काठमाडौं– सशस्त्र प्रहरी बलका अतिरिक्त महानिरीक्षकहरु सीमा क्षेत्रको छड्के निरीक्षणमा निस्किएका छन्। सीमा नाकामा अनुगमनका क्रममा कहिँकतै कमिकमजोरी भेटिए टोली परिवर्तन गर्नेदेखि कमाण्डरहरुलाई कमाण्डबाट हटाउनेसम्मको जिम्मेवारी लिई एआईजीहरु सीमा नाका अनुगमनमा निस्केका हुन्।
मानवश्रोत विभाग प्रमुख एआईजी नारायणदत्त पौडेल लुम्बिनी प्रदेश अन्तर्गतका सीमा क्षेत्र अनुगमनमा निस्केका छन्। बाँके जिल्लास्थित बीओपी बढैया, जयसपुर, गंगापुर जमुनाह तथा कपिलवस्तु जिल्लास्थित चाकडचौडा, मर्यादपुर, हथिहवा, हर्दौना, भिल्मीलगायतका सीमा नाका अनुगमन र निरीक्षणमा एआईजी पौडेल छन्।
यसैगरी पौडेलले बर्दिया, रुपन्देही, नवलपरासीलगायतका सीमा नाका अनुगमनसमेत गर्ने कार्यक्रम रहेको सशस्त्र प्रहरीका सहायक प्रवक्ता तथा डीएसपी शैलेन्द्र थापाले जानकारी दिए। बाँके र कपिलवस्तुस्थित सीमानामा रहेका युनिट अनुगमन तथा निरीक्षणका क्रममा उनले सीमामा हुनसक्ने चोरीपैठारी नियन्त्रणमा निर्मम रुपमा प्रस्तुत हुन र कुनै पनि प्रकारको सम्झौता नगर्न निर्देशन दिए।
1684410340.jpg)
अवैध क्रियाकलाप रोक्नका साथसाथै सीमामा सरोकारवाला निकायसँगको समन्वयमा सीमास्तम्भको अनुगमन, रेखदेख तथा वर्षातको समयमा विशेष गरी सानाखालका सीमास्तम्भ बगाउने तथा पुरिनसक्ने भएकोले त्यसलाईसमेत विशेष प्राथमिकतामा राख्न निर्देशन दिएका छन्।
यसअघि, कार्य विभाग प्रमुख एआईजी चन्द्रप्रकाश गौतमले गत चैत तथा वैशाख महिनामा कोशी प्रदेश तथा सुदूरपश्चिम प्रदेश अन्तर्गतका जिल्लाका सीमा नाका अनुगमन गरेका थिए। कोशी प्रदेश अन्तर्गत इलाम, झापा, मोरङ, सुनसरी जिल्लाका सीमा क्षेत्रमा रहेका गण तथा बीओपी अनुगमनका क्रममा उनले विशेष गरी भन्सार इलाकामा कडाईकासाथ कर्तव्यपालना गर्न र राजश्व संकलनमा गम्भीर भएर लाग्न निर्देशन दिएका थिए। सुदूरपश्चिम प्रदेशका सीमा नाकासमेत उनले अनुगमन गरेका थिए।
सीमा नाकामा आवतजावत गर्ने नागरिकलाई सहज र सजिलो वातावरण बनाउनका साथै विभिन्न आवरणमा हुनसक्ने चोरीपैठारी नियन्त्रणका साथसाथै लागूपदार्थ ओसार पसारमासमेत उच्च निगरानी गर्न उनले निर्देशन दिए। सीमा सुरक्षा विभाग प्रमुख सशस्त्र एआईजी वंशीराज दाहालले वैशाख अन्तिम हप्ता बागमती प्रदेश अन्तर्गत रसुवा, सिन्धुपाल्चोक तथा दोलखा जिल्लाको सीमा युनिटहरुको निरीक्षण तथा अनुगमन गरेका थिए।
1684410339.jpg)
अनुगमनका क्रममा चोरीपैठारी नियन्त्रण र वन्यजन्तुका अंगहरुको हुनसक्ने तस्करी नियन्त्रणमा परिणाम देखिने गरी कार्य गर्न निर्देशन दिए। केही महिना यतादेखि सशस्त्र प्रहरी बल, नेपालले एआईजीहरुको नेतृत्वमा सीमा अनुगमनलाई तीव्रता दिएको छ।
आर्थिक वर्ष २०७९/८० को वैशाख अन्तिम हप्तासम्म चोरीनिकासी तथा पैठारीको १ अर्ब रुपैयाँभन्दा बढीको सामान नियन्त्रणमा लिई सम्बन्धित निकायहरुमा बुझाइएको सशस्त्रले जनाएको छ।
खासगरी सीमामा हुने चोरीनिकासी नियन्त्रण, सीमा पिल्लर अनुगमन, काउण्टरपाट्र्ससँगको समन्वय र सहकार्य तथा सीमाना नजिक बसोबास गर्ने नागरिक र सशस्त्र प्रहरी विचको सहयोग र सहकार्यलाई थप मजबुद बनाउनसमेत यस प्रकारका अनुगमन प्रभावकारी हुँदै गएको र आगामी दिनमासमेत यसलाई निरन्तरता दिइने सशस्त्रले जनाएको छ।
1684410339.jpg)
सीमा नाकाको अवस्था, वर्षातको समयमा हुनसक्ने डुवानबारे युनिटहरुले गरेको पूर्व तयारीबारे जानकारी लिने तथा भन्सार इलाकाको अनुगमनसमेत निरन्तर रुपमा उनीहरुबाट हुनेछ। जसकारण राजश्व संकलन र चोरीपैठारी नियन्त्रणमा संगठनको लक्ष्य प्राप्तिमा सहयोग पुग्ने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
