राजनीति

सुदूरपश्चिममा भएको भागबण्डाप्रति नागरिक उन्मुक्तिको असन्तुष्टि, २ मन्त्रालय नपाए सरकारमा नजाने

शेरबहादुर ऐर शुक्रबार, जेठ ५, २०८० १२:१७

धनगढी– सुदूरपश्चिम प्रदेश सरकारमा मन्त्रालयहरुको भागबण्डालाई लिएर नागरिक उन्मुक्ति पार्टीले असन्तुष्टि जनाएको छ। आफूहरुलाई एउटा मात्रै मन्त्रालय दिइएको भन्दै नागरिक उन्मुक्तिका नेताहरुले असन्तुष्टि जनाएका छन्।

नागरिक उन्मुक्ति पार्टी, प्रदेश संसदीय दलका नेता घनश्याम चौधरीले २ मन्त्रालय पाउनुपर्ने दाबी कायम राख्दै नपाए सरकारमा सहभागी नहुने प्रतिक्रिया दिएका छन्। उनले सामाजिक बिकास मन्त्रालय र भूमि व्यवस्था, कृषि तथा सहकारी मन्त्रालय पाउनुपर्ने माग गरेका छन्।

‘हामीले २ मन्त्रालय पानुपर्ने माग राखेका छौं, यदि हाम्रो माग पुरा भएन भने आज (शुक्रबार) हुने मन्त्रिपरिषद् विस्तारमा सहभागी हुँदैनौं। बहिस्कार गर्छौं,’ चौधरीले भने।

प्रदेश सरकारको नेतृत्वकर्ता दल नेपाली कांग्रेस र नेकपा माओवादी केन्द्रबीच मन्त्रालयहरुको भागबण्डा मिलेपछि शुक्रबार मन्त्रिपरिषद् विस्तारको तयारी छ। कांग्रेसले मुख्यमन्त्रीका अतिरिक्त २ तथा माओवादी केन्द्रले २ मन्त्री पाउने सहमति भएको छ। यस्तै, नागरिक उन्मुक्ति पार्टीले एउटा मन्त्रालय पाउने सहमति भएको बताइएको थियो।

३ वटै दलले १–१ वटा राज्यमन्त्री पाउने सहमति भएको बताइए पनि नागरिक उन्मुक्तिले भने २ वटा मन्त्री नै पाउनुपर्ने दाबी गरेको हो।