एजेन्सी– बखमुतमा लडिरहेको रूसको वाग्नर समूहका प्रमुख येभगेनी प्रिगोजिनले शनिबार पूर्वी युक्रेनको बखमुतलाई पूर्ण रुपमा कब्जामा लिएको दाबी गरेका छन्।
युक्रेनले सहरको अवस्था ‘नाजुक’ रहेको स्वीकारेको छ, तर त्यहाँ अझै पनि केही जमिन नियन्त्रण रहेको बताएको छ।
‘बखमुतमा भारी लडाइँ छ। स्थिति गम्भीर छ,’ उपरक्षामन्त्री गन्ना मल्यारले टेलिग्राममा लेखेका छन्। उनले युक्रेनी सेनाले सहरको ‘आकाश क्षेत्र’ मा ‘रक्षा शक्ति कब्जा’ गरिरहेको दाबी गरे।
‘अहिलेसम्म, हाम्रा रक्षकहरूले यस क्षेत्रमा केही औद्योगिक र पूर्वाधार सुविधाहरू नियन्त्रण गर्न सफल छन्।’
बखमुतका लागि लडाइँको नेतृत्व गरेका वाग्नर समूहले सहरमा महिनौंसम्म चलेको युद्धमा ठूलो क्षति बेहोरेको विश्वास गरिएको छ।
‘आज मे २० का दिन मध्याह्नतिर बखमुतलाई पूरै कब्जा गरिएको छ,’ प्रिगोजिनले टेलिग्राममा पोस्ट गरेको एक भिडियोमा भनेका छन्।
वाग्नर लडाकूहरूले मे २५ सम्ममा आधिकारिक रूसी सेनालाई हस्तान्तरण गर्नुअघि कब्जा गरिएको सहरको परीक्षण गर्ने बताएका छन्।
प्रिगोजिनले भने, ‘मे २५ सम्ममा हामी बखमुतको पूर्ण परीक्षण गर्नेछौं, प्रतिरक्षाका लागि आवश्यक लाइनहरू सिर्जना गर्नेछौं र सेनालाई हस्तान्तरण गर्नेछौं। परीक्षणका लागि हामी आफै शिविरस्थलहरूमा जानेछौं।’
युक्रेनका राष्ट्रपति भोलोदिमिर जेलेन्स्कीले जापानमा भएको जी–७ शिखर सम्मेलनमा भाग लिइरहँदा वाग्नरले यस्तो घोषणा गरेको हो।
बखमुत नियन्त्रणमा लिने अभियान २२४ दिनसम्म चलेको प्रिगोजिनले बताए। कुनै समय करिब ७० हजार जनसङ्ख्या रहेको नुन खानी केन्द्रलाई यस युद्धले ध्वस्त पारेको छ।
आधिकारिक रूसी सेनासँग सार्वजनिक पटाक्षेपमा मुछिएका प्रिगोजिनले भने, ‘यदि अक्षम जनरलहरू नभएको भए मस्कोको घाटा निकै कम हुने थियो।’
उनले लामो समयदेखि वाग्नरलाई उचित मात्रामा गोलाबारुद नदिएको गुनासो गर्दै आएका छन्। ‘यहाँ (बखमुतमा) वाग्नर मात्र थिए,’ उनले भिडियोमा भनेका छन्।
वाग्नर प्रमुख प्रिगोजिनले भने, ‘हामीले यहाँ युक्रेनी सेनासँग मात्र होइन, रूसी कर्मचारीतन्त्रसँग पनि सङ्घर्ष गर्नुपरेको थियो।’
उनले बखमुतमा कति वाग्नर लडाकू मारिएका छन् भन्ने नखुलाए पनि रूसको सैन्य नेतृत्वका कारण पाँच गुणा बढी क्षति भएको बताए।
उनले रक्षामन्त्री सर्गेई शोइगु र चिफ अफ जनरल स्टाफ भ्यालेरी गेरासिमोभले आक्रमणलाई ‘आफ्नै मनोरञ्जन’मा परिणत गरेको आरोप लगाए।
प्रिगोजिनले भने, ‘इतिहासमा एक दिन उनीहरूले आफ्नो कार्यको मूल्य चुकाउनेछन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
