काठमाडौं- नेकपा एमालेका महासचिव शंकर पोखरेलले केपी ओली नेतृत्वको तत्कालीन एमाले सरकारले सिंगापुर मोडलको विकास गर्ने प्रयत्न गरेको तर्क गरेका छन्।
शनिबार एमालेको रामेछाप-काठमाडौं सम्पर्क मञ्चद्वारा आयोजित अभिमुखिकरण कार्यक्रममा उनले जनताले नै त्यसलाई आत्मसात नगरेको बताए।
‘नेकपा एमाले सरकारमा रहँदाखेर मुलुकको विकासको सन्दर्भमा एकप्रकारको सोचलाई आत्मसात् गर्यो। खासगरी सिंगापुरको मोडलमा राष्ट्रको विकासको योजना बनाएर अगाडि बढ्ने प्रयास गर्यो। तर नेपालको लामो राजनीतिक संघर्षबाट हुर्किएको नेपाली समाजले सिंगापुर मोडलको राजनीतिक विकास र समृद्धिको योजनालाई आत्मसात् गर्न सकेन’, उनले भने।
आत्मसात् गर्न नसकेकै कारणले राजनीतिक दलहरु र राज्यसत्ताभित्र अन्तर्द्वन्द्व पैदा भएको उनको भनाइ छ। उनले भने, ‘त्यही अन्तर्द्वन्द्वको जगमा केपी ओली नेतृत्वको सरकारलाई कमजोर पार्ने प्रयास भयो। र परिणामस्वरुप अदालतको निर्णयका माध्यमबाट, परमादेशका माध्यमबाट सरकार बदल्ने अनुचित प्रयासहरु भयो।’
उनले जनताले निर्वाचित गरेको सरकारलाई अनुचित तरिकाबाट परिवर्तन गर्दा त्यसको असर स्वाभाविक रुपमा राज्य व्यवस्थामाथि पर्ने बताए।
‘सर्वोच्च अदालतको फैसलापछाडि न्यायालय विवादको घेरामा पर्यो। संसद् विवादको घेरामा पर्यो। र सरकार जनताको अविश्वासको केन्द्र बन्न पुग्यो। जसले गर्दा लोकतन्त्रको सबलताका लागि अपरिहार्य ठानिने सबल राज्यसत्ता कमजोर बन्न पुर्यो’, उनले भने।
पोखरेलले यतिबेला राज्यसत्ता कमजोर भएको बताए। भने, ‘कमजोर राज्यव्यवस्थाको जगमा मुलुकको अर्थव्यवस्था कमजोर बनेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
