काठमाडौं- १० पुस २०७९ मा बनेको तत्कालीन एमाले-माओवादी केन्द्र सहितको गठबन्धनका सबै अवशेष अन्त्य भएका छन्। शुक्रबार कोशी प्रदेशका मुख्यमन्त्री हिक्मत कार्कीको सरकार ढलेसँगै केन्द्रदेखि ७ वटै प्रदेशमा नेकपा एमाले ‘अलआउट’ भएको छ।
कहिले-कहिले आउट भयो एमाले?
पुष्पकमल दाहाल ‘प्रचण्ड’ नेतृत्वको संघ सरकारबाट एमालेले फागुन १५ गते आफ्ना मन्त्रीहरुलाई फिर्ता बोलायो। र, लगत्तै सरकारलाई दिएको समर्थन पनि फिर्ता लियो।
राष्ट्रपति एमालेलाई दिने समझदारीबाट प्रधानमन्त्री प्रचण्डले फागुन १३ गते पछि हटेर कांग्रेसलाई समर्थन गरेपछि पुस १० को गठबन्धन भत्किएको थियो। जसको बाछिटा क्रमश: प्रदेशहरुमा पनि पर्दै गयो।
कोशीमा शुक्रबार ढल्यो
एमालेका हिक्मत कार्की माओवादी केन्द्र, राप्रपा, जसपा सहितको समर्थनमा पुस २४ गते सत्तारोहण गरेका थिए। आर्थिक वर्ष २०८०/८१ को बजेटको मुखैमा माओवादी र जसपाले समर्थन फिर्ता लिएपछि उनी अल्पमतमा परेका थिए।
तर, आफूमाथि सांसदहरुको विश्वास छ भनेर संसदमा परीक्षणमा उभिएका कार्की शुक्रबार अल्पमतमा परेको गणितीय अङ्कसहित सरकारबाट वहिर्गमन भएका छन्।
मधेस प्रदेशको सरकार चैत २१ मै छोडेको
संघमा फागुन १३ गते फेरिएको गठबन्धनको बाछिटा देखिने क्रम तत्कालीन समयमै सुरु भएको थियो। तर जसपाले संघमा गठबन्धन फेरे पनि यो प्रदेशमा एमालेले समर्थन कायमै राखेको थियो। उसका ४ मन्त्री र १ राज्यमन्त्री जसपाकै मुख्यमन्त्रीको नेतृत्वमा रहिरहेका थिए। अन्य प्रदेशमा पर्ने गठबन्धनको असरलाई जोगाउन एमालेले आफ्ना मन्त्रीहरु चैत २१ सम्म राख्यो। तर समर्थन भने जेठ १ गतेसम्म राखिरह्यो।
एमालेले दिएको समर्थन फिर्ता लिएपछि मधेस प्रदेशका मुख्यमन्त्री सरोजकुमार यादवले जेठ ३० गते संवैधानिक आधारमा विश्वासको मत लिए। २९ दिनअघि सरकारप्रति अविश्वास देखाएको एमालेले यो दिन भने विश्वास प्रकट गर्यो र मत जाहेर गर्यो।
यो मत सायद एमालेले कोशीको सम्भावित दृश्यलाई लिएर दिएको थियो। कोशीमा जसपाकी १ सांसद छिन्। उनले शुक्रबार आफ्नो मत एमालेका कार्कीलाई दिएकी भए उनि जोगिने थिए। तर मधेसमा एमालेले लगाएको गुन आजलाई भने कामयावी भएन।
बागमतीबाट चैत १० गते बाहिरेको एमाले
यो प्रदेशमा एमाले माओवादी केन्द्रका नेता शालिकराम जम्मकट्टेलको नेतृत्वमा पुस २५ गते सहभागी भएको थियो। एमालेका ४ मन्त्रीले चैत १० गते राजीनामा बुझाउँदै सरकारलाई दिएको समर्थन पनि फिर्ता लिएका थिए।
१०५ दिन सरकारको नेतृत्व गरेर एमालेले छोडेको थियो गण्डकी
यो प्रदेशमा एमालेका नेता खगराज अधिकारीले १०५ दिन नेतृत्व गरेका थिए। पुस २५ मा एमालेसहित माओवादी केन्द्र र राप्रपाको समर्थनमा मुख्यमन्त्री बनेका अधिकारीलाई माओवादीले समर्थन फिर्ता लिएर पछि अल्पमत हुँदै सरकारबाट आउट भएका थिए।
वैशाख ९ गते संसदमा आफूमाथि विश्वास रहेको प्रस्ताव राखे पनि अस्वीकृत भएपछि उनले सत्ता हस्तान्तरण गर्नुपरेको थियो। यो प्रेदशमा अहिले कांग्रेसको नेतृत्वमा सरकार छ।
लुम्बिनीमा एमाले वैशाख ११ मै आउट
यो प्रदेशमा एमालेका लिला गिरीको नेतृत्वमा सरकार थियो। उनलाई माओवादी केन्द्र, राप्रपा, नागरिक उन्मुक्ति, जसपा, लोसपा, जनमत पार्टी, स्वतन्त्र सांसदको समर्थन थियो। उनी पुस २७ गते मुख्यमन्त्री भएका थिए।
माओवादी सहितका दलले उनलाई दिएको समर्थन फिर्ता लिएपछि वैशाख ११ मा विश्वासको मत माग्न संसद उपस्थित भएका गिरी सोही दिन अल्पमत परेर ढलेका थिए।
कर्णालीमा चैत २७ सम्म सरकारमा
यो प्रदेशमा माओवादी केन्द्रका राजकुमार शर्माको नेतृत्वको सरकारमा एमाले सहभागी थियो। ३ वटा मन्त्रालयको नेतृत्व लिएको यो प्रदेशमा एमाले सरकारमा चैत २७ गतेसम्म रहेको थियो।
सुपः बहुमत नजुटाउँदा ३० दिनमै सरकारबाट आउट
तत्कालीन गठबन्धनको भागबण्डामा सुदूरपश्चिम प्रदेश सरकारको नेतृत्व एमालेले गर्ने सहमति भएको थियो। पुस २७ गते एमालेका राजेन्द्रसिंह रावलले आफूमाथि बहुमत सांसदको समर्थन रहेको भन्दै मुख्यमन्त्रीमा दाबी गरेका थिए।
हुन पनि उनलाई माओवादी केन्द्र, नागरिक उन्मुक्ति र राप्रपाको समर्थन रहेको देखिन्थ्यो। तर जब माघ २६ गते आफूलाई विश्वासको मत मागे निर्णायक रहेको नागरिक उन्मुक्तिले उनलाई मत दिएन। फलतः उनको सरकार सोही दिन ढल्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
