धनगढी– सुदूरश्चिम प्रदेश सरकारमा सहभागिताका लागि दुई जनाको नाम मन्त्रीमा सिफारिस गरेको नागरिक उन्मुक्ति पार्टी आन्तरिक विवादका कारण प्रदेश सरकारमा सहभागी नै नहुने भएको छ।
नागरिक उन्मुक्ति पार्टीको संसदीय दलले एकलौटी ढंगले मन्त्री पदमा दुई जनाको नाम सिफारिस गरिएको भन्दै पार्टीका प्रदेश सभा सदस्यहरुबीच नै दुई धारमा विभाजित भए।
उक्त विवादले उग्र रुप लिएपछि पार्टीले प्रदेश सरकारमा सहभागी नै नहुने निर्णय गरेको छ। पार्टी अध्यक्ष रञ्जिता श्रेष्ठले केन्द्रबाट एक पत्र पठाउँदै मन्त्रालयको भागबण्डा नमिलेकाले सरकारमा सहभागी नहुने निर्णय भएको जानकारी गराएकी छन्।
उनको पत्र पछि पार्टीको आन्तरिक विवाद समाधानका लागि बस्न लागेको बैठक पनि बस्न सकेन। बैठकका लागि तयारीमा जुटेका नागरिक उन्मुक्ति पार्टीका प्रदेश सभा सदस्यहरु घरतिर लागेका छन्।
योसँगै नागरिक उन्मुक्तिलाई सरकारमा सहभागी गराएर प्रदेश मन्त्रिपरिषद् विस्तार गर्न लागेका मुख्यमन्त्री कमलबहादुर शाह अन्योलमा परेका छन्।मुख्यमन्त्री कमलबहादुर शाहले मंगलबार नै भूमि व्यवस्था, कृषि तथा सहकारी मन्त्रीमा रामेश्वर चौधरी र राज्यमन्त्रीमा कैलाश चौधरीलाई नियुक्त गर्ने तयारी गरेका थिए।
उन्मुक्तिबाट मन्त्रीमा सिफारिस भएका रामेश्वर र लक्ष्मणले मंगलबार नै नियुक्त गर्न भने पनि अर्को पक्षले नगर्न भनेपछि मुख्यमन्त्री समस्यामा परेका थिए। उन्मुक्तिका नेता लक्ष्मण चौधरीले दुई जनालाई प्रदेशको मन्त्री बनाउन खोजेपछि पार्टीभित्र व्यापारीलाई मन्त्री बनाउन लागिएको भन्दै असन्तुष्टि बढेको थियो। पार्टीका अर्का नेता सुरेन्द्र चौधरीले लक्ष्मण किशोर चौधरी (लक्ष्मण जोगेथ्वाअ)लाई मन्त्री बनाउन उपयुक्त हुने बताए।
‘लक्ष्मण थारु जी तपाईंको ल्याकत छ भने लक्ष्मण जोगेथ्वालाई मन्त्री बनाएर देखाउनुस्। सबैले स्वागत गर्लान्’, उनले सामाजिक सञ्जालमा लेखेका छन्, ‘लक्ष्मण जोगेथ्वालाई मन्त्री बनाउन सक्नु हुन्नँ भने कैलाश चौधरीलाई राज्य होइन फूल मन्त्री बनाएर देखाउनुस्।’
उनले लक्ष्मणले सो कार्य गर्न नसक्ने दाबी गरेका छन्। ‘तेल व्यापारीको नाम मन्त्री र कैलाशजीको नाम राज्य मन्त्रीको लागि लिखित सिफारिस भएको पनि तपाईंलाई थाह छैन भने बाँकी के कुराको हैसियत राख्नुहुन्छ?’
यस्तै प्रदेशको आन्तरिक मामिला तथा कानुनमन्त्री पृथ्वीबहादुर सिंहको सवारी दुर्घटनाबाट मृत्यु भएपछि सो मन्त्रालय पनि मन्त्रीविहीन छ। सो मन्त्रालयको जिम्मेवारीमा नेपाली कांग्रेसबाट निर्वाचित शिवराज भट्टलाई दिइने चर्चा रहेको छ। यद्यपि, मुख्यमन्त्री कमलबहादुर शाहले मन्त्रीबारे अहिलेसम्म टुंगो लाग्न नसकेको प्रतिक्रिया दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
