काठमाडौं– नक्कली भुटानी शरणार्थी प्रकरणका मुख्य आरोपीहरुले एमाले नेताहरु र निकटस्थहरुको समेत नाम लिएका छन्। मुख्य आरोपीद्वय केशव प्रसाद दुलाल र सानु भण्डारीले एमाले अध्यक्ष केपी शर्मा ओली निकटस्थहरुका साथै उपाध्यक्ष रामबहादुर थापा बादल र उनकी पत्नीसहितको नाम लिएका हुन्।
आरोपी दुलालले तत्कालीन गृहमन्त्री रामबहादुर थापा बादललाई छोरा प्रतिक र श्रीमती नैनकलामार्फत् रकम बुझाएको बयान दिएका छन्। उनले भनेका छन्, ‘बादलका छोरा प्रतीक थापामार्फत् मन्त्री क्वाटर पुल्चोकमा बोलाई निज रामबहादुर थापा बादल राष्ट्रिय सभाको चुनाव हुनुभन्दा अगाडि ३ करोड नगदै बुझी लिएको, प्रतीक थापाले नक्साल निलगिरी थकाली भान्साघरको आँगनको उत्तरतर्फ रहेको होटलको माथिल्लो तलामा बोलाइ मिति २०७६ साल असारमा १ करोड बुझिलिएको हो।’
भण्डारीले पनि तत्कालीन गृहमन्त्री थापाले छोरा प्रतीकमार्फत मन्त्री क्वार्टरमै बोलाएर ३ करोड लिएको उनको दाबी गरेका छन्। त्यसमध्ये १ करोड थापा पत्नी नैनकलाले बुझेको उनको भनाइ छ। यस्तै प्रतीकले २०७६ असारमा नक्सालको एक होटलमा छुट्टै १ करोड रुपैयाँ लिएको दाबी उनको बयानमा समेत छ।
तत्कालिन गृहसचिव र हाल अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले तत्कालीन गृहमन्त्री बादलका सुरक्षा सल्लाहकार इन्द्रजित राईमार्फत् गृह मन्त्रालयको सचिवको कार्यकक्षमा बोलाइ मिति २०७६ साल असार महिनामा ३ करोड नगदै बुझी लिएको आरोप दुलालको छ। यसैगरी सानु भण्डारीले तत्कालीन गृहसचिव राईलाई इन्द्रजितमार्फत् १ करोड रुपैयाँ गाडीमा राखिदिएको बयान दिएका छन्।
तत्कालिन प्रधानमन्त्री केपी शर्मा ओलीका प्रमुख स्वकीय सचिव राजेश बज्राचार्यले प्रधानमन्त्री क्वार्टर बालुवाटारमा ऊर्जामन्त्री टोपबहादुर रायमाझीका प्रमुख स्वकीय सचिव लिला जिसीमार्फत् आफूलाई बोलाएर २०७६ साल असोजमा १ करोड नगद नै लिएको पनि उनको दाबी छ।
उनले थप भनेका छन्, ‘तत्कालीन ऊर्जामन्त्री टोपबहादुर रायमाझीका प्रमुख स्वकीय सचिव लीला जिसीले प्रधानन्त्रीकोमा पैसा पुगिसक्यो, सामाजिक विकास समितिबाट भुटानी शरणार्थीको विषय निर्णय गर्नुपर्ने रहेछ उर्जामन्त्रीज्यू र मलाई पनि रकम चाहियो भनी उर्जामन्त्रीको क्वाटर पुल्चोकमा बोलाइ सामाजिक विकास समितिबाट निर्णय भएको अघिल्लो दिन बेलुका एक करोड नगदै बुझी लिएका हुन्।’
तत्कालीन प्रधानमन्त्री ओलीका पूर्व सल्लाहकार अजयक्रान्ति शाक्य (तत्कालीन इजरायलका नेपाली राजदूत अञ्जान शाक्यका श्रीमान्) र काठमाडौं महानगरपालिकाका तत्कालीन मेयर विद्यासुन्दर शाक्यका निजी सचिव राजेश्वर स्थापितले सामाजिक समितिबाट भुटानी शरणार्थीको विषयलाई निर्णय गर्न रकम अपुग भएको भन्दै लिएको बयानमा दाबी गरिएको छ। अजयक्रान्ति शाक्य र राजेश्वर स्थापितलाई जनही १ करोड दिइएको दाबी गरिएको छ। दुलालको उक्त बयानमा भण्डारीले पनि सहयोग पुग्ने बयान दिएका छन्।
आरजु-मञ्जुको नाम पोलेको स्वीकार, संलग्नता अस्वीकार
केही समयअघि एउटा अडियो बाहिरिएको थियो। जहाँ पूर्व प्रधानमन्त्री तथा कांग्रेस सभापति शेरबहादुर देउवा पत्नी समेत रहेकी कांग्रेस सांसद आरजु राणा र पूर्वगृहमन्त्री खाणकी पत्नी समेत रहेकी सांसद मञ्जु खाणको नाम लिइएको थियो।
फोन संवादमा आफूले रकम बुझाएको दाबी गर्ने नक्कली भुटानी शरणार्थी प्रकरणका विचौलिया मध्येका एक सन्देश शर्मा रहेको पुष्टि भएको छ। उक्त अडियोमा संवाद गर्नेहरुमा एक आफू रहेको शर्माले बयानमा बताएका छन्। तर आफूले करकापमा परेर उनीहरुको नाम लिएको बताउँदै आरजु र मञ्जुको संलग्नता भने अस्वीकार गरेका छन्।
‘जाहेरवाला गजेन्द्र बुढाथोकी र रामकुमार रेग्मीले मलाई पहिले नै फोन सम्पर्क गरी हामीले पैसा लिएका मानिसहरुले हामीलाई समस्यामा पारिसके। निजहरु आएको समयमा हामी तपाईंलाई फोन गर्छौं। सो समयमा तपाईंले हामीले भनेको मानिसलाई रकम बुझाएको छौं भनि जानकारी गराइदिनु भयो भने बाच्छौं भनि पहिले नै भनेका थिए,’ उनले बयानमा भनेका छन्, ‘त्यहीअनुसार मैले फोन गरेको हुँ। पहिले नै उनीहरुको नाम लिइ पैसा दिएको हो भनी भन्नु भनेको हुँदा उनीहरुले भनेअनुसार आरजु देउवा तथा बालकृष्ण खाण र तपाईंले हामीले भनेको मानिसलाई रकम बुझाएका छौं भनी जानकारी गराइदिनु भनेर मञ्जु खाणको समेत नाम लिइ मैले रकम बुझाएको हो भनी कुरा गरेको हो।’
यसैगरी दुलालले उक्त अडियोका विषयमा आफूलाई कुनै जानकारी नभएको बयान दिएका छन्। उनले बयानमा भनेका छन्, ‘सन्देश शर्माले आरजु देउवालाई २ करोड बुझाएको हो, ६ करोड रुपैयाँ त्यो बालकृष्ण खाणलाई बुझाएको हो, उक्त रकम मञ्जु दिदीले लिनुभएका, हनुमानथान भित्र घर छ, त्यही बुझाएको हो भनी बोलेका कुरा सम्बन्धमा मलाई थाहा भएन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
