काठमाडौं– प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच आइतबार र सोमबार प्रधानमन्त्री निवास बालुवाटारमा छलफल भयो। प्रधानन्यायाधीश सिफारिस गर्न संवैधानिक परिषद्को बैठक बोलाउन र संसद्लाई सहज ढंगले सञ्चालन गर्न बैठकमा छलफल भएको बताइएको छ। तर समय सन्दर्भले भने अन्य विषयमा ‘समझदारी’को आशंका उत्पन्न गरेको छ। त्यो विषय हो- सुन काण्ड।
साउन २ गते राति हङकङबाट आएको एक विमानमा स्कुटरको ‘ब्रेक सु’को आवरणमा झन्डै एक क्विन्टल सुन पनि आयो। त्रिभुवन विमानस्थलभित्रको सबै प्रणाली पार भएर सिनामंगल ल्याइएपछि सो सुन राजश्व अनुसन्धान विभागको टोलीले बरामद गर्यो। यसमाथि अनुसन्धान भइरहेको छ।
यस प्रकरणमा एमाले अध्यक्ष केपी शर्मा ओलीको प्रतिक्रियाले धेरैलाई अचम्मित तुल्याएको छ। साउन ८ गते कम्बोडिया भ्रमणबाट फर्किएपछि त्रिभुवन विमानस्थलमा सुन प्रकरणमा शंका गरिएका अमुक व्यापारीको बचाउमा उत्रिएको भान पर्नेगरी अभिव्यक्ति दिएका थिए। र गृहमन्त्री श्रेष्ठप्रति असन्तुष्टि व्यक्त गरेका थिए।
अर्कोतिर, सुन प्रकरणमा केही माओवादी नेताहरुको पनि नाम जोडिएको छ। खासगरी सुन तस्करीमा संलग्न भएको आरोपमा दावा छिरिङ पक्राउ परेपछि माओवादी नेताहरुसँग उनको सम्बन्धको खुलासा भइरहेको छ। फोटो तथा भिडिओहरु सार्वजनिक भइरहेको छ। सुन प्रकरणमा दोषीलाई नछाड्ने भन्दै आएका गृहमन्त्री नारायणकाजी श्रेष्ठमाथि दबाब बढेको छ।
सुन प्रकरणमा एमालेले गृहमन्त्री श्रेष्ठ र अर्थमन्त्री प्रकाशशरण महतप्रति असन्तुष्टि व्यक्त गर्दै नैतिकताका आधारमा राजीनामा दिनुपर्ने बताइरहेको छ नै, यो प्रकरणमाथि छानबिन गर्नका लागि उच्चस्तरीय छानबिन समिति गठनको माग पनि गरेको छ। उनीहरुको संलग्नता र सेटिङबिना सुन विमानस्थलबाट बाहिरिन सम्भव नभएको भन्दै उसले छानबिन समिति गठन नगरेसम्म सदन चल्न नदिने बताइरहेको छ।
यही पृष्ठभूमिमा प्रधानमन्त्री प्रचण्ड र एमाले अध्यक्ष ओलीबीच भेट भएको हो। दुई शीर्ष नेताहरुबीचको औपचारिक र अनौपचारिक कुराकानीको विस्तृत विवरण त सार्वजनिक हुँदैनन् तर यस्ता भेटले सुन प्रकरणको अनुसन्धान फासफुस हुने हो कि भन्ने आशंका भने सिर्जना भएको छ।
यसअघि गत वैशाखमा नेपाली नागरिकलाई नक्कली भुटानी शरणार्थी बनाएर अमेरिका लैजाने गिरोहलाई सहयोग गरेको र लाभ लिएको आरोपमा एमाले सचिव टोपबहादुर रायमाझीविरुद्ध पक्राउ पुर्जी जारी भएको थियो। त्यस्तै, कांग्रेसका शीर्ष नेताहरुमाथि पनि आशंका गरिएको थियो। पछि त पूर्वगृहमन्त्री बालकृष्ण खाण पक्राउ नै परे।
वैशाख २० मा रायमाझीविरुद्ध पक्राउ पुर्जी जारी भएपछि भोलिपल्टै एमाले अध्यक्ष ओली प्रधानमन्त्री प्रचण्डलाई भेट्न सिंहदरबारस्थित प्रधानमन्त्री कार्यालय पुगे। उनी वैशाख २३ मा पनि उनीहरुबीच भेट भयो। कांग्रेसका नेताहरु र खासगरी आफ्नै पत्नी आरजु राणामाथि पनि पक्राउ पुर्जी जारी हुने चर्चाबीच भेटघाटमा कांग्रेस सभापति शेरबहादुर देउवा पनि जोडिए। तीन नेताहरुबीच वैशाख २६, २७ र ३१ मा भेट भएको थियो।
त्यतिबेला पनि संसद्लाई प्रभावकारी बनाउने लगायतका विषयमा छलफल केन्द्रित रहेको बताइयो। तर, आशंका भने शरणार्थी प्रकरणसँगै जोडेर गरिएको थियो। यो आशंकालाई एमालेका संसदीय दलका उपनेता सुवास नेम्वाङले शीर्ष नेताहरुलाई नै सुनाइदिएको बताएका थिए।
वैशाख ३१ मा सचेतकहरु समेतको भेटपछि नेम्वाङले प्रतिक्रिया दिएका थिए, ‘प्रसंगवश यो विषय (शरणार्थी प्रकरण) उठेको थियो, वर्तमान अवस्था, तपाईंहरु तीन नेता त बस्ने बित्तिकै भुटानी शरणार्थीको बारेमा छलफल गर्न बस्यो, भनेर चर्चा हुन्छ के हो भनेर हाँस्दै सोध्ने मान्छे मै हो।’
आजकाल शरणार्थी प्रकरणका बारेमा खासै चर्चा हुँदैन। नयाँ काण्डको रुपमा सुन प्रकरण आएको छ। तर नेताहरुको भेट-शृंखला पनि सुरु भएको छ। रोचकचाहिँ के छ भने, अरु बेला दन्तबझान गर्ने र आरोप प्रत्यारोपमा उत्रिने नेताहरु काण्ड सार्वजनिक भइसकेपछि भने सौहार्दपूर्ण वातावरणमा भेट गर्ने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791356368.png)
-1786602170.png)
