काठमाडौं– सर्वोच्च अदालतको फैसलाले मुख्यमन्त्री गुमाएका नेपाली कांग्रेसका संसदीय दलका नेता उद्धव थापा कोशी प्रदेशको मुख्यमन्त्री पुन: नियुक्त भएका छन्।
उनी नियुक्त भएसँगै प्रमुख प्रतिपक्षको भूमिकामा नेकपा एमाले पुगेको छ। थापाले ४७ सांसदको बहुमतसहित प्रदेश प्रमुख पर्शुराम खापुङ समक्ष दाबी पेस गरेका थिए।
बहुमतसहित दाबी आएपछि प्रदेश प्रमुखले उनलाई नियुक्ति दिँदै पुन: मुख्यमन्त्रीको जिम्मेवारी दिएका छन्। उनले आजै सानो आकारको मन्त्रीमण्डल पनि विस्तार गर्ने तयारी गरेका छन्। सर्वोच्च अदालत पुगेर अघिल्लो नियुक्ति बदर गराएको एमाले भने सत्ता बाहिर परेको छ।
प्रदेश सभामा ४० सिटसहित पहिलो दल भए पनि उसले सरकारका लागि आवश्यक ४७ सांसद जुटाउन सकेन। एमाले र राप्रपा मिल्दा ४६ सांसद मात्र भएका थिए। प्रतिपक्षमा पुगे पनि आगामी दिनमा प्रदेश सभामा आफूहरुको भूमिका हुने एमाले संसदीय दलका सचेतक रेवतीरमण भण्डारीले बताए।
उनले मुख्यमन्त्री थापा कसरी प्रदेश सभामा अघि बढ्छन् आफूहरुले त्यो हेरेर आगामी कदम चाल्ने बताए। त्यस्तै सभामुख बाबुराम गौतमले राजीनामा दिएकाले अब प्रदेशसभा सञ्चालनको जिम्मा उपसभामुखको काँधमा आएको छ।
नेकपा एमालेबाट निर्वाचित उप–सभामुख सिर्जना दनुवारले आगामी दिन सभामुखको भूमिका निर्वाह गर्नुपर्ने छ। अर्को सभामुख चयन नभएसम्म संसद्को सम्पूर्ण जिम्मेवारी उपसभामुखको काँधमा आएकाले उनको भूमिका कस्तो हुन्छ भनी सोधिएको प्रश्नमा भण्डारीले उपसभामुखले आफ्नो जिम्मेवारी पूरा गर्ने बताए।
उक्त प्रदेशमा एमालेले अध्यादेशबाट बजेट ल्याएको थियो। उक्त बजेटलाई प्रतिस्थापन विधेयकको रुपमा पेस गर्नुपर्ने छ भने ३० दिनभित्र नव नियुक्त मुख्यमन्त्री थापाले विश्वासको मत लिनुपर्ने छ।
उक्त अवधिमा विश्वासको मत पाउन नसकेमा थापाले मुख्यमन्त्री पद गुमाउने छन्। उक्त अवस्थामा सर्वोच्चको फैसला अनुसार धारा १६८को उपधारा ३ को प्रक्रिया स्वत: अघि बढ्छ। उक्त उपधारा अनुसार एमाले पहिलो दल भएकाले मुख्यमन्त्री पाउने छ। एमाले यही धारामा पुर्याएर सरकार बनाउँदै बहुमत पुर्याउने रणनीतिमा छ। उसका लागि बहुमतका पुर्याउन एक सिटको कमी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791358722.jpg)
-1791356368.png)
-1786602170.png)
