काठमाडौं– राजस्व अनुसन्धान विभागले मंगलबार त्रिभुवन अन्तर्राष्ट्रिय विमानस्थलको भन्सार गेटबाट बरामद गरेको सुन झण्डै १०० केजी परिमाणको भएको खुलेको छ।
अवैध रुपमा सुन तस्करी भइरहेको भन्ने पूर्वसूचनाको आधारमा विभागले विशेष टोली नै बनाएर अपरेशन चलाएको थियो। जसक्रममा मंगलबार साँझ विमानस्थलको भन्सार गेटबाट बा २ ज २३२४ नम्बरको ट्याक्सीलाई नियन्त्रणमा लिइएको थियो।
नियन्त्रणमा लिएको ट्याक्सीमा मोटरसाइकलका स्पेयर पार्टस् (डिस्क ब्रेक सु) भेटिएको थियो। विभागको टोलीले ब्रेक सुहरु खोलेर हेर्दा त्यसमा सुन मोरेर ल्याइएको देखिएको थियो।
विभाग स्रोतका अनुसार क्याथे प्यासिफिक एयरलाइन्सको हङकङ–काठमाडौं उडानबाट मंगलबार ठूलो परिमाणमा सुन काठमाडौं आएको सूचना प्राप्त भएको थियो। सुन मोरेर ल्याइएको ब्रेक सुसहितको स्पेयर पार्टस्हरु अन्तर्राष्ट्रिय विमानस्थलको भन्सार कार्यालयले मंगलबार दिउँसै जाँचपास गरेको थियो।
जाँचपास गरेर सम्बन्धित गन्तव्यतिर लैजान लागेको अवस्थामा विभागको टोलीले भन्सारको गेटबाट ट्याक्सीलाई नियन्त्रणमा लिएको हो।
राजस्व अनुसन्धान विभागको टोलीले मंगलबार साँझ नै सुन बरामद गरे पनि बुधबार दिउँसोसम्म पनि अनुसन्धान जारी राखेको थियो। जसक्रममा ४ जना व्यक्ति पक्राउ परेका छन्।
पक्राउ पर्नेमा दोलखा मेलुङ गाउँपालिका– ३ घर भइ हाल काठमाडौंको स्वयम्भू बस्ने ५३ वर्षीय राम कुमार भुजेल, भोजपुरको अरुण गाउँपालिका–४ घर भइ काठमाडौंको साँखु बस्ने २१ वर्षीय दिलीप भुजेल, भोजपुरकै अरुण गाउँपालिका–४ घर भइ काठमाडौंको बुढानीलकण्ठ बस्ने ४९ वर्षीय हर्कराज राई र भारतको पुरानो दिल्ली घर भइ हाल काठमाडौंको पानीपोखरी बस्ने ५३ वर्षीय थाप्तेन छिरिङ छन्।
पक्राउ परेकाहरु सबै सुन ओसार–पसारमा संलग्न व्यक्ति रहेका पाइएको विभाग स्रोतले जानकारी दिएको छ।
राजस्व अनुसन्धान विभागले पक्राउ परेका व्यक्तिहरुसँग सोधपुछका साथै थप अनुसन्धान अगाडि बढाएको छ। सुन ओसार–पसारमा संलग्नहरु पक्राउ परे पनि सुनमा लगानी गर्ने व्यक्तिबारे भने केही खुल्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
