काठमाडौं– कोशी प्रदेशमा नयाँ सरकार गठनका लागि आइतबार प्रदेश प्रमुख पर्शुराम खापुङले आह्वान गर्ने तयारी गरेका छन्। सरकार गठनको प्रस्ताव आह्वानका लागि प्रदेश प्रमुख खापुङले शुक्रबार र शनिबार दलहरुसँग छलफल गरेका थिए।
कोशी प्रदेशमा एमाले नेतृत्वको सरकार ढलेसँगै नयाँ सरकार गठनका लागि उनले दलहरुसँग छलफल अघि बढाएका थिए। प्रदेश प्रमुखको सचिवालयले भने सरकार गठनका लागि कानुनविद्हरुसँग परामर्श भइरहेको र सम्भवत: आइतबारसम्म आह्वान हुने बताएको छ।
प्रदेश प्रमुख खापुङ संविधानको धारा १६८ को उपधार २ वा ३ कुन अनुसार सरकार गठनको आह्वान गर्ने भन्नेबारे कानुनी परामर्शमा छन्। प्रदेश प्रमुखको कार्यालयका निमित्त सचिव नरेन्द्रकुमार श्रेष्ठले केही दिनदेखि छलफल चलिरहेको र आइबार आह्वान हुने बताए। संविधानको धारा १६८ को कुन उपधाराअनुसार आह्वान गर्ने भन्ने विषयमा कानुनी परामर्श भइरहेको उनले बताए।
कोशी प्रदेशका मुख्यमन्त्री हिक्मत कार्कीले राखेको विश्वासको मतको प्रस्ताव शुक्रबारको प्रदेशसभाबाट असफल भएको थियो। कार्कीले ४६ मत मात्र पाएका थिए। विश्वासको मत गुमाएका कारण उनी पदमुक्त भए।
संविधानको धारा १६८ को उपधारा (२) अन्तर्गत बनेको कार्की नेतृत्वको सरकार ढलेसँगै अब संविधानको सोही धाराको उपधारा (३) अनुसार सरकार गठनको प्रस्ताव आह्वान हुनुपर्ने दाबी एमालेले गरेको छ। तर नेपाली कांग्रेस, माओवादी केन्द्र लगातयका दलहरुले पहिला धारा १६८ को उपधारा (२) अनुसारको मौका दिनुपर्ने दाबी गर्दै आएका छन्। यसरी २ थरी दाबीका कारण प्रदेश प्रमुख कानुनी परामर्शमा लागेका हुन्।
गठबन्धनका नेताहरु काठमाडौंमा
नेपाली कांग्रेस, माओवादी केन्द्र लगायत केन्द्रीय तहमा गठबन्धन गरेका दलहरु सरकार बनाउनका लागि तीव्र छलफलमा लागेका छन्। प्रदेश प्रमुखबाट संविधानको धारा १६८ को (२) अनुसार नै सरकार गठनको आह्वान हुने सम्भावना जीवित रहेको भन्दै उनीहरुले छलफल तीव्र पारेका हुन्।
गठबन्धन दलका नेता तथा सांसदहरुले शुक्रबार नै प्रदेश प्रमुखलाई आफूहरुले बहुमत पुर्याएर सरकारको दाबी गर्ने जानकारी गराएका थिए। यसैका लागि केही नेताहरु काठमाडौं आएका छन्।
माओवादी केन्द्रका १ जना प्रदेश सभा सदस्यले ३ तलका नेताहरु केन्द्रीय तहमा छलफल र सहमतिका लागि काठमाडौं गएको र आइतबार फर्केपछि प्रदेशमा छलफल हुने बताए।
कोशी प्रदेशको मुख्यमन्त्रीमा नेपाली कांग्रेस र माओवादी केन्द्र दुवैको दाबी छ। हालसम्म नेकपा एमालेसँगको गठवन्धनमाा ४६ र विपक्षीसँग पनि ४६ मत रहेको छ। सरकार गठनका लागि ४७ मत आवश्यक हुन्छ। त्यसका लागि एमालेले १ सिट भएको जसपालाई फकाउने प्रयास गरिरहेको छ भने विपक्षीले ६ सिट भएको राप्रपालाई फकाउने प्रयास गरिरहेका छन्।
उपधारा २ अनुसार आह्वान भएर पुग्न नसकेमा उपधारा ३ अनुसार एमालेले नै पहिलो दलको रुपमा सरकार बनाउने अधिकार पाउने छ। सरकार गठन भएको ३५ दिनभित्र मुख्यमन्त्रीले प्रदेश सभाबाट विश्वासको मत लिनुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
