काठमाडौं– नक्कली भुटानी शरणार्थी प्रकरणमा जिल्ला सरकारी वकिलको कार्यालयले ३० जनालाई प्रतिवादी बनाउदै पाँच अभियोगमा मुद्दा दायर गरेको छ।
सुरुमा ठगीमा अनुसन्धान सुरु भएको मुद्दा संगठित अपराध हुँदै पाँच अभियोग दाबी गर्दै जिल्ला अदालतमा मुद्दा दायर भयो। अन्य २ अभियोगमा अनुसन्धान गर्ने निकायहरुलाई अनुसन्धानको बाटो पनि खोलिएको छ।
सरकारी वकिलको कार्यालयले यो प्रकरणमा अझै अनुसन्धान हुनुपर्ने पहिलो अभियोगपत्रले देखाएकाले थप अनुसन्धान गर्न प्रहरीलाई निर्देशन दिएको छ। जिल्ला सरकारी वकिल कार्यालयका प्रमुख अच्चुतमणि नेउपानेले बयानमा नाम आएका व्यक्ति र अनुसन्धानपछि खुल्ने अन्य व्यक्तिहरुलाई केन्द्रित गरेर अनुसन्धान जारी राख्न निर्देशन दिएको बताए।
‘बयानमा क्रममा आएका नामजति सबै र त्यसपछि खुल्ने अन्य प्रतिवादीको हकमा अनुसन्धान जारी राख्न भनेका छौं, ’ उनले भने, ‘अनुसन्धानको प्रतिवेदन प्राप्त भएपछि पुरक अभियोगपत्र पेस गरिने छ।’
उनले यो प्रकरणमा जोडिएका कसैले पनि उन्मुक्ति नपाउने गरी अनुसन्धान गरी मुद्दा दायर गर्न यसो गरिएको बताए।
अभियोगपत्रमा बयानका क्रममा केही उच्च राजनीतिक व्यक्तिहरुको पनि नाम लिएको र आरोप लागेका ती व्यक्तिहरुको हकमा नाम नतोकी अनुसन्धानका लागि निर्देशन दिएको उनले बताए।
प्रहरीको अनुसन्धानका क्रममा बयान गराउँदा अख्तियारका प्रमुख आयुक्त प्रेमकुमार राई, पूर्वगृहमन्त्री रामबहादुर थापा बादल, उनकी श्रीमती एव सांसद नैनकला थापा, पूर्वप्रधानमन्त्री केपी शर्मा ओलीका प्रमुख स्वकीय सचिव राजेश बज्राचार्य, पूर्वप्रदेश सांसद अजयक्रान्ति शाक्य, विद्यासुन्दर शाक्यका निजी सचिव राजेश्वर स्थापित, वेचेन झालगायतको नाम आएकाले उनीहरुमाथि अनुसन्धान गर्न निर्देशन दिइएको हो।
मूल अभियोगपत्रमा बयान र थुनछेक चलिरहने र दोस्रो अभियोगपत्र पनि दायर गरी एकै पटक यो विवादमा फैसला गराउन सकिने जिल्ला सरकारी वकिलको कार्यालयको दाबी छ। यो प्रकरणमा प्रहरी प्रमुख बसन्त कुँवरमाथि पनि अनुसन्धान हुनुपर्ने देखिएको छ।
प्रहरीले अनुसन्धान अघि बढाएमा उनीहरु पक्राउ पर्नसक्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
