काठमाडौं– प्रतिनिधि सभाको बैठक आज (मंगलबार) बस्दै छ। बैठक मंगलबार दिउँसो १ बजे बस्ने गरी कार्यसूची तय भएको छ।
यसअघि सोमबार बस्ने भनिएको बैठक बस्दै नबसी स्थगित भएको थियो। सभामुख देवराज घिमिरेको निर्देशमा सूचना टाँस गरेर बैठक मंगलबार दिउँसो १ बजेका लागि सारिएको थियो।
पछिल्लो समय १ क्विन्ट सुन तस्करीको विषयलाई लिएर प्रमुख प्रतिपक्षी दल नेकपा एमालेले सदनमा अवरोध पुर्याउँदै आएको छ। एमालेले सुन तस्करी प्रकरणको छानबिनका लागि उच्चस्तरीय समिति गठन गरिनुपर्ने बताउँदै आएको छ।
सरकारले भने अपराध अनुसन्धानका लागि स्थापित नियकाबाटै अनुसन्धान हुने बताउँदै आएको छ। यसअघि पनि सुन तस्करी प्रकरण लगायतका अपराध अनुसन्धानमा उच्चस्तरीय समिति बनेको, तर त्यस्ता समितिको अनुसन्धानले प्रतिफल दिन नसकेकाले राज्यका स्थापित निकायबाटै अनुसन्धान हुने सरकार पक्षको दाबी छ।
त्रिभुवन अन्तर्राष्ट्रिय विमानस्थलको भन्सारबाट जाँचपास भएको झन्डै १०० किलो सुन राजस्व अनुसन्धान विभागको टोलीले साउन २ गते भन्सार कार्यालयको गेट बाहिरबाट बरामद गरेको थियो। मोटरसाइल र स्कुटरको ब्रेक सुमा मोरेर ल्याइएको सुन ट्याक्सीमा राखेर गन्तव्यतर्फ लैजाँदै गर्दा विभागको टोलीले बरामद गरेको थियो।
विभागले उक्त सुन तस्करी प्रकरणमा अनुसन्धान जारी राखेको छ। हालसम्म १८ जना पक्राउ परेका छन्।
एमालेले भने साउन १० गतेको प्रतिनिधि सभा बैठकमा नै सुन तस्करी प्रकरणको अनुसन्धानका लागि उच्चस्तरीय समिति गठन गरिनुपर्ने माग गर्दै वेल घेराउ गरेको थियो। जसकारण साउन १० गतेको बैठक नियमित कार्यसूचीमा प्रवेश नगरी स्थगित भएको थियो।
अन्तर्राष्ट्रिय विमानस्थलको सुरक्षा र भन्सार जाँच पास गरेर सुन बाहिरिनुले सरकारकै संलग्नतामा सुन तस्करी भइरहेको भन्ने देखिएको एमालेको आरोप छ। एमालेले उपप्रधान तथा गृहमन्त्री नारायणकाजी श्रेष्ठ र अर्थमन्त्री प्रकाशशरण महतले त्यसको नैतिक जिम्मेवारी लिनुपर्ने पनि बताउँदै आएको छ।
सदन सञ्चालनको विषयलाई लिएर प्रधानमन्त्री पुष्पकमल दाहाल प्रचण्डले सोमबार एमाले अध्यक्ष केपी शर्मा ओलीसँग छलफल गरेका थिए। बालुवाटारमा भएको छलफलका क्रममा गृहमन्त्री श्रेष्ठले जवाफ दिने र एमालेले सदन सञ्चालन गर्न दिने भन्ने सहमति भएको बताएको थियो।
तर, पछि एमाले नेताहरुले उच्चस्तरीय समिति गठनको मागलाई छाड्न नसकिने बताएपछि सहमति भाँडिएको बताइएको थियो। जसकारण सोमबारका लागि तय भएको प्रतिनिधि सभा बैठक बस्न सकेन।
यसअघि सोमबार बस्ने भनिएको बैठकका सम्भावित ५ वटा कार्यसूची थिए। सोमबार बैठक नबसेका कारण उक्त दिनका लागि तय भएका सम्भावित कार्यसूची मंगलबारलाई सर्ने संघीय संसद् सचिवालयले जनाएको छ।
सोमबारको बैठकमा सभामुख देवराज घिमिरेले प्रतिनिधि सभा सदस्य टोपबहादुर रायमाझी निलम्बनमा परेको जानकारी गराउने सम्भावित कार्यसूची थियो। नेकपा एमालेका नेता रायमाझी नक्कली भुटानी शरणार्थी प्रकरणमा संलग्न रहेको अभियोग लागेर मुद्दाको पुर्पक्षका लागि थुनामा छन्।
सोमबारको बैठकमा सभामुख घिमिरेले राष्ट्रपतिको कार्यालय र प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएकोसम्बन्धी छुट्टा–छुट्टै पत्रहरुको व्यहोरा पढेर सुनाउने कार्यसूची थियो।
यस्तै, कानुन, न्याय तथा संसदीय मामिलामन्त्री धनराज गुरुङले मन्त्रिपरिषद्को निर्णयबाट आयोगको कार्यावधिक थप गर्ने गरी जारी भएको आदेश बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ को उपदफा (२) बमोजिम सदनसमक्ष पेस गर्ने सम्भावित कार्यसूची थियो।
शिक्षा, विज्ञान तथा प्रविध मन्त्री अशोक कुमार राईले राष्ट्रिय सभामा उपत्पत्ति भएको ‘नेपाल विश्वविद्यालय विधेयक २०८०’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्ने पनि सोमबारको सम्भावित कार्यसूची थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
