एसपी बढुवामा छुटेका डीएसपीद्वय अंगुर जिसी र निरञ्जनदत्त भट्ट
काठमाडौं– प्रहरी प्रधान कार्यालयले शुक्रबार गरेको प्रहरी नायब उपरीक्षक (डीएसपी) बाट प्रहरी उपरीक्षक (एसपी) बढुवा विवादमा परेको छ। राम्रा र अब्बल अधिकृतहरुलाई छुटाएर कारबाही भोगेका अधिकृतहरु बढुवा गरिएको भन्दै बढुवाको प्रतिस्पर्धीबाहेकका प्रहरी अधिकृतलेसमेत बढुवाप्रति प्रश्न उठाएका छन्।
अख्तियारले डामेकादेखि भर्खर नसियत भोगेका अधिकृतहरुलाई बढुवा गर्दा राम्रो काम गर्दै संगठनको छवि उँचो बनाएका प्रहरी अधिकृतहरु यो पटकको बढुवामा छुटेको उनीहरुको भनाइ छ। गत असोजमा भएको प्रहरी दिवसमा काठमाडौं उपत्यकाका प्रहरी वृत्तमध्ये उत्कृष्ट वृत्त ठहरिँदै महारागञ्जका डीएसपी अंगुर जिसीले सर्वोत्कृष्ट अवार्ड पाएका थिए। तत्कालीन आईजी धीरजप्रताप सिंहले जिसीलाई पुरस्कृत गरेका थिए।
त्यसैगरी काठमाडौं उपत्यका प्रहरी कार्यालय रानिपोखरीले पनि जिसीले उत्कृष्ट कार्यसम्पादन गरेको भन्दै अन्य वृत्तहरुलाई उदाहरणसमेत दिँदै आएको थियो। तर, अहिले डीएसपीबाट एसपी बन्ने क्रममा जिसी छुट्दा घुससहित रंगेहात पक्राउ परेका व्यक्ति श्याम राईले बढुवामा बाजी मारे।
कन्चनपुरकी बालिका निर्मला पन्तको अनुसन्धानमा खटिएपछि अन्यायपूर्ण तरिकाले कारबाही भोगेका जिसी लामो समय अन्यायमै रहे। त्यसपछि जिम्मेवारी पाएका उनले उत्कृष्ट काम गरेका थिए। तर बढुवामा छुटे।
त्यस्तै अर्का अब्बल प्रहरी अधिकृत निरन्जन भट्ट पनि बढुवामा छुटे। हाईप्रोफाइल व्यक्तिहरु जोडिएको भुटानी शरणार्थी प्रकरणबारे अनुसन्धान गरिरहेका भट्ट पनि अन्यायमा परे। दुई वर्षसम्म परिसरको मुद्दामा बसेर काम गरेका भट्ट पनि कार्यसम्पादनमा अब्बल व्यक्ति हुन्। भुटानी शरणार्थी प्रकरणमा उत्कृष्ट काम गरेको भन्दै सर्वसाधारणलेसमेत भट्टलाई पुष्पगुच्छा दिएका थिए। तर बढुवामा भने संगठनले उनलाई न्याय दिएन।
उत्कृष्ट ठहरिँदै पुरस्कृत भएका डीएसपी जिसी।
प्रहरीको स्याट परीक्षाको प्रश्नपत्र आउट गरिएको आरोपमा कारबाही भोगेका रुपेश खड्का, अख्तियारले डामेका श्याम राई, जेलमा रहेका गुण्डा नाइके समीरमान सिंह बस्नेतसँग भेट गरेपछि कारबाही भोगेका मिलन केसी बढुवा भए।
डीएसपीबाट एसपी बढुवाका लागि प्रहरी महानिरीक्षक आईजीपी अध्यक्ष, गृह मन्त्रालयका सहसचिव सदस्य र आईजीपीले तोकेका एआईजी वा डीआईजीमध्ये एक जना सदस्य–सचिव हुने व्यवस्था छ।
उक्त समितिले कार्यसम्पादन मूल्याकंन, ज्येष्ठता वापतको अंक, भौगोलिक क्षेत्रमा काम गरेको अनुभव, शैक्षिक योग्यता, तालिम वापतको अंक, चुनौतीपूर्ण वा विशेष जिम्मेवारी वापको अंक र बढुवा समितिले दिने अंकको आधारमा बढुवा गर्ने गर्दछ।
तर, समितिले यी आधारहरुलाई पन्छाएर रिक्त रहेका २२ एसपी पदमा रोल क्रमअनुसार क्रमश २२ जनालाई बढुवा गरेको छ। रोल क्रमअनुसार बढुवा हुने भए किन चाहियो बढुवाका आधारहरु? भन्ने प्रश्न प्रहरीभित्रै उठेको छ।
अहिले बढुवा भएकाहरु २०६१ सालमा प्रहरी निरीक्षकमा भर्ना भएकाहरु हुन्। ८४ जना इन्सपेक्टरमा भर्ना भएकामध्ये ३ लटमा डीएसपीमा बढुवा भएका थिए। पहिलो लटमा ३८ जना डिएसपी भएका थिए। उनीहरुमध्ये ६ जना विभिन्न कारणबाट जागिरबाट बाहिरिएका थिए। बाँकी रहेका ३२ जना मध्ये १५ जना यसअघि नै एसपी भइसकेका थिए। दोस्रो लटमा १५ जना र बाँकी तेस्रो लटमा डीएसपी भएका थिए।
योसँगै २०५८ सालका प्रहरी निरीक्षक नियुक्त भएका ३ जना र १७ जना पहिलो लटका गरी २० जना एसपी हुन बाँकी थियो। हाल २२ जना एसपी खालीमा बढुवा गर्नुपर्ने भएकोले पहिलाका बाँकी र दोस्रो लटमा बढुवा भएका १५ जना गरी जम्मा ३५ जनाबीचमा प्रतिस्पर्धा थियो। पहिलो नम्बरका राजेश थापाको अमेरिकन ग्रिनकार्ड रहेको भन्दै राजीनामा दिन लगाइएको थियो।
३५ जना एउटा बक्समा परिसकेपछि को सिनियर को जुनियर नभै डिएसपीमा ८ वर्ष कार्यरत रहँदा उनीहरुले प्राप्त गरेका अंक र बढुवा समितिले दिने अंकको आधारमा बढुवा हुनुपर्नेमा आधारलाई पन्छाएर रोल क्रम अनुसार मात्रै बढुवा गरिएको भन्दै प्रहरीमा चरम असन्तुष्टि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
