काठमाडौं- फ्लाई दुबईको जहाजमार्फत गत पुस १० गते चिनियाँ नागरिक लि हासोङ बिहान करिब ७ बजे त्रिभुवन अन्तर्राष्ट्रिय विमानस्थलमा अवतरण हुन्छन्। उनीसँग दुई वटा सुटकेसको लगेज हुन्छ।
जाँचका क्रममा सुटकेसभित्र इलेक्ट्रिक सिगरेट (भेप्स) जस्तो देखिने वस्तु भेटिएपछि शंकास्पद भन्दै भन्सार कार्यालयले नियन्त्रणमा लिन्छ। भन्सारले पासपोर्ट समेत लिएर चिनियाँ नागरिक होसाङलाई छाड्छ। भोलिपल्टै चिनियाँ नागरिक होसाङले आफ्नो पासपोर्ट फिर्ता लिन्छन् र पर्सिपल्ट उनी स्वेदश फर्किएको अध्यागमनको रेकर्डबाट खुल्छ।
तर, ती दुई वटा सुटकेस आगमन कक्ष छेउकै कुनामा हुन्छन्। त्यो बीचमा बब्लुकुमार गुप्ता नाम गरेका व्यक्तिले भन्सारका नासु रेवन्त खड्कालाई उक्त सुटेकसभित्र भेप्सको रुपमा ९ किलो सुन भएको सुनाउँछन्।
त्यसपछि रेवन्तले बल्लुलाई नै सुटकेस भएको ठाउँमा लैजाँदै भेप्स तान्न लगाउँछन्। तर धुँवा आउँदैन। त्यपछि भेप्सको रुपमा अन्य बहुमूल्य वस्तु छ भन्नेमा उनीहरु ढुक्क हुन्छन्।
सुटकेस राखिएको कोठामा सीसीटीभीबाट निगरानी हुने भएकाले त्यस दिन केही गरिएन। त्यसपछि भन्सार एजेन्ट दिनेश बस्नेत र नासु रेवन्तबीच भेप्सको रुपमा भित्रिएको सुनबारे कुराकानी हुन्छ। त्यतिन्जेल उक्त सुन बिक्रीका लागि भारतीय नागरिकसँग डिल समेत भइसकेको हुन्छ।
त्यसको करिब एक सातापछि मुद्दा शाखामा भएका सामानहरु लिलामी गर्ने र डिस्पोज गर्ने सामान छुट्याउने तयारी हुन्छ। त्यसपछि रेवन्तले ९ किलो सुनले भरिएको सुटकेस डिस्पोज गर्नुपर्ने भन्दै डिस्पोज गर्ने सामान राख्ने ठाउँमा कोठा नम्बर १११ मा सार्छन्। यो प्रक्रियामा रेवन्तसँगै दिनेश पनि सँगै हुन्छन्। त्यसपछि यी दुई जना मिलेर दुई वटा सुटकेसमा भेप्सको रुपमा भित्र्याइएको सुन धमाधम निकाल्छन् र त्यहाँ अरु नै भेप्स राखिदिन्छन्।
त्यसपछि उक्त सुन ६ करोड रुपैयाँमा दिनेशले सुनसरीको धरान उपमहानगरपालिका–२ घर भएका वेदप्रकाश अग्रवाललाई बिक्री गर्छन्। भन्सारबाट उक्त सुन बाहिर लैजान सहजीकरण गरे वापत रेवन्तको निर्देशनमा दिनेशले प्रेरणा थापाको बैंक अफ काठमाण्डु र कृषि विकास बैंक लिमिटेडको खातामा ३० लाख र भाउजु ललिता राजभण्डारीको खातामा ५३ लाख गरी ६५ लाख रुपैयाँ हाल्न लगाएर ६५ लाख नासु रेवन्तले बुझ्छन्। वेदप्रकाश उक्त सुन भारतीय व्यापारी साहेब राव पाण्डुरङ मरगलेलाई बेच्छन्।
