फ्लाई ओभरको काम किन रोकियो?, कहिले हुन्छ ग्वार्को जाममुक्त?

समाचार

ईश्वर बराल बुधबार, साउन ३, २०८० १८:१७

तस्बिर: निमेशजंग राई

काठमाडौं– उपत्यकाको निकै व्यस्त सडकको रुपमा रहेको ग्वार्को चोकमा बन्दै गरेको फ्लाई ओभर निर्माणको काम सुरु भएको करिब ५ महिनामै ठप्प भएको छ। ग्वार्को चोकमा माघ २७ गतेबाट फ्लाई ओभर निर्माण कार्य सुरु भएको थियो।

१४ महिनामा सक्ने लक्ष्यसहित सुरु भएको निर्माण कार्यले गति नलिँदै काम रोकिन पुगेको छ। फ्लाई ओभर बनेर अबिलम्व जामबाट मुक्त हुने सपना बोकेका यात्रु र सवारी चालकहरुले अहिले भोग्दै गरेको कष्ट अझै बढ्ने देखिएको छ।

फ्लाई ओभर निर्माणले गर्दा बिहान ६ बजेदेखि कोटेश्वरबाट सातदोबाटोतर्फ जाने यात्रुबाहक, मालबाहक तथा दुई पाङ्ग्रे सवारी साधनलाई बालकुमारी पुलबाट सर्भिस लेनमा र साना चार पाङ्ग्रे सवारी साधनलाई द्रूतमार्गबाट सञ्चालन गरिएको थियो। फ्लाई ओभरको कामले गति लिए अबको करिब ९ महिनामा राहत मिल्थ्यो। तर फ्लाई ओभरको डिजाइनमै समस्या देखिएपछि काम रोकिन पुगेको छ।

fly-over-2 copy1689769449.jpg

करिब ३ साताअघि उक्त समस्या थाहा लागेपछि काम स्थगित हुन पुगेको थियो। त्यसो त समस्या भने करिब २ महिना अघिबाटै देखिएको सरोकारवालाहरु बताउँछन्। अब कसरी र कहिले काम सुरु हुने हो भन्ने अन्योल रहेको बताउँछन् भौतिक मन्त्रालयका कार्मचारीहरु।

के समस्या आइलाग्यो त?
फ्लाई ओभर बनाउने ठेक्का आशिष-समानान्तर-रेलिगेर जेभीले पाएको थियो। यो ठेक्का इन्जिनियरिङ प्रोक्युरमेन्ट एन्ड कन्स्ट्रक्सन विधिअनुसार भएको थियो। यो विधि अनुसार निर्माण व्यवसायीले नै योजनाको डिजाइन गर्छन्। सोही डिजाइनलाई सडक विभागले स्वीकृत गरेको थियो।

डिजाइन स्वीकृत गर्दै विभागले केही सुझाव दिएको थियो निर्माण कम्पनीलाई। सोही अनुसार निर्माण कम्पनीले फ्लाई ओभरको जगमा परिवर्तन गरिएको थियो। अहिले पनि जगमै समस्या देखिएको बताउँछन् विभागका कर्मचारी। जमिनमुनिको भाग खन्ने क्रममा डिजाइन गरिएभन्दा फरक किसिमको माटो देखिएपछि काम प्रभावित भएको निर्माण कम्पनी बताउँछ।

सडक विभागका गुणस्तर, अनुसन्धान तथा विकास केन्द्रका सिनियर डिभिजनल इन्जिनियर राकेश महर्जन भने डिजाइन अनुसार काम गर्दै जाँदा माटोको लोड क्षमतालाई लिएर समस्या उत्पन्न भएको बताउँछन्। त्यसैका लागि पुन: डिजाइनकै अध्ययन गर्नुपर्ने अवस्था आएको महर्जन बताउँछन्।

fly-over-1 copy1689769449.jpg

महर्जन भन्छन्, ‘एमएसी वाल र पुलबीचको बाटोमा माटो पुर्दा त्यसले लोड धान्छ वा धान्दैन भन्ने सवालमा यकिन निर्माण पक्ष र हामी पनि प्रष्ट हुन सकेनौं। डिजाइनमा उहाँहरुले रिभाइजेसन गरिसक्नु भएको छ।’

कहिले काम अघि बढ्छ भन्ने नेपाल लाइभको प्रश्नमा महर्जन भन्छन्, ‘हामीहरु अध्ययनको चरणमा छौं। अब छिट्टै काम पूर्ण रुपमा प्रारम्भ हुन्छ। अहिले पनि काम त पूर्ण रुपमा ठप्प भएको छैन। काम भइरहेको छ। त्यही समस्या आएको जगको पुन:अध्ययन भएको हो।’

महर्जन निर्माण कम्पनीले समयमै काम सक्नेमा भने विश्वस्त छन्। उनी कुनै पनि बहानाले व्यवसायीलाई समय थप नहुनेमा सचेत गराउँछन्। कुनै अकल्पनीय विपत्ति आएमा मात्र अन्यथा यसअघि नै निर्धारण गरेको समयमा काम सक्नुपर्ने उनको भनाइ छ।

कस्तो बन्दैछ त फ्लाई ओभर?
एमएसी वालको प्रयोग गरी ६ मिटर उचाइको फ्लाई ओभर तयार गर्ने योजना छ। चार लेन सडकको बीच खण्डमा ३५ मिटर लामो पुल सहित करिब ५४० मिटर लामो संरचना रहनेछ ।

बालकुमारीतर्फ फ्लाई ओभर २८० मिटर लामो र्‍याम रहने र सातदोबाटोतर्फ १७५ मिटर लम्बाइको र्‍याम रहने बताइएको छ। रिङरोडमा रहेको ८ लेनमध्ये ४ लेनलाई उठाएर रिङरोडमा फ्लाई ओभर निर्माण गरी रिङरोडको जाम हटाउन यसले सहयोग पुर्‍याउने सरकारको दाबी छ।

फ्लाई ओभर बनेपछि कलंकी–कोटेश्वर सडक मार्गमा सवारी फ्लाई ओभरबाट गुड्नेछन्। ग्वार्को–लामाटार र ग्वार्को–पाटनको सवारी ओभरपासको सडकबाट गुड्नेछन्। यसको लागत कुल १७ करोड ६८ लाख हुने अनुमान गरिएको छ।