काठमाडौं- बिहीबार काठमाडौंमा बसेको नेपाली कांग्रेसका जिल्ला सभापतिहरुको भेलामा पार्टीको सदस्यताका विषयमा छलफल भइरहेको छ।
कांग्रेसका केन्द्रीय सदस्य तथा सचेतक मीन विश्वकर्माले जिल्ला सभापतिको भेलामा पार्टीको सदस्यता नवीकरण, अनलाइनमार्फत् नयाँ सदस्यता कसरी प्राप्त गर्न सकिन्छ भन्ने विषयमा छलफल भइरहेको बताएका छन्।
बिहीबार जिल्ला सभापतिहरुको भेला कार्यक्रमपछि सञ्चारकर्मीहरुसँग बोल्दै विश्वकर्माले साधारण सदस्यता अनलाइनमार्फत् नै भर्ने विषयमा छलफल भएको उल्लेख गरे।
उनले भने, ‘सदस्यता व्यवस्थापनमा केही प्रगति भएको छ। महामन्त्रीहरूलाई दिएको जिम्मेवारी अनुसार जिल्ला सभापतिलाई काठमाडौंमा बोलाएर अनलाइन सदस्यतामार्फत नयाँ सदस्यता र नवीकरणका विषयमा छलफल भएको छ।’
उनले विगतमा साधारण सदस्यता र क्रियाशील सदस्यताका विषयमा विवाद र मतभेद सिर्जना भइरहेका कारण त्यसलाई व्यवस्थित बनाउनका लागि पार्टी सदस्यतालाई अनलाइनमार्फत् सहजै लिने व्यवस्था गरेको बताए।
विश्वकर्माले प्रत्येक वर्ष क्रियाशील सदस्यता नवीकरण गर्नु पर्ने प्रावधान रहे पनि महाधिवेशनमा मात्रै गर्ने परिपाटीको अन्त्य हुने र अनलाइनमार्फत् नै सदस्यता नवीकरण गर्न र वितरण गर्न लागिएको बताए।
सभापतिहरुको बैठकमा मेची–महाकाली जानका लागि कार्ययोजना बनाउने विषयमा समेत छलफल भएको छ। अनलाइन सदस्यताका विषयमा प्राविधिक दीपेश मिश्रले जिल्ला सभापतिहरुलाई जानकारी गराएका छन्।
सम्मेलनमा ६५ जनाभन्दा बढी सभापतिहरू सहभागी रहेको कांग्रेसले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