सुटकेस भित्रको भेप्समा सुन भएको र भेप्स साटफेर गरेर सुन निकालेर अर्कै भेप्स राखिएको पाइएको भन्दै भन्सार कार्यालयले वैशाख २६ गते सीआईबीलाई पत्राचार गर्दै अनुसन्धान गर्न अनुरोध गर्छ।
त्यसपछि सीआईबीले दुई महिना लामो अनुसन्धान सकेर गरेर जिल्ला सरकारी वकिल कार्यालयमा बुझाएको प्रतिवेदन अनुसार जिल्ला अदालत काठमाडौंमा मुद्दा दायर भएको छ।
यो प्रकरणमा सीआईबीले भन्सारकै नायब सुब्बा २७ वर्षीय रेवन्त खड्का, सिन्धुपाल्चोकको सुनकोशी गाउँपालिका–६ घर भएका ३२ वर्षीय भन्सार एजेन्ट दिनेश बस्नेत, सुनसरीको धरान उपमहानगरपालिका–२ घर भई न्युरोडमा घडी पसल सञ्चालन गर्दै आएका वेदप्रकाश अग्रवाल, भारतको महाराष्ट्रका ३९ वर्षीय व्यापारी साहेब राव पाण्डुरङ मरगले, सिन्धुपाल्चोककै सुनकोशी–६ का ३२ वर्षीय अमृत कार्की, पोखरा महानगरपालिका–४ का २२ वर्षीय पूर्व सुरक्षागार्ड निर्मलकुमार विकलाई पक्राउ गरेर मुद्दा दायर गरिएको छ।
भन्सार एजेन्ट दिनेश बस्नेतका भाइ तथा कार्गो एजेन्ट दिपेश बस्नेत, बस्नेत दाजुभाइका भिनाजु गोपाल सुवेदी र काभ्रेको बनेपा–१० का ५५ वर्षीय रामकेशव थापालाई फरार प्रतिवादी बनाएर मुद्दा दायर भएको छ। भिनाजु सुवेदीले नै सुन खरिदका लागि वेदप्रकाशसँग भेट गराइदिएको पाइएको छ।
सुरुमा बस्नेत दाजुभाइ र उनीहरुका भिनाजु सुवेदी भएर भेप्सबाट ८० ग्राम जति सुन निकाले वेदप्रकाशलाई भेट्न न्युरोड पुगेका थिए। त्यसपछि वेदप्रकाशसँग उनीहरुले ६ लाख रुपैयाँ बुझेका बताएका छन्।
पछि वेदप्रकाशसँग आएका अर्का व्यक्ति भारतीय व्यापारी मरगलेलाई पटक पटक गरेर उनीहरुले ६ करोड रुपैयाँमा सुन बेचेको अनुसन्धानबाट खुलेको छ।
उक्त सुन बेचेर आएको रकमबाट बस्नेत दाजुभाइ तथा उनीहरुका भिनाजु गोपाल सुवेदीले अमृत कार्कीको नाममा भक्तपुरमा जग्गा समेत किनेको पाइएको छ। जसकारण कार्कीलाई पनि प्रतिवादी बनाइएको छ।
अर्का प्रतिवादी तथा भन्सारका पूर्व सुरक्षा गार्डले निर्मलकुमार विकले मुद्दामा शाखामा रहेको सुटेकेस गोदाममा पुर्याउने काम गरेका थिए। सो क्रममा सुटकेसबाट भेप्स भुइँमा खसेको थियो। उक्त भेप्स विकले आफ्नो खल्तीमा हालेका थिए। पछि तान्न खोज्दा धुवाँ नआएपछि फुटाएर हेर्दा सुन देखेपछि सिक्री बनाएर लगाएको खुलेको छ। जसकारण विकलाई प्रतिवादी बनाइएको सीआईबीले जनाएको छ।
काम फत्ते भएपछि ४ लाख तिरेर सुकुटेमा पार्टी, आफन्तका नाममा जग्गा-जमिन
