काठमाडौं– कोशी प्रदेशमा नयाँ सरकार गठनका लागि दलहरुले ‘निर्णायक’ पहल थालेका छन्। केन्द्रसहित अन्य प्रदेशमा सरकार गठन गरेको गठबन्धनले कोशीमा पनि सरकार गठनको प्रयास थालेको छ। तर, अंक गणित आफ्नो पक्षमा पार्न भने गठबन्धनलाई सकस परिरहेको छ।
गठबन्धनका दलहरु नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादीले कोशी प्रदेशमा (पहिलो चरणमा) नेपाली कांग्रेसका नेता उद्धव थापालाई मुख्यमन्त्री बनाउने सहमति गरेका छन्। कांग्रेसपछि माओवादीको नेतृत्वमा सरकार गठन गर्ने सहमति भएको नेताहरुको भनाइ छ।
तर, कोशी प्रदेशको संसदीय अंक गणित भने गठबन्धन दलको पक्षमा छैन। गठबन्धनका दलहरुले सरकार गठनका लागि बहुमत जुटाउन राष्ट्रिय प्रजातन्त्र पार्टीलाई पनि साथमा लिनुपर्ने बाध्यता छ।
कोशी प्रदेशमा नेकपा एमाले ४० प्रदेश सभा सदस्यसहित सबैभन्दा ठूलो दल छ। यस्तै, ६ प्रदेश सभा सदस्य रहेको राप्रपा पनि अहिलेसम्म एमालेकै साथमा छ।
नयाँ सरकार गठनको तयारीमा रहेको गठबन्धनसँग पनि ४६ सांसद छन्। प्रदेश सभामा नेपाली कांग्रेसका २९, माओवादी केन्द्रका १३, एकीकृत समाजवादीका ४ र जसपाका १ सांसद छन्। माओवादी केन्द्रका प्रदेश सांसद बाबुराम गौतम सभामुख भएका कारण उनी सरकार गठनको प्रक्रियामा सहभागी हुन पाउँदैनन्। जसकारण गठबन्धनलाई सरकार गठनका लागि राप्रपालाई मनाउनु बाहेक अर्को विकल्प छैन।
प्रदेश प्रमुख परशुराम खापुङले आइतबार नै ५ दिनको समय दिएर सरकार गठनका लागि दाबी पेस गर्न आह्वान गरेका थिए। गठबन्धनका २ दल कांग्रेस र माओवादी केन्द्रले प्रदेश सरकारको नेतृत्वमा दाबी गरिरहँदा केन्द्रीय तहबाट नै पहिलो चरणमा कांग्रेसका थापालाई मुख्यमन्त्री बनाउने सहमति जुटेको थियो।
अब राप्रपाको साथ लिने विषयमा पनि कोशी प्रदेशका नेताहरुले केन्द्रीय नेताकै सक्रियाताको अपेक्षा गरेका छन्। त्यसो त सोमबार नै नेपाली कांग्रेसका सभापति शेरबहादुर देउवाले राप्रपा अध्यक्ष राजेन्द्र लिङ्देनलाई भेटेका छन्। लिङ्देनले देउवासँग भेट गरे पनि सरकार गठनमा सघाउनेबारे ‘बचन’ दिइसकेका छैनन्।
‘अहिले नै राप्रपाको समेत सहयोग हुनेगरी प्रदेश सरकार गठनको प्रक्रियामा छौं। आज–भोलि (मंगलबार या बुधबार)सम्म सहमति होला,’ नेपाली कांग्रेस कोशी प्रदेश सभाका एकजना सदस्यले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
