काठमाडौं- सत्तारुढ दल नेपाली कांग्रेसका संसदीय दलका प्रमुख सचेतक रमेश लेखकले प्रमुख प्रतिपक्षी दल नेकपा एमालेका कारण प्रतिनिधि सभाको बैठक बस्न नसेकेको बताएका छन्।
प्रधानमन्त्री पुष्पकमल दाहाल ‘प्रचण्ड’को अभिव्यक्तिलाई लिएर नेकपा एमालेले संसद् अवरोध गर्दै आएको छ। आइतबार प्रधानमन्त्री तथा मन्त्रिपरिषद्को कार्यालय सिंहदरबारमा उक्त अवरोधलाई हटाउनेबारे प्रधानमन्त्री प्रचण्ड, कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच छलफल भएको थियो।
प्रधानमन्त्री प्रचण्डले संसद्मा आफ्नो आफ्नो भनाइ राख्न दिने र चित्तबुझ्दो जवाफ आएपछि मात्रै संसद् चल्न दिने एमालेको भनाइ रहेको थियो। एमालेले संसद्मा अवरोध जारी राख्ने देखिएपछि आइतबार ३ बजेका लागि तय भएको संसद् बैठक सोमबारसम्मका लागि स्थगित गरिएको छ।
तर, नेपाली कांग्रेसले ससद् अवरोध हुनुको मुख्य दोषी नेकपा एमाले नै रहेको टिप्पणी गरेको हो। नेपाली कांग्रेस संसदीय दलका प्रमुख सचेतक लेखकले एमालेका कारण बैठक बस्न नसकेको आरोप लगाए।
नेपाल लाइभसँग कुरा गर्दै लेखकले भने, ‘बिहान तीन दलका शीर्ष नेताहरुबीच छलफलमा सहमति भएको हो। एमालेले सहमतिलाई फरक ढंगबाट सोच्यो। उहाँहरुले पहिला प्रधानमन्त्रीले जवाफ दिइसकेपछि हाउस सुचारु हुने सहमति गर्नुभयो। पछि आएर प्रधानमन्त्री बोलिहालून्, हामीलाई कन्भेन्स गरिहालून्। प्रधानमन्त्रीको कुरामा चित्त बुझ्यो भने हाउस चल्छ भन्ने थियो। त्यो भनेको त हामी चल्न दिँदैनौं भनेको हो नि। अब उहाँहरले हाउस चल्दैन भनेपछि कसरी जबरजस्ती चल्छ? प्रधानमन्त्री पनि बोल्ने त्यसपछि हाउस पनि नचल्ने हो भने केको सहमति भयो?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
