नयाँदिल्ली- भारतले चन्द्रमामा चन्द्रयान-३ पठाएको छ। स्थानीय समयअनुसार शुक्रबार दिउँसो २:३५ बजे आन्ध्र प्रदेशको स्पेसपोर्टबाट चन्द्रयान-३ नाम दिइएको रकेट चन्द्रमामा पठाइएको बीबीसी हिन्दीले उल्लेख गरेको छ।
इसरोले चन्द्र मिसन अन्तर्गत चन्द्रयान-३ चन्द्रमामा पठाइएको हो। चन्द्रयान-३ अगस्ट ५ मा चन्द्रमाको कक्षमा प्रवेश गर्ने दाबी गरिएको छ। चन्द्रयान-३ मा ल्यान्डर, रोभर र तीन वटा प्रोपल्सन मोड्युल छन्। यसको कुल वजन ३ हजार ९ सय किलोग्राम रहेको छ।
‘चन्द्रयान-३ ले चन्द्रमाको यात्रा सुरु गरिसकेको छ,’ इसरो प्रमुख सोमनाथले भने, ‘चन्द्रयान-३ लाई आगामी दिनहरुमा चन्द्रमामा पुग्ने शुभकामना।’
यो मिसनमा चन्द्रयानको रोभर (सानो रोबोट) निस्कनेछ जसले चन्द्रमाको सतहमा अवतरण गर्नेछ र यसको पोजिसनिङ चन्द्रमाको दक्षिण ध्रुवमा हुनेछ।
यही रोभरले चन्द्रमाको यस भागमा खनिज, पानी आदि पाइन्छ भन्ने पत्ता लगाउने दाबी गरिएको छ।
कति बजेट हो चन्द्रयान- ३ को
चन्द्रयान- ३ को कुल बजेट ६१५ करोड भारतीय रुपैयाँ भएको बीबीसीले जनाएको छ। जनवरी २०२०मा इसरोका तत्कालीन प्रमुख सिवनले भनेका थिए, ल्याण्ड रोभर र प्रोपल्सन मोड्युलमा २५० करोड रुपैया खर्च हुने र लञ्च सर्भिसमा ३६५ करोड खर्च हुने अनुमान गरिएको थियो। यदि मो मिसन सफल भयो भने अमेरिका, चीन र रुस (सोभियन युनियन)पछि चन्द्रमामा रकेट अवतरण गराउने चौथो देश भारत हुनेछ।
अमेरिका र रुसको मिसन सफल भएपछि उसको स्पेस क्राफ्ट कयौं पटक क्रयास (विस्फोट) भएको थियो। अहिलेसम्म चीन मात्र यस्तो देश हो जसको चाङ्ग ३ मिसन २०१३ मा पहिलो प्रयासमै सफल भएको थियो। चन्द्रयान-३ एक लामो यात्रामा लागि रवाना भएको छ। यदि सबै योजना अनुसार भएमा २३ वा २४ अगस्टमा चन्द्रमामा सफ्ट ल्यान्डिङ हुनेछ। चन्द्रयान-२ मिसनको लञ्च जुलाईमा भएको थियो भने यस पटक पनि जुलाईमै गरिएको छ।
इसरोले सेप्टेम्बर २०१९मा चन्द्रयान-२ को चन्द्रमामा उतार्ने प्रयास गरेको थियो। तर उसको विक्रम ल्याडर क्षतिग्रस्त हुँदा असफल भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
