काठमाडौं– कर्मचारीहरुले आइतबार आन्दोलनस्वरुप बन्द गरेको अदालत सुरु नहुँदै वकिलहरुले प्रभावित पारेका छन्।
कर्मचारीहरुले बिहान १० बजे देखि १:३० बजेसम्म केही काम नगर्ने भनी आन्दोलन गरेका थिए। उनीहरुको आन्दोलन सकिन नपाउँदै कानुन व्यवसायीहरुले बहस नगर्ने घोषणा गरेपछि देशभर मुद्दाको सुनुवाइ प्रभावित भएको छ।
कानुन व्यवसायीहरुले आइतबार साढे दुई बजेपछि देशभरका अदालतमा बहस नगर्ने घोषणा गरेपछि प्रभावित भएको हो। नेपाल बार एशोसियसनका अध्यक्ष गोपालकृष्ण घिमिरेले देशभरका कानुन व्यवसायीहरुले स्वत: स्फूर्त रुपमा अदालतमा बहस नगर्ने निर्णय गरेको बताए।
‘देशभरबाट बारले निर्णय गर्नुपर्ने दबाब आइरहेको छ। साथीहरुले बहस गर्दैनौं भनेका छौं,’ घिमिरेले भने, ‘कर्मचारीले घुस मागेपछि सुरु भएको विवाद रहेछ। अदालतमा बसेर घुस खाने कुरा संस्थागत हुने दिने पक्षमा बार छैन।’
गत बुधबार अपराह्न ललितपुर जिल्ला अदालतमा कार्यरत नायब सुब्बा प्रेमिका तामाङमाथि अधिवक्ता अमिर लामिछानेले हातपात गरेको घटनापछि अदालत प्रशासनका कर्मचारी र कानुन व्यवसायी एक अर्काको विरोधमा कार्यक्रमसहित उत्रिएका हुन्।
बार अध्यक्ष घिमिरेले कानुन व्यवसायी लामिछानेमाथि गलत ढंगले कारबाही गर्न खोजिएको भन्दै आइतबार साढे दुई बजेदेखि देशभरका अदालतमा कानुन व्यवसायीले बहस नगर्ने भन्ने मागका विषयमा छलफलपछि बारले समर्थनको निर्णय गर्ने बताए।
उनले कानुन व्यवसायीका तर्फबाट दिइएको जाहेरी पनि दर्ता नभएकाले अफूहरु विरोधमा रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
