगरपालिका–१४ घर भएकी २३ वर्षीया सुष्मा पौडेल, अर्घाखाँचीको मालारानी गाउँपालिका–६ घर भएकी १९ वर्षीया रोजिना काउछा मगर, कास्कीको माछापुच्छे गाउँपालिका–७ घर भएकी १८ वर्षीया अस्मिता विश्वकर्मा, कास्कीको अन्नपूर्ण गाउँपालिका–९ घर भएकी २० वर्षीया निशा पुन, पोखराकी २४ वर्षीया श्रेया पहारी र तनहुँको शुक्लागण्डकी नगरपालिका–१ की २३ वर्षीया सृष्टि तिमिल्सिना छन्।
यी १२ जना प्रतिवादी विरुद्ध नै विद्युतीय कारोबार ऐन अन्तर्गतको कसुरमा जिल्ला अदालत काठमाडौंमा मुद्दा दर्ता गरिएको छ। उनीहरुले भाइबरमा ‘एप्पल आई र बनाना आईआई’ नामको ग्रुप बनाई प्रश्नपत्र उक्त ग्रुपमा पठाएका थिए। त्यसपछि उनीहरुले अलब्राइटको नामबाट उत्तर तयार गरी सोही ग्रुपमा पठाउने गरेको र उत्तरपुस्तिकामा सार्ने गरेको पाइएको प्रहरी अनुसन्धानबाट खुलेको छ।
पक्राउ परेकी सविना आलेको बयान- आत्तिनु पर्दैन उत्तर समेत भाइबरमा आउँछ भनिएको थियो
नेपाल नर्सिङ परिषद्बाट लिने नर्सिङ लाइसेन्स (नाम दर्ता) परीक्षा असार २२ गते काठमाडौंमा हुने जानकारी पाएपछि पोखरामा नै रहेको अलब्राइट एकेडेमीबाट मैले पनि उक्त परीक्षामा सहभागी हुन फारम भरेको थिएँ।
त्यसपछि म असार २१ गते काठमाडौं आई नयाँ बसपार्कको एक होटलमा बसेँ। असार २२ गते अलब्राइट एकेडेमी पोखराबाट आउनुभएकी सनिषा श्रेष्ठ समेत बसेको उक्त होटलमा आई मेरो परीक्षा केन्द्र सिद्धार्थ बनस्थली स्कुलमा तोकिएको जानकारी गराइन्।
म लगायत परीक्षामा सहभागी हुन आएका अन्य साथीहरुलाई समेत परीक्षामा आत्तिनु पर्दैन, मोबाइलको भाइबरमा ‘एप्पल आई र बनना आईआई’ नामको ग्रुप बनाई सबै जना ज्वाइन भएर प्रश्नपत्रको फोटो खिची भाइबरमा पठाउनु, उक्त प्रश्नपत्रको उत्तर लेखी पठाइदिनेछौं भनेका थिए।
असार २३ गते बिहान ९ बजे सिद्धार्थ बनस्थली स्कुलस्थित परीक्षा केन्द्रमा पुग्दा मलाई पेट दुखेकोले मैले मेरो साथमा रहेको मोबाइल अलब्राइट एकेडेमी पोखराबाट आएको भनी बताउने मैले नचिनेको यकिन नाम, थर, वतन र सम्पर्क नम्बर थाहा नभएको महिला परिक्षार्थीलाई राख्न दिएको थिएँ।
उनले मेरो मोबाइलको स्क्रिन लगको पासवर्ड समेत मागेकोले मैले पासवर्ड समेत उनलाई दिएको थिएँ। म ट्वाइलेटबाट फर्केर आउँदा उनले मेरो मोबाइल लिने व्यक्ति उक्त स्थानमा नभएको र वरपर हेर्दा नदेखेकाले परीक्षा हलमा प्रवेश गर्ने समय पनि भएकोले म मोबाइल नलिई उक्त परीक्षा केन्द्रको कोठा नम्बर १०५ मा छिरे।
परीक्षाको समय सकिनुभन्दा केही समय अगाडि परीक्षा अनुगमनको लागि नेपाल नर्सिङ परिषद्बाट खटिई आउनुभएका सरहरुले मलाई अफिसमा बोलाई लिई गएकोमा परीक्षामा सहभागी भएकी भावना गुरुङ पनि उक्त अफिसमा थिइन्।
उनको मोबाइलमा मेरो मोबाइलको भाइबरमा रहेको फोटो मलाई देखाई समीक्षा थापा र मेरो मोबाइलको भाइबरबाट समेत र ‘एप्ल आई र बनना आईआई’ गु्रपमा अलब्राइट फोनक्स र श्रीया नामको आईडी समेतबाट उक्त नर्सिङ लाइसेन्स परीक्षाको प्रश्नपत्रहरु पठाएको र उक्त प्रश्नहरुको उत्तर समेत एक आपसमा ग्रुप सेयर गरी परीक्षाको मर्यादा विपरीतको कार्य गरेको भनी भावना गुरुङ, समीक्षा थापा र मलाई समेत प्रहरीले पक्राउ गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
