काठमाडौं– उपप्रधान तथा गृहमन्त्री नारायण काजी श्रेष्ठले विपक्षीले माग्दैमा आफूले राजीनामा नदिने बताएका छन्।
बिहीबार महोत्तरीमा आयोजित एक कार्यक्रममा सम्बोधन गर्दै मन्त्री श्रेष्ठले भ्रष्टाचारविरुद्ध सरकारले काम गरिरहेकाले राजीनामा मागिएको र कसैले माग्दैमा आफूले पद नछाड्ने जिकिर गरे।
अहिलेको सरकारले सुशासन, समृद्धि र सामाजिक न्यायका लागि एक सूत्रीय कार्यक्रम बनाएको भन्दै उनले यस्ता कदमले विश्राम नलिने बताए।
अहिले भ्रष्टाचार र बेथितिविरुद्ध ठूल्ठूला अभियानहरु सरकारले सञ्चालन गरिरहेको छ। नक्कली भुटानी शरणार्थी प्रकरण, ललिता निवास प्रकरणसहित सबै प्रकरणको स्वतन्त्र र स्वच्छ अनुसन्धान गरेर दोषीलाई कारबाही गर्न पहलकदमी अगाडि बढाएका छौं। यस्ता कदमले विश्राम लिनेवाला छैन। अब पुग्यो भनेर सरकार बस्दैन।’
कसैले अब सरकार चुप बस्छ भनेर आशा गरेको भए त्यो नहुने मन्त्री श्रेष्ठको भनाइ थियो। उनले भ्रष्टाचारी, कमिसनखोर, तस्करी र अपराधीहरुकोविरुद्ध आफू अन्तिम बिन्दूसम्म अगाडि बढ्ने दाबी गरे।
साथै उनले प्रतिपक्षीतिर लक्षित गर्दै जसले भ्रष्टाचार र तस्करीविरुद्ध अभियान चलाइरहेको उसले नै पद छाडिदिनुपर्यो भनेर कोही कराइरहेको बताए।
‘ठान्नुभएको होला छाड्दिएदेखि त अब अरु तस्करी, भ्रष्टाचारी, बेथिति र विकृतिको डंगुर फेरि लगाउन पाइन्थ्यो। अहिलेको छानबिन प्रक्रिया रोकिन्थ्यो ठानेर कसैले भन्नुभएको छ भने म निवेदन गर्छु। त्यो दिन आउनेवाला छैन।’
मन्त्री श्रेष्ठले कसैलाई सहज बनाउनका लागि आफूहरुले अभियान र पद नछाड्ने जिकिर गरे। ललिता निवास, भुटानी शरणार्थी प्रकरण र सुन तस्करीबारे अन्तिमसम्म छानबिन गर्ने उनको भनाइ थियो।
उनले भने, ‘हामी छाड्नेवाला छैनौं। कसैलाई सजिलो बनाउन छाड्नेवाला छैनौं। हामी लतिता निवास, भुटानी शरणार्थी प्रकरण, सुन तस्करबारे पनि छानबिन अन्तिमसम्म पुर्याउँछौं। अनियमितता र कानूनको उल्लंघन भएको ठाउँमा कानुनको दायरामा ल्याउँछौं एकचोटी धम्काएपछि पछाडि जान्छ भन्ने कसैले नसोचे हुन्छ। हामी विचलित हुनेवाला छैनौं। जनता हाम्रो साथमा छन्। यो देशको मुहार फेराउन अगाडि बढाउने संकल्प हाम्रो साथमा छ।’
यस्तै उनले प्रतिपक्षी एमालेलाई जवाफ दिँदै आफू राजीनामा नदिने र गल्ती नगरेको मजाले निदाउनसमेत सुझाव दिए। आफ्नो निजी स्वार्थमा मात्र अस्तित्व देख्नेहरुले जनताको समर्थन र सत्यलाई देख्न नसकेको मन्त्री श्रेष्ठको भनाइ थियो।
उनले भने, ‘म अहिले नै भन्छु, तपाईंहरु सच्चिनुहोस्। अहिले पनि मौका छ। कोही कोही मान्छे सुत्दैनन् रे। मेरो के दोष भयो त? गल्ती नगरेको भए मजाले सुत्नु निदाउनू। तर, भ्रष्टाचार र अपराधमा साँच्चै संलग्न छ भने पनि सुत्ने ठाउँ छ। तपाईंहरुलाई आपराधिक क्रियाकलापमा संलग्न भएकाले निद्रा नलागेको हो भने आउनुस् प्रहरीमा आत्मसमर्पण गर्नुहोस्। हामी मजाले सुत्ने ठाउँ व्यवस्था गर्छौं। अब छाड्नेवाला छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
