काठमाडौं– बैंक तथा वित्तीय संस्थाहरुलाई पुनः ‘मर्ज’ गर्न दबाव आएको नेपाल राष्ट्र बैंकका गभर्नर डा चिरन्जिवी नेपालले बताएका छन्। बुधबार उद्योग व्यवसायीहरुसँगको छलफलमा नेपालले बैंक तथा वित्तीय संस्थाहरुलाई पुनः ‘मर्ज’ गर्न चौतर्फी दबाव आएको बताएका हुन्।
उनले भने, ‘यसअघि वित्तीय संस्थाको मर्जर नीति ल्याउँदा फिर्ता गर्न चौतर्फी दबाव आएको थियो। अहिले पुनः मर्जर नीति ल्याउन दबाव आएको छ।’ उनले ‘मर्जर’ नीति ल्याउँदा संसदमा तीन पटक स्पष्टिकरण दिएको स्मरण गरे।
गभर्नर नेपालले नेपाल लगानीको लागि ‘भर्जिन ल्यान्ड’ भएको बताए। उनले भने, ‘मुलुक संघीयतामा गएसँगै नयाँ–नयाँ कनुनको निर्माण भएकोले लगानीको लागि नयाँ अवसरसमेत र्सिजना भएको छ।’ यस्तो अवस्थामा पनि नेपालमा लगानीको ‘ग्लोबलाइजेसन’ हुन नसक्नु दुःखद भएको उनले तर्क गरे।
‘बैंकिङ क्षेत्रले लगानीअनुसारको नाफा कमाएको छैन’
यता नेपाल बैंकर एसोसियसनका अध्यक्ष ज्ञानेन्द्र ढुङगानाले बैंक तथा वित्तीय संस्थाले लगानी अनुसारको नाफा नगरेको बताए। ढुङगानाले बैंक तथा वित्तीय संस्थाहरुको नाफा अर्बमा देखियो भन्दैमा नाफा कमाएको भन्न नमिल्ने तर्क गरे।
उनले भने,‘बैंक तथा वित्तीय संस्थाहरुले करिब १२ अर्ब देखि १५ अर्बसम्म लगानी गरेका हुन्छन् भने करिब १/२ अर्बको हाराहारीमा नाफा कमाएका हुन्छन्। यसलाई ठूलो मान्न मिल्दैन।’ उनले ब्याजदर बढ्यो भनेर चिन्तित हुनु पर्ने स्थिति नरहेको समेत दाबी गरे। भने, ‘निक्षेपको ब्याजदर बढेसँगै कर्जामा ब्याजदर बढेको हो।’
४ महिनामा ४ पटक बढ्यो ब्याजदर
उद्योग वाणिज्य माहसंघका उपाध्यक्ष उमेशलाल श्रेष्ठले बैंकहरुले ४ महिनामा ४ पटक ब्याजदर बढाएको बताएका छन्। उनले आफूले लिएको ऋणको ब्याजदर डेढ वर्षमा दोब्बर भएको जिकिर गरे। ‘डेढ वर्ष अघि ६.४४ प्रतिशत ब्याजदरमा लिएको कर्जा अहिले १२.७५ प्रतिशत पुगेको छ।’, उनले भने।
उनले अहिले लगानीको मुख्य चुनौतीको रुपमा अस्थिर ब्याजदर रहेको दाबी गरे। भने, ‘आफूले लिएको कर्जाको ब्याजदर बढीमा कति र घटीमा कति हुने सीमा तोक्न आवश्यक छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
