काठमाडौं– नक्कली भुटानी शरणार्थी प्रकरणमा पक्राउ परेका हज कमिटीका अध्यक्ष शमशेर मियाले उक्त प्रकरणमा आफू संलग्न नरहेको बयान दिएका छन्।
अनुसन्धानका क्रममा प्रहरीलाई दिएको बयानमा उनले गृह मन्त्रालयले उपलब्ध गराएको गाडी सन्देश शर्मालाई दिएको तर उनले त्यसलाई अन्यत्र लगेको र आफूलाई यो विषयमा केही जानकारी नभएको बताए।
‘उक्त गाडी नै मैले चढ्ने गरेको गाडी हो, गाडी म बाहेक हज कमिटीका सदस्यहरू तथा हाल अनुसन्धान क्रममा पक्राउ परेका सन्देश शर्मा समेतले कहिले काही चढ्ने गरेको थियौं,’ उनले बयानमा भनेका छन्, ‘सन्देश शर्माले पारिवारिक समस्या छ भनी उक्त गाडी माग गरेकोले मैले निजलाई केही दिनको लागि गाडी दिएको हो। निजसँग राम्रो सम्बन्ध भएकाले निजले भनेको ठाउँ ललितपुरको होटल हाल पक्राउमा परेका प्रतिवादी टंक गुरुङले सन्चालन गरेको रेष्टुरेन्टमा मसमेत कहिले काँही खान जाने गरेकाले उक्त रेष्टुरेन्टमा चालक प्रेमकुमार गौतमलाई गाडी छाड्न भनेको हुँ।’
साथै उनले यो प्ररकणमा संलग्नहरुमाथि कारबाही हुनुपर्ने माग गरेका छन्। ‘गैह्र भुटानी शरणार्थीलाई भुटानी शरणार्थी बनाई अमेरिका पठाउने कार्य ठीक होइन,’ उनले बयानमा भनेका छन्, ‘यसमा संलग्न रहेका प्रतिवादीहरुलाई कानुन बमोजिम कडा कारबाही हुनुपर्छ, पीडितले न्याय पाउनुपर्छ।’
यस्तो छ उनको बयान
मैले नेपाल सरकार अन्तर्गत गृह मन्त्रालयबाट सरकारी नम्बर प्लेट भएको गाडी थान–१ र चालक समेत उपलब्ध हुदै आई रहेको थियो। म हज कमिटीको अध्यक्ष पदमा नियुक्ति भए पश्चात मलाई गृह मन्त्रालयबाट नम्बर यकिन हुन नआएको प्राडो गाडी उपलब्ध भएको थियो। सो गाडी १ बर्ष जती चढे पश्चात पुनः मलाई बा.१ झ.१५८१ नम्बरको निसान पेट्रोल जिप उपलब्ध भयो।
उक्त गाडी ८ महिना चढेपछि कर तिर्न भनी यातायात कार्यालय जाँदा सो नम्बरको अभिलेख भेटिएन। गृह मन्त्रालय अन्तर्गत आन्तरिक सवारी शाखामा गई सो कुरा जानकारी गराउँदा सो गाडीको वास्तविक नम्बर बा. १ झ १५८१ नभई बा. १ ञ.१५८१ रहेको जानकारी प्राप्त भएकाले मैले निजहरू कै सुझाव अनुसार उक्त बा.१ ञ.१५८१ नम्बरको नम्बर प्लेट राखी चढ्दै आएकोमा सरकारी गाडीमा ईम्बोस्ड नम्बर राख्ने भनी पछी हाल कायम रहेको BAB1405 प्लेट राखी चढ्दै आएको थिएँ।
म हज समितिको अध्यक्ष रहेको बेला मलाइ उपलब्ध भएको नेपाल प्रहरीको चालक प्र.ह.रेशम गुरुङ, प्र. ज. मनोज लामा हुन, शसस्त्र प्रहरीका प्र.स.ह.प्रेम गौतम र नेपाल प्रहरीका प्र.स.ह. डोल राज पाण्डे र करारमा राखेका प्रभास परियार भन्ने यम बहादुर परियार रहेका थिए। प्रहरी कार्यालयमा दाखिला हुन आएको BAB1405 नम्बरको गाडी मलाई देखाउँदा देखे, उक्त गाडीनै मैले चढ्ने गरेको गाडी हो, गाडी म बाहेक हज कमिटीका सदस्यहरू तथा हाल अनुसन्धान क्रममा पक्राउ परेका सन्देश शर्मा समेतले कहिले काही चढ्ने गरेको थिए।