अनुसन्धानको क्रममा भने नासु रेवन्तले ६५ लाख रुपैयाँभन्दा बढी बुझेको पाइएको छ। नाता-सम्बन्ध नै नभएका प्रेरणा थापा, ललिता थापा, गंगाराम थापा, समरबहादुर थापाको नाममा रेवन्तले रकम जम्मा गरेको देखिन्छ। भन्सार ऐजेन्ट दिनेशको समेत साझेदारीमा टेक्सटर टुर्स एण्ड ट्राभल्स प्रालिको नाममा ग्लोबल आईएमई बैंकमा ८० लाख रुपैयाँ समेत जम्मा गरेको पाइएको छ।
दिनेशले सुन बिक्रीबाट आम्दानी भएको रकममध्ये २ करोड ९५ लाख रुपैयाँ उनका ससुरा रामकेशव थापाको नाममा भक्तपुरमा जग्गा खरिद गरेको खुलेको छ। ३० लाख रुपैयाँ भन्सार कार्यालयले लिलामी गरेका कपडा सकार गर्दा खर्च गरेको पाइएको छ।
२५ लाख रुपैयाँ बब्लु गुप्तालाई ऋण सापटी दिने क्रममा विभिन्न व्यक्तिहरुको भन्सार बुझाउन दिएको रकम आफूले खर्च गरेकाले त्यसमा हिसाब मिलान गरेको उनले बताएका छन्। २० लाख भाई दिपेशलाई दिएको र ८ लाख रुपैयाँ जग्गा किन्नेबेला दलालीलाई दिएको उनले बयानमा उल्लेख गरेका छन्।
काम फत्ते भएपछि सुकुटे बिच रिसोर्टमा पार्टी गरेर ४ लाख रुपैयाँ सिध्याएको पनि उनले बयानमा बताएका छन्। बाँकी ८३ लाख कहाँ खर्च भयो भन्ने हिसाब यकिन नभएको दिनेशको भनाइ छ।
आपराधिक विश्वास घात र संगठित अपराधमा मुद्दा
उनीहरुविरुद्ध आपराधिक विश्वासघात गर्न नहुने र संगठित अपराधसम्बन्धी कसुरमा मुद्दा दायर गरिएको छ। उनीहरुविरुद्ध मुलुकी फौजदारी अपराध संहिता २०७४ को दफा २५२ को उपदफा (१) र (२० बमोजिमको कसुर भएका देखिएकाले सोही अनुसार कारबाहीको माग गरिएको छ।
आपराधिक विश्वासघात अन्तर्गत ३ वर्षसम्म कैद वा ३० हजार रुपैयाँसम्म जरिवाना वा दुवै सजाय हुने व्यवस्था छ। नासुको हकमा भने सरकारी कर्मचारी भएकाले ५ वर्षसम्म कैद र ५० हजार रुपैयाँसम्म जरिवाना हुनसक्ने प्रावधान छ।
त्यसैगरी संगठित अपराध निवारण ऐन, २०७० अन्तर्गत कसुर गरेकाले सो बमोजिमको सजाय पनि मागदाबी गरिएको छ। यस कसुर अन्तर्गत ५ वर्षसम्म कैद र ५० हजार रुपैयाँसम्म जरिवाना हुनसक्ने प्रावधान छ।
यस्तो अपराधबाट सार्वजनिक वा निजी सम्पत्तिमा हानि पुर्याए सो वापतको क्षतिपूर्ति समेत भराउनुपर्ने प्रवधान छ। उनीहरुको बैंक खाता रोक्कादेखि सुन बिक्रीबाट खरिद गरिएका जग्गाहरु समेत रोक्काको माग गरिएको छ। ९ किलो सुन भने सीआईबीले अहिलेसम्म फेला पार्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787382958.png)
-1786602170.png)
-1786513116.png)
