डडेलधुरा– सरकारले घोषणा गरेको डडेलधुरा मेडिकल कलेज सञ्चालनमा ल्याउन रणनीतिक योजना बनाएर काम अघि बढाइएको छ। मेडिकल कलेज सञ्चालनका लागि सुदूरपश्चिम विश्वविद्यालयको नाममा डडेलधुराको तुफानडाँडास्थित ८४ रोपनी जग्गा प्राप्त भइसकेको छ।
त्यसैगरी डडेलधुरा अस्पतालको नाममा २३४ रोपनी जग्गा छ। सुदूरपश्चिम विश्वविद्यालयले डडेलधुरामा डीनको कार्यालय स्थापना गरेर कलेज निमार्णको प्रक्रिया अघि बढाएको हो। अहिले प्रशासनिक भवन निर्माण, छात्रवासलगायतका संरचना निमार्णका लागि डिपीआर निमार्णको काम भइरहेको विश्वविद्यालयका उपकुलपति अम्मराज जोशीले बताए।
‘बोलपत्र आह्वान गरेर डीपीआर निमार्णको प्रक्रिया अघि बढिसकेको छ,’ उपकुलपति जोशीले भने, ‘हामीले यसै शैक्षिक शत्रदेखि विद्यार्थी भर्ना गर्ने गरी काम गरिरहेका छौँ।’ विश्वविद्यालयले अहिले पाठ्यक्रम निमार्णको काम अन्तिम चरणमा पुर्याएको उनले बताए।
‘मेडिकल कलेजमा ५ विषयको अनुमति लिनेछौँ। तत्काललाई २ विषयको मात्रै अध्ययन हुन्छ,’ उनले भने, ‘अहिले डडेलधुरा अस्पतालमा १०० शय्या सञ्चालनमा छन्, त्यसलाई थप गरेर सुरुवातमा ३०० शय्याको अस्पताल सञ्चालन हुनेछ।’
सरकारले डडेलधुरा अस्पताललाई सुदूरपश्चिम विश्वविद्यालयको आंगिक क्याम्पसका रुपमा सञ्चालन गर्ने निर्णय गरे पनि बजेट निकासा नहुँदा मेडिकल कलेज सञ्चालन हुन सकेको थिएन। ‘डडेलधुरामा मेडिकल कलेज सञ्चालनमा आए सुदूरपश्चिम प्रदेश क्षेत्रका विद्यार्थीलाई चिकित्सा शिक्षामा पहुँच विस्तार हुनेछ, प्रदेशभरी विशेषज्ञ उपचार सेवामा पहुँच पुग्ने छ,’ जोशीले भने, ‘विशेषगरी सुदूरपश्चिमका पहाडी जिल्लाका नागरिकले छिटोछरितो स्वास्थ्य सेवा पाउने छन्।’
मेडिकल कलेजका लागि स्वास्थ्य तथा जनसंख्या मन्त्रालय, शिक्षा, विज्ञान तथा प्रविधि मन्त्रालय र सुदूरपश्चिम विश्वविद्यालयबीच त्रिपक्षीय सम्झौता भइसकेको उपकुलपति जोशीले बताए। यसैगरी मेडिकल कलेजका डीन डा हेमनाथ जोशीले अहिले डडेलधुरा क्षेत्रीय अस्पतालमा १०० शय्या मात्रै सञ्चालनमा रहेकाले स्नातक तहको मात्रै अध्ययन गर्न सकिने बताए।
‘अस्पतालको भवन निर्माण भइरहेको छ, अझै ८/९ महिना समय लाग्छ,’ उनले भने, ‘स्नातक तहको अध्ययनका लागि चिकित्सा शिक्षा आयोगलाई पत्र पठाइसकेका छौँ।’ उनले चिकित्सा शिक्षा आयोगबाट अनुमति पाए आउँदो फागुन/चैतबाट विद्यार्थी भर्ना गर्ने तयारी भइरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
