काठमाडौं- कोशी प्रदेशमा नेपाली कांग्रेस नेतृत्वको गठबन्धनले सभामुख बाबुराम गौतमसहित ४७ सांसदको दाबी लिएर मुख्यमन्त्रीको लागि प्रदेश प्रमुख समक्ष निवेदन दिने भएको छ। उनीहरुले सभामुख गौतम माओवादी केन्द्रबाट विजयी भएको प्रदेश सभा सदस्य भएको र दुवैतर्फ बराबर मत देखिएकाले सभामुखले निर्णायक मत आफूहरुको गठबन्धनलाई दिने दाबी गर्ने गठबन्धनको तयारी छ।
प्रदेश सभामा सभामुखको गणना नहुँदा नेपाली कांग्रेस सहितको गठबन्धनको ४६ र एमालेको गठबन्धनको पनि ४६ सांसद देखिएको छ। यही कुरालाई आधार बनाउँदै सभामुखले दलको भन्दा पछि बराबर भएको अवस्थामा निर्णायक मत दिन मिल्ने भएकाले मुख्यमन्त्रीमा नियुक्ति हुनुपर्ने दाबी गर्ने कांग्रेसको गठबन्धनको तयारी छ।
तीन दलका तीन नेता काठमाडौंबाट फर्कंदै
एमालेबाट मुख्यमन्त्री बनेका हिक्मत कार्कीले विश्वासको मत गुमाएपछि नयाँ सरकार गठनका लागि प्रदेश प्रमुख पर्शुराम खापुङले संविधानको धारा १६८ को उपधारा २ अनुसार आह्वान गरेका थिए। उक्त उपधारामा २ वा २ भन्दा बढी दल मिलेर बहुमतको दाबी गर्न सक्ने उल्लेख छ। उक्त व्यवस्था अनुसार नेपाली कांग्रेस, माओवादी केन्द्र, एकीकृत समाजवादी र जसपा मिलेर सरकार बनाउन लागेका हुन्। उनीहरुको समग्रमा ४७ सांसद मात्र छन्। सभामुखले यसअघि पार्टीबाट राजिनामा दिएका छन्।
प्रदेश प्रमुखले सरकार गठनको प्रस्ताव आह्वान गरेपछि कोशी प्रदेशको नेतृत्व लिन माओवादी केन्द्र र नेपाली कांग्रेसका बीचमा प्रतिस्पर्धा देखिएको थियो। यही विवाद मिलाउन नेपाली कांग्रेस, माओवादी केन्द्रका नेताहरु काठमाडौं आएका थिए। उनीहरुले काठमाडौंमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा सहितका नेताहरुसँग भेट गरेका थिए।
उनीहरुको भेटपछि सत्ता गठबन्धनको बैठक नै बसेर मुख्यमन्त्री नेपाली कांग्रेसलाई दिने सहमति भएको थियो। उक्त सहमतिपछि राप्रपालाई फकाउने कोसिस गरिएको थियो। तर राप्रपाले कुनै संकेत नदिएपछि उनीहरुले काठमाडौंमा थप कसरत गरेका थिए। राप्रपा अध्यक्ष राजेन्द्र लिङ्देनसम्म सहमतिको प्रस्ताव पुगेको थियो। तर राप्रपाबाट ठोस कुरा नआएपछि उनीहरु सभामुखसहित दाबी पेस गर्ने तयारीका साथ फर्कने तयारीमा छन्।
एकीकृत समाजवादीका सांसद कमलप्रसाद जवेगु तीन दलका तीन नेताहरु काठमाडौंमा रहेको र बिहीबार नै फर्केर दाबी पेस गर्ने बताउँछन्। ‘उतै सहमति गरेर आएपछि यहाँ दाबी पेस पनि हुन सक्छ। सभामुखसहित दाबी गर्न मिल्छ कि मिल्दैन, हामी छलफलमै छौं, ’ उनले भने, ‘काठमाडौबाट साथीहरु आएपछि कसरी दाबी गर्नेबारे निर्णय हुन्छ।’
एमाले भन्छ: सभामुख सहितको दाबी मान्य हुँदैन
सरकारबाट भर्खर मात्र बाहिरिएको नेकपा एमालेले भने सभामुख सहितको दाबी मान्य नहुने चेतावनी दिएको छ। एमाले संसदीय दलका प्रमुख सचेतक रेवतीरमण भण्डारीले सभामुख अहिले कुनै दलको नभएकाले उहाँलाई समावेश गराएर बहुमत दाबी गर्न मिल्दैन।
‘नेपाली कांग्रेस सहितका दलहरुले सभामुखलाई विवादमा पार्ने प्रयास गरिरहेको हामीले जानकारी पाएका छौं, यो स्वीकार्य हुँदैन,’ उनले भने, ‘संविधानले सभामुखलाई कुनै एक दलको पक्षमा मत हाल्ने अधिकार दिँदैन। संविधान विपरीत हुने दाबी प्रदेश प्रमुखले स्वीकार गर्न हुँदैन। स्वीकार गरेमा हामी मान्दैनौ।’
उनले राप्रपा र आफूहरुको एउटै अडान रहेको पनि दाबी गरे। प्रदेश सभामा एमाले ४० प्रदेश सभा सदस्यसहित पहिलो दल छ। त्यस्तै राप्रपा ६ जना प्रदेश सभा सदस्य छन्। उनीहरु बाहेक अन्य दलको जोड्दा ४६ मात्र पुग्ने देखिन्छ। यदि सभामुखले राजिनामा दिएर माओवादी केन्द्रको पक्षमा उभिए मान्न हुने तर त्यसका लागि राजिनामा स्वीकृत हुनुपर्ने उनको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
