काठमाडौं– सत्ता गठबन्धनका दलहरुले प्रधानमन्त्री पुष्पकमल दाहाल (प्रचण्ड)को राजीनामा माग्ने प्रमुख प्रतिपक्षी दल नेकपा एमालेको कदम असंदीय रहेको निष्कर्ष निकालेका छन्।
बिहीबार बिहान प्रधानमन्त्रीको सरकारी निवास बालुवाटारमा बसेको सत्ता गठबन्धनका ७ दलका नेताहरुको बैठकले प्रधानमन्त्रीले राजीनामा दिनु नपर्ने र राजीनामा माग गर्नु उपयुक्त नभएको निष्कर्ष निकालेको बैठकमा सहभागी नेकपा एकीकृत समाजवादीका उपाध्यक्ष राजेन्द्र पाण्डेले जानकारी दिए।
सोमबार काठमाडौंमा आयोजित एउटा कार्यक्रममा दिएको अभिव्यक्तिलाई लिएर प्रधानमन्त्री प्रचण्ड विवादमा तानिएका छन्।
नेपालमा पहिलोपटक ट्रक ल्याएका भनिएका प्रितम सिंहमाथि आधारित रहेर लेखिएको पुस्तक ‘रोड्स टु द भ्याली: द लिगेसी अफ सरदार प्रितम सिंह इन नेपाल’ विमोचन कार्यक्रममा सोमबार प्रधानमन्त्री प्रचण्डले विवादित अभिव्यक्ति दिएका थिए। ‘उहाँ ( प्रतिम सिंह) ले एकपटक मलाई प्रधानमन्त्री बनाउन धेरै मिहिनेत गर्नुभयो। धेरैचोटि दिल्ली जानु पनि भयो। काठमाडौंमा नेताहरु–साथीहरुसँग लगातार छलफल गर्नुभयो,’ प्रचण्डले भनेका थिए।
प्रधानमन्त्रीको उक्त अभिव्यक्तिलाई लिएर प्रमुख प्रतिपक्षी दल नेकपा एमालेले बुधबार संघीय संसद्का दुवै सदन (प्रतिनिधि सभा र राष्ट्रिय सभा)को बैठकमा अवरोध गर्दै प्रधानमन्त्रीको राजीनामा मागेको थियो।
संसद्मा विपक्षमा रहेका राष्ट्रिय स्वतन्त्र पार्टी, राष्ट्रिय प्रजातन्त्र पार्टीले पनि प्रधानमन्त्रीको अभिव्यक्तिको विरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
