काठमाडौं- नेकपा माओवादी केन्द्रको केन्द्रीय समितिको आकार बढ्ने भएको छ। बुधबार दिउँसो १ बजे प्रज्ञा प्रतिष्ठानको भवनमा सुरु हुने बैठकले सदस्य संख्या बढ्ने गरी विधान संशोधन गर्न लागिएको उपाध्यक्ष कृष्णबहादुर महराले जानकारी दिए।
‘केन्द्रीय समिति निर्माणमा विधान विपरीत काम भएका छन् केही’, आज बुधबारको स्थायी समिति बैठकपछि महराले भने, ‘त्यसकारण आज विधान संशोधन गरेर भोलिदेखि थप केही महिला, युवा र छुटेका सिनियर साथीहरुलाई ल्याउने कुरा भएको छ।’
उनका अनुसार, बुधबार थपिने केन्द्रीय सदस्यले बिहीबारदेखि मात्रै बैठकमा भाग लिन पाउने छन्। ‘को ल्याउने कुराचाहिँ भएको छैन’, महराले भने, ‘विधान संशोधन हुन्छ।’
पार्टी महाधिवेशनमा माओवादी केन्द्रका केन्द्रीय सदस्य २९९ हुने तय भएको थियो। तर, त्यसपछिका बैठकमा अध्यक्ष प्रचण्डले उनकै शब्दमा फरकफरक गोजीबाट केन्द्रीय सदस्यको सूची प्रस्तुत गरेका कारण कति जना केन्द्रीय सदस्य पुगे भन्ने अन्योल उत्पन्न भएको थियो।
बुधबारदेखि सुरु हुने केन्द्रीय समिति बैठकका लागि भनेर तयार गरिएको विवरणमा भने ३८५ सदस्य रहेको बताइएको छ। त्यसका अतिरिक्त १९८ जना वैकल्पिक केन्द्रीय सदस्य पनि छन्।
केन्द्रीय समिति बैठकमा नियमित र वैकल्पिक केन्द्रीय सदस्यका अतिरिक्त तीन वटा आयोगका ७५ जना र दश वटा प्रदेशका १०० जना पदाधिकारी पनि सहभागी हुनेछन्।
केन्द्रीय समिति बैठकअघि बुधबार बिहान पदाधिकारी बैठक र स्थायी समिति बैठक बसेको थियो। स्थायी समिति बैठकमा अध्यक्ष प्रचण्डले ब्रिफिङ गरेका थिए।
केन्द्रीय समिति बैठकमा अध्यक्षले राजनीतिक र सांगठनिक प्रतिवेदन पेस गर्नेछन्। उनले सरकारको कामकारबाही, पार्टीको स्थिति, अब के गर्ने भन्ने जस्ता विषय उनले प्रतिवेदनमा उल्लेख गर्नेछन्।
‘त्यसपछि केन्द्रीय सदस्यहरुले बोल्ने क्रम सुरु हुन्छ’, महराले भने, ‘बोल्ने समय कम बनाएर सकेसम्म सबैले बोल्ने परिपाटी मिलाउनुपर्छ भन्नेमा छौं।’
केही दिनअघि बसेको माओवादी केन्द्रको पदाधिकारी बैठकले केन्द्रीय समिति बैठक लाइभ गर्ने भनेको थियो। तर, बुधबार बिहानको स्थायी समिति बैठकले लाइभ नगर्ने निर्णय लिएपछि सो बैठक लाइभ नहुने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
