काठमाडौं– माओवादी केन्द्रसहित ४ दलले आज (सोमबार) समाजवादी मोर्चा घोषणा गर्ने भएका छन्। आइतबार ४ दलका नेताहरुबीच जुटेको सहमतिअनुसार मोर्चा घोषणा हुन लागेको हो।
नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) र नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी सम्मेलिन मोर्चा घोषणा हुन लागेको हो। सोमबार दिउँसो ३ बजे राष्ट्रिय सभा गृहमा एक कार्यक्रममार्फत् मोर्चा घोषणा गरिने नेताहरुले जनाएका छन्।
प्रधानमन्त्रीको सरकारी निवास बालुवाटारमा आइतबार बसेको नेताहरुको बैठकले सोमबार मोर्चा घोषणा गर्ने सहमति गरेको थियो।
आइतबार बिहान प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधव कुमार नेपाल, जनता समाजवादी पार्टीका अध्यक्ष उपेन्द्र यादव र नेकपाका महासचिव नेत्रबिक्रम चन्दबीच बालुवाटारमा मोर्चा घोषणाबारे छलफल भएको थियो।
नेताहरुले सोमबार मोर्चा घोषणा गर्ने सहमति गरेको जसपाका नेता राजेन्द्र श्रेष्ठले जानकारी दिए। श्रेष्ठका अनुसार सुरुमा नीतिगत सहमति मात्र घोषणा गर्ने तयारी छ।
मोर्चामा पूर्वप्रधानमन्त्री डा बाबुराम भट्टराईलाई समेट्ने भन्दै घोषणा मिति केही समयलाई सारिएको थियो। भट्टराईले प्रधानमन्त्री प्रचण्डलाई भेटेर ‘हतार गर्न नहुने’ भनेपछि यसअघि शुकरबारलाई तय भएको घोषणा कार्यक्रम सरेको थियो।
तर अहिलेलाई भने भट्टराईसँग छलफल जारी राखेर मोर्चा घोषणा गर्ने सहमति भएको जसपा नेता श्रेष्ठले जानकारी दिए।
नेताहरूबीच भएको सहमतिअनुसार, मोर्चाको नेतृत्व आलोपालो गर्ने तय भएको छ। तत्काललाई केन्द्रीय मोर्चा घोषणा गर्ने र आवश्यकताका आधारमा तल्लो तहसम्म संरचना बनाउने श्रेष्ठले बताए।
विभिन्न राजनीतिक, सामाजिक तथा आर्थिक प्रतिबद्धतासहित मोर्चाको आधारपत्र तयार पारिएको नेताहरुले जनाएका छन्। संविधानको रक्षा तथा कार्यान्वयन, समयसापेक्ष संशोधन, परिमार्जन र विकास गर्ने मोर्चाको प्रमुख घोषणा हुने बताइएको छ। मोर्चाको दस्तावेजमा शान्ति प्रक्रिया बाँकी काम पुरा गर्ने र देशलाई अग्रगामी निकास दिने प्रतिबद्धता पनि जनाइएको छ।
संघीय शासन प्रणालीमा आधारित समतामूलक, न्यायपूर्ण, विभेदरहित समाजवादी गणतन्त्रात्मक व्यवस्था स्थापना गर्ने उद्देश्यले समाजवादी मोर्चा, नेपाल गठन गर्न सहमत भएको भनेर दस्तावेजको प्रस्तावनामा लेखिएको नेताहरुले जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
