कतारका राजदूतले भने– पोखरा विमानस्थलमा उडानका लागि पटक–पटक पत्राचार गरियो तर जवाफ आएन

राजनीति

नेपाल लाइभ शुक्रबार, असार २२, २०८० १७:४७

काठमाडौं– नेपालका लागि कतारका राजदूत युसुफ बिन मोहम्मद अल–हेलले भर्खर निर्माण भएको पोखरा अन्तर्राष्ट्रिय विमानस्थलमा कतारले उडान भर्ने प्रयास गरे पनि सरकारले कुनै जवाफ नदिएको गुनासो गरेका छन्।

राष्ट्रिय सभा अध्यक्ष गणेश तिमिल्सिनासँगको बिदाई भेटका क्रममा उनले यस्तो गुनासो पोखेका हुन्। उनले पोखरालगायतका विमानस्थलमा सिधा उडानका लागि कतारका एअरलायन्सहरुको चासो राखेर नेपाल सरकारका निकायहरुमा ५/६ पटक सम्म पत्राचार गरे पनि नेपाली पक्षबाट कुनै प्रतिक्रिया पाउन नसकेको गुनासोसमेत गरे।

उनले नेपालले चासो राखेर अघि बढेमा पोखरा, भैरहवाबाट सिधा उडान नियमित गर्न कुनै समस्या नभएको बताए। ‘कतारले पोखरा विमानस्थलमा उडान गर्नका लागि ५/६ पटक पत्राचार गर्‍यो तर नेपाल सरकारकाबाट कुनै जवाफ पाएका छैन,’ उनले भने, ‘नेपालले चासो दिएमा कतार भैरवा र पोखरा लगायतका विमानस्थलमा सिधा नियमित उठान गर्न तयार छ।’

भेटमा राजदूतले नेपाली श्रमिकले कतारको विकासका लागि पुर्‍याएको योगदानको प्रशंसा गर्दै बढीभन्दा बढी सुविधा उपलब्ध गराउने विषयमा पनि गम्भीर रहेको बताए। राजदुत हेलले सिंहदरबारस्थित अध्यक्षको कार्यकक्षमा भेट गर्दै नेपाल र कतारबीच रोजगारी, व्यापार, लगानी, पर्यटन लगायतका क्षेत्रमा अझै फराकिलो र गहिरो द्विपक्षीय सम्बन्धको विकास हुँदै गएको बताए।

अध्यक्ष तिमिल्सिनाले ठूलो संख्यामा नेपाली नागरिकहरूलाई रोजगारीको अवसर प्रदान गरेकोमा कतार सरकारको प्रशंसा गर्दै कतारको अर्थतन्त्रलाई पनि उकास्न नेपाली कामदारहरूले गरेको योगदानप्रति सन्तुष्टि व्यक्त गरे।

उनले कतारमा कार्यरत नेपाली श्रमिकले रेमिट्यान्समार्फत् राष्ट्रिय अर्थतन्त्रमा योगदान दिएको तथा यसले नेपाली जनताको जीवनस्तर उकास्न मद्दत गरेको र नेपाल वैदेशिक रोजगारीलाई सुरक्षित र मर्यादित बनाउन प्रतिबद्ध रहेको बताए।

अध्यक्ष तिमिल्सिनाले कतार लगायतका मुलुकको थप उन्नत बन्दै गएको श्रम बजारमा रोजगारी र उच्च आय सुनिश्चित गर्न नेपालले अर्धदक्ष र दक्ष श्रमिकहरु पठाउने कार्यलाई उच्च प्राथमिकतामा राखेको पनि बताए।

उनले दुई देशबीचको सिधा हवाई सम्पर्कले मानिसहरूको आवतजावतलाई सहज बनाएको छ र पर्यटन प्रवर्द्धनमा मद्दत गरेको उल्लेख गर्दै हाल नेपाल एअरलाइन्स, कतार एअरवेज र हिमालय एअरलाइन्स गरी तीन एअरलाइन्सले नेपाल र कतारबीच सिधा हवाई उडान गरिरहेका बताए। यस्तै नेपाल आगामी दिनमा दुई देश र जनताको पारस्परिक हीतका लागि मित्रवत सम्बन्धलाई थप सुदृढ पार्न द्विपक्षीय, क्षेत्रीय र बहुपक्षीय तहमा कतारसँग नजिकबाट काम गर्न तत्पर रहेको कुरा उनले दोहोर्‍याए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

साहारा सहकारी प्रकरण : सरकारीतर्फका वकिलको बहस सकियो, प्रतिवादीतर्फको सुरू

त्रिविले खुलायो २०५८ सालदेखिका पुराना विद्यार्थीका लागि मौका परीक्षाको फारम

आज पनि सुनको मूल्य प्रतितोला १६ सयले बृद्धि, चाँदीको कति ?