भैरहवा–काठमाडौंमा हुने बिमस्टेक सम्मेलनमा भाग लिन आउने श्रीलंका र म्यानमारका राष्ट्रपति बुद्धको जन्मस्थल लुम्बिनी भ्रमणमा आउने भएका छन्। यसका लागि लुम्बिनीमा धमाधम तयारी थालिएको छ। लुम्बिनीमा सरसफाइ र शृंगारका काम तीव्र गतिमा अगाडि बढाइएको छ।
सम्मेलन सुरु हुनुअघि भदौ १३ गते म्यानमारका राष्ट्रपति विन मिन्ट र सम्मेलन समापनपछि भदौ १६ गते श्रीलंकाका राष्ट्रपति मैत्रिपाल सिरिसेना लुम्बिनी भ्रमणमा आउने भएका हुन्। सम्मेलन सुरु हुनुअघि लुम्बिनी भ्रमणमा आउने म्यानमारका राष्ट्रपति काठमाडौंबाट चार्टर विमानमार्फत भैरहवा विमानस्थलमा र त्यहाँबाट हेलिकप्टरमार्फत लुम्बिनी जानेछन्। उनी लुम्बिनी पुगेपश्चात् मायादेवी मन्दिरको अवलोकन र पूजाआजा गर्ने बताइएको छ।
मन्दिर परिसरमा लुम्बिनीको गुरुयोजनाबारे बिफ्रिङ गर्ने कार्यक्रमसमेत रहेको छ। त्यसपछि उनी ध्यानकेन्द्रमा गएर पूजाआजा गर्ने र केही समय ध्यान गरेर फर्किने कार्यक्रम रहेको लुम्बिनी विकास कोषका योजना प्रमुख सरोज भट्टराईले जानकारी दिए। त्यस्तै सम्मेलन समापनपछि लुम्बिनी भ्रमणमा आउने श्रीलंकाका राष्ट्रपति पनि सोही अनुसार काठमाडौं चार्टर विमानमार्फत भैरहवा विमानस्थलमा आउने र त्यहाँबाट हेलिकप्टरमार्फत लुम्बिनी पुग्नेछन्।
त्यसपछि उनले मायादेवी मन्दिर अवलोकन पछि पूजाआजा र उनलाई पनि लुम्बिनीबारे बिफ्रिङ गरिनेछ। उनी श्रीलंकाद्वारा निर्मित गुम्बाको अवलोकन गर्ने कार्यक्रम रहेको भट्टराईले जानकारी दिए। त्यसपश्चात् श्रीलंकाद्वारा निर्मित गेस्ट हाउसको अवलोकन साथै त्यहाँ वृक्षारोपणको कार्यक्रम रहेको योजना प्रमुख भट्टराईले बताए।
उनले राष्ट्रपतिहरूको स्वागतको लागि लुम्बिनी विकास कोष तयार रहेको बताउँदै उनीहरूको स्वागतमा कुनै कमी हुन नदिने बताए। राष्ट्रपतिहरू लुम्बिनी आउने भएपछि सुरक्षा व्यवस्था कडा पारिएको रुपन्देहीका प्रमुख जिल्ला अधिकारी उदय बहादुर रानाले बताए।
लुम्बिनीमा उनीहरुको लागि सुरक्षा थ्रेटको विश्लेषण गर्दै सोहि अनुसार सुरक्षा प्रबन्ध मिलाइएको उनले दाबी गरे। ‘उनीहरू कहाँकहाँ जान्छन् त्यो सबै स्थानको हामीले म्याप बनाएर सुरक्षा योजना तयार पारेर कार्यान्वयन गरिरहेका छौँ,’ प्रजिअ रानाले भने, ‘उनीहरूको सुरक्षामा कुनै कमी हुनेछैन।’ राष्ट्रपतिहरूको लुम्बिनी भ्रमणको क्रममा उनीहरुको सुरक्षाको लागि देशको चार वटै सुरक्षा निकायलाई परिचालन गरिने उनको भनाइ छ।
राष्ट्रपतिहरूलाई पहिलो घेरामा नेपाल प्रहरी, दोस्रोमा सशस्त्र प्रहरी र तेस्रो घेरामा नेपाल सेनाले सुरक्षा दिनेछ। राष्ट्रिय अनुसन्धान विभाग भने गोप्य रुपमा परिचालन हुनेछ। उनीहरुको सुरक्षार्थ कुल एक हजार ६ सय सुरक्षाकर्मीहरू परिचालित हुनेछन्।
श्रीलंकाका राष्ट्रपतिलाई तामिल टाइगर र म्यानमारको राष्ट्रपतिलाई रोहिंग्याबाट सुरक्षा खतरा रहेको सुरक्षा निकायको विश्लेषण छ। उनीहरुलाई सुरक्षा खतरा रहेको विश्लेषण गरिए पनि हालसम्म कुनै किसिमको खतरा नरहेको प्रहरी स्रोतले बताएको छ।
अगामी भदौ १३ र १६ गते केही समयको लागि सर्वसाधरण, श्रद्धालु, भक्तजन, पर्यटक लगायत सबैलाई लुम्बिनी विकास कोष क्षेत्रमा प्रवेशमा रोक लगाइने भएको छ। लुम्बिनी भ्रमणका लागि आउने विदेशी राष्ट्रपतिहरूको सुरक्षार्थ सर्वसाधरणहरूलाई लुम्बिनी विकास कोष क्षेत्रमा प्रवेशमा रोक लगाइने भएको हो। पाहुनाहरूको लुम्बिनी भ्रमणको बखत उनीहरूको सुरक्षार्थ ३ वर्ग माइल क्षेत्रमा फैलिएको लुम्बिनी विकास कोषमा सर्वसाधरणहरुलाई प्रवेशमा रोक लगाइने उनले बताए।
यो कार्य सुरक्षा योजना अन्तर्गतको हो। पाहुना लुम्बिनी आउनुअघिदेखि उनीहरू नफर्किएसम्म लुम्बिनी विकास कोष क्षेत्रमा सर्वसाधरणलाई प्रवेशमा निषेध लगाइने भएको छ। राष्ट्रपतिहरू भैरहवाबाट हेलिकप्टरमार्फत लुम्बिनी जाने कार्यक्रम रहेपनि उनीहरूको टोलीमा रहेका अन्य पाहुना सदस्य सडकमार्फत नै लुम्बिनी जानेछन्। जसका लागि सडकमा भएको खाल्डाखुल्डी तत्काल पुर्नका लागि निर्देशन दिएको प्रजिअ रानाले बताए।
उनले सवारी आवगमनमा सहजताका लागि सडकमा भएका खाल्डाखुल्डी तत्काल पुर्नका लागि सडक डिभिजन, भैरहवा तौलिहवा सडकखण्ड आयोजना र लुम्बिनी सांस्कृतिक नगरपालिकालाई निर्देशन दिई सकिएको बताए।राष्ट्रपतिहरूको लुम्बिनी भ्रमणको क्रममा हुनसक्ने घटनालाई मध्यनजर गर्दै रुपन्देही प्रशसानले चिकित्सक टोली, एम्बुलेन्स र दमकल समेत स्ट्यान्ड बाईमा राख्ने छ।
पाहुनाहरूमध्ये कसैलाई स्वास्थ्य समस्या भएमा तत्काल उपचारको लागि समेत व्यवस्था मिलाइएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770871670.png)
-1770871503.png)
-1764146706.png)
-1770562345.jpg)
