1688618533.jpg)
बालुवाटारमा बसेको गठबन्धनको बैठक
काठमाडौं– सत्तारुढ गठबन्धनले कोशी प्रदेशमा सरकार गठनका लागि बिहीबार नै दाबेदारी पेस गर्ने निर्णय गरेको छ। बिहीबार बिहान प्रधानमन्त्रीको सरकारी निवासमा बसेको बैठकले बिहीबार अपराह्न ५ बजेतिर दाबेदारी पेस गर्ने निर्णय गरेको हो।
बैठकमा सहभागी नेकपा एकीकृत समाजवादीका उपाध्यक्ष राजेन्द्र पाण्डेले कोशीमा सरकार गठनका लागि दाबेदारी पेस गर्ने निर्णय भएको जानकारी दिए। उनका अनुसार नेपाली कांग्रेस प्रदेश संसदीय दलका नेता उद्धव थापाको नेतृत्वमा सरकार गठनका लागि बिहीबार साँज ५ बजे प्रदेश प्रमुखसमक्ष दाबेदारी पेस हुनेछ।
गठबन्धनका दलहरुले यसअघि नै थापालाई मुख्यमन्त्री बनाउने निर्णय गरेका थिए। थापालाई मुख्यमन्त्री बनाउने यसअघिको निर्णयलाई निरन्तरता दिँदै सरकार गठनका लागि दाबेदारी पेस गर्ने निर्णय भएको पाण्डेले उल्लेख गरे।
कोशी प्रदेशका प्रमुख पर्शुराम खापुङले सरकार गठनका लागि दिएको समयसीमा आज (बिहीबार) सकिँदैछ। प्रदेश प्रमुख खापुङले असार १७ गते, आइतबार संविधानको धारा १६८ को उपधारा (२) बमोजिम दुई वा दुईभन्दा बढी दल मिलेर सरकार गठनको दाबी पेस गर्न आह्वान गरेका थिए।
३ सदस्यीय प्रदेश सभामा बहुमतका लागि ४७ मत आवश्यक पर्छ। गठबन्धनका दल नेपाली कांग्रेसका २९, माओवादी केन्द्रका सभामुखसहित १३, एकीकृत समाजवादीका ४ र जनता समाजवादीका १ सांसद् छन्। नेकपा एमालेका ४० र राप्रपाका ६ सांसद छन्।
आफ्नो पक्षमा बहुमत सदस्य संख्या ४७, जनाको समर्थन जुटाउन गठबन्धनका दलहरुले सभामुखको नाम समेत समावेश गरेर दाबेदारी पेस गर्ने तयारी गरेका छन्। माओवादी केन्द्रबाट सभामुख बनेका बाबुराम गौतमको समेत नाम उल्लेख गरेर दाबेदारी पेस गठबन्धनका दलहरुको तयारी छ।
सरकारको नेतृत्व गुमाएको एमालेले भने सभामुखको नाम सांसदको रुपमा सरकार गठनको दाबेदारीमा उल्लेख गर्न नहुने बताउँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
