काठमाडौं- प्रधानमन्त्री पुष्पकमल दाहाल प्रचण्डले सामाजिक सञ्जालका चित्रहरुले राष्ट्रका प्राथमिकताहरुलाई विषयान्तर गरिरहेको भान हुने गरेको बताएका छन्। बुधबार प्रतिनिधि सभामा सम्बोधन गर्दै उनले गम्भीर भएर सोच्ने बेला आएको बताए।
'कतै हामीबीच विषय विज्ञता भन्दा, ज्ञान र विवेकभन्दा निन्दावाजी र आवेग त हाबी हुँदै गएको छैन? जनताका वास्तविक मुद्दाहरु हराउँदै गएर सतही, सस्ता र बजारु विषयले महत्त्व पाएर जनतामा निराशा र असन्तुष्टि फैलाउने काम त हामीले गरिरहेका छैनौँ? कतै हाम्रै व्यवहारले राजनीतिको चरित्र र चेहरा त कमजोर बनिरहेको छैन?', उनको प्रश्न थियो।
उनले लोकतन्त्र अब भावनात्मक आधारले मात्रै सुदृढ नुहने कुरा सत्य रहेको बताए। त्यसलाई तथ्यात्मक आधार चाहिने उनको भनाइ छ। प्रचण्डले नयाँ पुस्तामा भ्रम पार्न खोजिएको पनि बताए।
'मतदाताका नाममा देशमा एउटा नयाँ पुस्ता तयार भइसकेको छ। त्यस्तो पुस्ता, जसले युद्धको जिजीविषा देख्नुपरेन। विद्यालयमा पुग्न तीन चार घण्टा पैदल हिँड्नुपरेन। त्यो पुस्ताले यो देशमा कुनै दिन इन्टरनेट, टेलिफोन काटेर एयरपोर्ट र सडकसम्म बन्द गरेर देशमा चलाइएको शाही शासन देखेन। सञ्चारगृहमै पसेर बर्दीधारीहरुले सम्पादकहरुलाई के छाप्ने, के देखाउने, के सुनाउने भनेर निर्देशन दिन्थे, भन्ने इतिहास पनि आज सोसल मिडियामा उन्मुक्त पुस्तालाई थाहा छैन। आज त्यो पुस्तालाई हिजो देशमा दूधकै नदी बहन्थ्यो भन्ने भाष्य खडा गरेर लोकतन्त्रबाट दिग्भ्रमित पार्ने अधिकार हामी कसैलाई पनि छैन', उनले भने।
प्रचण्डले २० वर्षअघि र आजको जनताको जीवनस्तरमा आएको परिवर्तनलाई बिर्साउन खोजिएको बताए। सुशासनको प्रत्याभूति गर्दै लोकतन्त्रको सुदृढीकरणका लागि सिंगो संसद् एक ठाउँमा उभिने छ भन्ने आफ्नो विश्वास सुदृढ हुँदै गएको उनको भनाइ छ।
'हाम्रो सार्वजनिक बहसको स्तर खस्किँदै गएको छ। चौतर्फ अविश्वास खडा गर्ने र लोकतान्त्रिक संस्थाविरुद्ध मोहभंग गर्ने प्रयासहरु भइरहेका देखिन्छन्', उनले भने।
प्रधानमन्त्री प्रचण्डले संसद्सँगै पनि कहिलेकाहीँ आफ्नो गुनासो रहने गरेको बताए। उनले भने, 'भर्खरको मेरो भारत भ्रमणमा बर्षौंदेखि रोकिएको नेपाल-भारत पारवाहन सन्धि संशोधनसहित नवीकरण गरियो। भारत र तेस्रो विश्वसम्म विद्युत निर्यातका लागि ऐतिहासिक ब्रेकथ्रु भयो। तर हामीले यति ठूला उपलब्धिलाई छाडेर मुर्रा राँगो कि भैंसी भनेर विवादमा संसद्को लामो समय लियौँ। यस्ता घटनाबाट जनतामा पर्ने प्रभावबारे सम्मानित सदन गम्भीर हुने छ भन्ने म विश्वास व्यक्त गर्न चाहन्छु।'
उनले देशमा केही हुँदैन, अवस्था बदलिनेवाला छैन भन्ने हिन भावनाबाट माथि नउठेसम्म देशले आफैंमाथिको विश्वास फर्काउन नसक्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
