नयाँ दिल्ली– सुन्दर, चञ्चले अभिनेत्री। जसको शैली र सौन्दर्य पहिलो फिल्म प्रदर्शनको बेला बलिउडमा समाचारको हेडलाइन बनेको थियो।
जो फिल्मी पृष्ठभूमिबाट नभए पनि ठूला निर्देशकको फिल्ममा लन्च भइन्। र आफ्नो पहिलो फिल्मबाट नै पर्दामा हावी भइन्। उनी थिइन् काजल किरण।
काजल पहिलो फिल्ममा काम गर्न उनी स्कुल बंक गरेर सुटिङमा जान्थिन्। पहिलो फिल्मबाटै रातारात स्टार बनेकी उनलाई फिल्म समीक्षकले ‘हिट फिल्मको फ्लप हिरोइन’को उपाधि दिएका थिए।
१३ वर्षको करियरमा ४० चलचित्र
पृष्ठभूमि फिल्मी नभए पनि ८० को दशकमा उनले चलचित्र क्षेत्रमा राज गरिन्। उनले १३ वर्षको छोटो करिअरमा करिब ४० वटा फिल्म गरिन्। त्यसपछि चुपचाप फिल्मी संसारबाट विश्राम लिइन्।
को हुन काजल किरण?
काजल किरणको जन्म १८ अक्टोबर १९५८ मा मुम्बईमा भएको थियो। उनको वास्तविक नाम सुनिता कुलकर्णी थियो। तर फिल्ममा अभिनय गरेपछि उनको नाम परिवर्तन गरिएको थियो। उनी मध्यमवर्गीय महाराष्ट्रिय परिवारबाट थिइन्।
काजलले आफ्नो व्यक्तिगत जीवनलाई धेरै गोप्य राखे पनि उनीबारे धेरैजसो कथा र किस्सा बाहिर आएका छन्। काजल किरण आफ्ना दाजुभाइमध्ये जेठी थिइन्।
उनका दुई साना भाइ पनि थिए। काजल पढेर डाक्टर बनोस् भन्ने उनको आमाबुवाको चाहना थियो, तर मन अभिनयमा थियो।
जब नासिर साहब काजलबाट प्रभावित भए
पढाइ पूरा हुनुअघि नै केही साथीहरूको आग्रहमा काजल किरणले आफ्नो फोटोसुट गराइन् र धेरै कास्टिङ डाइरेक्टरलाई पठाइन्। यो क्रम केही दिनसम्म चल्यो।
उनी धेरै स्टुडियो पनि गइन्। धेरै फिल्मका लागि निर्माताहरूसँग भेट गरिन्। त्यही बेला उनको भेट फिल्म निर्देशक नासिर हुसेनसँग भयो।
उनलाई भेटेर नासिर प्रभावित भए। उनको स्टाइलिस लुक, सुन्दर आँखा र बोल्ने तरिका सबै फिल्ममेकरलाई मन पर्यो र उनीहरूले काजललाई आफ्नो फिल्ममा साइन गरे।
पहिलो फिल्मबाट नै स्टार
सन् १९७७मा ऋषि कपूर र काजल फिल्म ‘हम किसी से कम नही’ मा मुख्य भूमिकामा देखिएका थिए। त्यतिबेला काजल स्कुल पढ्दै थिइन्।
यो फिल्म बक्स अफिसमा हिट साबित भयो र काजल रातारात स्टार बनिन्। यसले क्लासिक फिल्मको हैसियत पायो र काजल पनि सबैको नजरमा परिन्। उनको अभिनयले अझै ठूला ब्यानरका फिल्म पाउने आशा काजललाई थियो। तर त्यो हुन सकेन।
जब काजल किरण ‘हम किसी से कम नही’ को सुटिङ गरिरहेकी थिइन्, निर्देशक नासिर हुसैनले उनलाई फिल्म रिलिज नभएसम्म कुनै पनि फिल्म साइन नगर्न भनेका थिए। यही कारणले गर्दा फिल्म निर्माताहरूले उनलाई अन्य फिल्मका लागि सम्पर्क गरेनन्। किनकि उनीहरूलाई थाहा थियो कि किरण र हुसैनबीच ३ वर्षको सम्झौता भएको छ। यसरी काजलको हातबाट ‘बालिका बढु’ र ‘आँखियों के झरोखो से’ जस्ता फिल्महरु निस्किए। यसमा उनले निकै पश्चाताप मानिन्।
काजलले सन् १९८० मा अर्को फिल्म ‘माङ भरो सजना’ साइन गरेकी थिइन्। जसमा जितेन्द्रको अपोजिटमा काजलले ‘गीता सिन्हा’को भूमिका निर्वाह गरेकी थिइन्।
यस फिल्ममा रेखा र मौसमी चटर्जी पनि देखिएका थिए। काजलको यो फिल्मले पनि व्यावसायिक सफलता हासिल गर्यो र यो वर्षको आठौं सबैभन्दा धेरै कमाउने फिल्म बन्यो।
सोही वर्ष काजल हरर फिल्म ‘सबूत’ मा देखिएकी थिइन्। फिल्मले खासै सफलता हासिल गर्न सकेन र बक्स अफिसमा कमाइ पनि गर्न सकेन।
फिल्म समीक्षकहरूले यस्ता फिल्महरू गर्नु फिल्मी करिअरको सुरुवातमा नभई पछिसम्म महँगो पर्न सक्ने लेखेका थिए। पछि भयो पनि यस्तै।
जब फिल्मबाट घाटा मात्रै
काजलले चलचित्र ‘मोर्चा’को चर्चित गीत ‘अबकी बरस’मा पहिलोपटक डान्सरको भूमिका निर्वाह गरेकी थिइन्। १९८१मा, किरणले एक जासूस थ्रिलर फिल्म वरदातमा एक नायिकाको रूपमा काम गरिन्।
जसमा उनीसँगै मिथुन चक्रवर्ती देखिएका थिए। यो फिल्मबाट मिथुनको करिअरलाई फाइदा भयो तर काजलले खास केही गर्न सकेन। त्यसपछि उनी फिल्म ‘हमसे बधकर कौन’ मा देखिइन्।
यो फिल्म बक्स अफिसमा हिट भयो तर धेरै सुरुआतका कारण यो फिल्मले पनि उनको करिअरमा खासै काम गर्न सकेन।
किरणले पछि १९८३मा बलिउड एक्सन ‘फिल्म हमसे है’ जमानामा छुटकीको रूपमा अजमद खानको अपोजिट भएर अभिनय गरिन्। यसबाट पनि काजललाई फाइदा भएन। विस्तारै उनी फिल्म क्षेत्रबाट गुमनाम भइन्।
(यो सामग्री लिउड सञ्चारमाध्यमको सहयोगमा तयार पारिएको हो।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764053873.png)
-1758539596-1762682671.jpeg)
-1763721444.png)
-1763559424.jpg)
-1763559424.jpg)
