काठमाडौं- नेकपा माओवादी केन्द्रको केन्द्रीय समितिको चौथो बैठक बुधबारबाट सुरु भएको छ। काठमाडौंको प्रज्ञा प्रतिष्ठानमा सुरु भएको बैठक आइतबारसम्म चल्ने बताइएको छ।
बैठकमा केन्द्रीय समितिमा ३८५ जना सदस्य, वैकल्पिक केन्द्रीय सदस्य १९६ जना, माओवादी केन्द्रले निर्धारण गरेको १० प्रदेशका पदाधिकारी ९० जना, तीन वटा आयोग (अनुशासन, लेखा र निर्वाचन) का ४१ जना सदस्यहरु सहभागी भएको महासचिव देव गुरुङले बताए।
बुधबार दिउँसो १ बजे सुरु भएको केन्द्रीय समिति बैठकको उद्घाटन सम्बोधन गर्दै अध्यक्ष पुष्पकमल दाहाल प्रचण्डले पार्टी पार्टीजस्तो नभएको भन्दै बैठकबाट पार्टी पुनर्निर्माणको ऐतिहासिक अभियान सुरु गर्नुपर्ने बताए। सरकारले गरिरहेको कामले जनतामा नयाँ आशा पलाएको उनको भनाइ थियो।
बुधबारको बैठकमा अध्यक्ष प्रचण्डले राजनीतिक र सांगठनिक प्रतिवेदन पेश गरेका छन्। त्यसक्रममा प्रचण्डले पार्टी सदस्य संख्या सात लाख ५२ हजार ९५६ रहेको विवरण प्रस्तुत गरेका थिए।
प्रदेशगत रुपमा माओवादी सदस्य बागमती प्रदेशमा सबैभन्दा बढी १ लाख ४७ हजार ९५६ जना छन्। त्यस्तै, मधेश प्रदेशमा एक लाख १६ हजार ९७५, लुम्बिनी प्रदेशमा एक लाख १२ हजार ९१०, कोशी प्रदेशमा ९९ हजार ६०१, कर्णाली प्रदेशमा ८५ हजार ७७४, सुदूरपश्चिम प्रदेशमा ८० हजार ४८२, गण्डकीमा ६६ हजार ६८७ सदस्य छन्। सम्पर्क समितिहरूमा १९ हजार ३१२, उपत्यकामा १८ हजार ३२५ र प्रवासमा ५ हजार ५३७ जना कार्यकर्ता रहेको प्रचण्डको प्रतिवेदनमा उल्लेख छ।
त्यस्तै प्रचण्डले केन्द्रीय समितिको आकार ४०९ बनाउने प्रस्ताव गरेका छन्। अहिले सो पार्टीको केन्द्रीय समितिमा ३८५ जना छन्। समावेशिताका अनुसार २४ जना महिला सदस्य थपेर ४०९ पुर्याउने प्रस्ताव गरिएको हो। त्यसका लागि बुधबारको बैठकबाट विधान संशोधन भइसकेको छ।
प्रचण्डले 'जनतासँग पार्टी' अभियान पनि प्रस्तुत गरेका छन्। पार्टी सुदृढीकरण अभियान भनिएको यस अभियान हरेक वडासम्म पुग्नेछ। भदौ, असोज र कात्तिक महिनाभर अभियान चल्नेछ। केन्द्रीय सदस्य माधव सापकोटाका अनुसार, तीन महिनाको अभियान सञ्चालन गरेर विधान सम्मेलन गर्ने र विधान सम्मेलनबाट पार्टीलाई चुस्त दुरुस्त व्यवस्थित तुल्याउने भन्ने प्रस्ताव प्रचण्डले राखेका छन्।
उनले पार्टी वरिष्ठ उपाध्यक्ष र उपाध्यक्षहरुलाई ३२ विभागको जिम्मेवारी, महासचिव र उपमहासचिवलाई जनवर्गीय संगठनको जिम्मेवारी र सचिवहरुलाई प्रदेशको समन्वयको जिम्मेवारी दिने प्रस्ताव पनि प्रस्तुत गरेका छन्।
सम्बोधन क्रममा प्रचण्डले गठबन्धन थप बलियो हुँदै गएको बताएका थिए। उनले सरकारले भ्रष्टाचार विरोधी अभियान सुरु गरेको बताएका थिए। सरकार छाड्नुपरे पनि सो अभियान नछाड्ने उनको भनाइ थियो।
प्रचण्डले प्रस्तुत गरेको प्रतिवेदन सहभागी सदस्यहरुलाई दिइएको छैन। उनको मौखिक प्रतिवेदन सुनेकै भरमा सदस्यहरुले धारणा राख्ने क्रम सुरु भएको छ। बुधबारको बैठकमा १८ जना केन्द्रीय सदस्यले धारणा राखेको सापकोटाले जानकारी दिए।
प्रत्येक सदस्यलाई बोल्नका लागि पाँच मिनेट समय उपलब्ध गराइएको छ। निर्धारित समयपछि माइक अफ हुनेछ।
बैठकलाई लाइभ गर्ने भनेर केही दिनअघिको पदाधिकारी बैठकले निर्णय गरेता पनि अन्तिम समयमा सो निर्णयबाट पार्टी पछि हटेको थियो। केन्द्रीय समिति सुरु हुनुअघि बुधबार बिहान बसेको स्थायी समिति बैठकले लाइभ नगर्ने निर्णय लिएको थियो। सापकोटाले बैठकलाई लाइभ गर्दा बैठककै मूल आत्मा मारिने भएकाले लाइभ नगर्ने निर्णय गरेर ठीक गरिएको बताए। उनले पार्टीको बैठक भनेको नितान्त आन्तरिक र घरायसी छलफल भएको बताए।
भोलि बिहान ११ बजे पुन बैठक बस्नेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