सन्देश शर्माले पारिवारिक समस्या छ भनी उक्त गाडी माग गरेकोले मैले निजलाई केही दिनको लागी गाडी चाहियो भन्दा निजसंग राम्रो सम्बन्ध भएकाले निजले भनेको ठाउँ ललितपुरको होटल हाल पक्राउमा परेका प्रतिवादी टंक गुरुङले सन्चालन गरेको रेष्टुरेन्टमा म समेत कहिले काही खान जाने गरेकाले उक्त रेष्टुरेन्टमा चालक प्रेम कुमार गौतमलाई गाडी छाड्न भनेको हुँ भने निज चालकलाई केही दिनको लागी घरमा बस भनेको हुँ।
सन्देश शर्मालाई पटक–पटक ताकेता गर्दा ५÷६ दिन पछी मात्र निज सन्देश शर्माले गाडी ल्याई सोही रेष्टुरेन्टमा छाडेको जानकारी दिएकाले चालक प्रेम गौतमलाई उक्त गाडी लिन पठाएको हुँ। गृह मन्त्रालय अन्तर्गत आन्तरिक शाखाबाट वास्तविक नम्बर नै उक्त गाडीमा राख्ने भन्ने सल्लाह भए अनुसार मर्मतका क्रममा गाडीको नम्बर प्लेट समेत वास्तबिक बा. १ ञ.१५८१ नम्बरको प्लेट राखी चालकले गाडी लिई आएका हुन्।
आज भन्दा २ वर्ष पहिले ललितपुर बखुण्डोलमा रहेको प्रतिवादी टंक कुमार गुरुङको रिसोर्टमा सानु भण्डारी, केशव प्रसाद दुलाल, सन्देश शर्मा समेत भेटघाट हुँदा नेपाली नागरीकहरूलाई तेश्रो मुलुक समेत पठाउने कार्य हुँदैछ भनी एक आपसमा कुराकानी गरेको मैले सुनेको थिए।
गैह्र भुटानी शरणार्थीहरूलाई तेश्रो देश पठाई दिने कार्यमा संलग्न रहेका उच्च पदस्थका कर्मचारीहरू समेत पक्राउ परेको र सोही बिषयमा मेरो नाम समेत जोडीन आएकोले प्रहरीले मलाई पनि पक्राउ गर्न सक्छ भन्ने सोची मैले बोक्ने गरेको IMe\ No=352865670451178 रहेको Iphone 13 Pro max -A2484_ Apple कम्पनीको मोबाईल थान–१ मा रहेको सम कार्ड 9857025699 निकाली उक्त मोवाईल भारतको गोरखपुर भन्ने स्थानमा रहेको खोलामा फ्याँकी दिएको थिए।
हाल मैले IMEI No=868932038271495÷868932038271503 भएको MI कम्पनीको मोबाईलमा 9857025699 नम्बर को सिम राखी चलाउँदै आएको छु। म समेतलाई प्रहरीले खोजतलास गर्दै छ भन्ने थाहा पाई म डर त्रासमा भागी उक्त मोबाईल फ्याँकेको हो। गैह्र भुटानी शरणार्थीलाई भुटानी शरणार्थी बनाइ अमेरिका पठाउने कार्य ठीक होईन, यसमा संलग्न रहेका प्रतिवादीहरुलाई कानून बमोजिम कडा कारवाही हुनु पर्छ, पिडितले न्याय पाउनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752245592.jpg)
-1752043710.jpg)
-1749826086.png)
